Book 1 · Adhyay 20

vāstuka.praśaste deśe saprākāra.parikhā.dvāram aneka.kakṣyā.parigatam antaḥpuraṃ kārayet | 1 |

kośagṛha.vidhānena madhye vāsa.gṛham, gūḍha.bhitti.sañcāraṃ mohana.gṛhaṃ tan.madhye vā vāsa.gṛham, bhūmi.gṛhaṃ vā-āsanna.caitya.kāṣṭha.devatā.apidhāna.dvāram aneka.suruṅgā.sañcāraṃ tasya-upari prāsādaṃ gūḍha.bhitti.sopānaṃ suṣira.stambha.praveśa.apasāraṃ vā vāsa.gṛhaṃ yantra.baddha.tala.avapātaṃ kārayet, āpat.pratīkāra.artham āpadi vā | 2 |

ato 'nyathā vā vikalpayet, saha.adhyāyi.bhayāt | 3 |

mānuṣeṇa-agninā trir apasavyaṃ parigatam antaḥpuram agnir anyo na dahati, na ca-atra-anyo 'gnir jvalati, vaidyutena bhasmanā mṛt.samyuktena karaka.vāriṇā-avaliptaṃ ca | 4 |

jīvantī.śvetā.muṣkaka.puṣpa.vandākābhir akṣīve jātasya-aśvatthasya pratānena guptaṃ sarpā viṣāṇi vā na prabhavanti | 5 |

mayūra.nakula.pṛṣata.utsargaḥ sarpān bhakṣayati | 6 |

śukaḥ sārikā bhṛṅga.rājo vā sarpa.viṣa.śaṅkāyāṃ krośati | 7 |

krauñco viṣa.abhyāśe mādyati, glāyati jīvaṃ.jīvakaḥ, mriyate matta.kokilaḥ, cakorasya-akṣiṇī virajyete | 8 |

ity evam agni.viṣa.sarpebhyaḥ pratikurvīta | 9 |

pṛṣṭhataḥ kakṣyā.vibhāge strī.niveśo garbha.vyādhi.saṃsthā vṛkṣa.udaka.sthānaṃ ca | 10 |

bahiḥ kanyā.kumāra.puram | 11 |

purastād alaṅkāra.bhūmir mantra.bhūmir upasthānaṃ kumāra.adhyakṣa.sthānaṃ ca | 12 |

kakṣya.antareṣv antarvaṃśika.sainyaṃ tiṣṭhet | 13 |

antar.gṛha.gataḥ sthavira.strī.pariśuddhāṃ devīṃ paśyet | 14 |

devī.gṛhe līno hi bhrātā bhadrasenaṃ jaghāna, mātuḥ śayyā.antargataś ca putraḥ kārūṣam | 15 |

lājān madhunā-iti viṣeṇa paryasya devī kāśi.rājam, viṣa.digdhena nūpreṇa vairantyam, mekhalā.maṇinā sauvīram, jālūtham ādarśena, veṇyāṃ gūḍhaṃ śastraṃ kṛtvā devī vidūrathaṃ jaghāna | 16 |

tasmād etāny āspadāni pariharet | 17 |

muṇḍa.jaṭila.kuhaka.pratisaṃsargaṃ bāhyābhiś ca dāsībhiḥ pratiṣedhayet | 18 |

na ca-enāḥ kulyāḥ paśyeyuḥ, anyatra garbha.vyādhi.saṃsthābhyaḥ | 19 |

rūpa.ājīvāḥ snāna.pragharṣa.śuddha.śarīrāḥ parivartita.vastra.alaṅkārāḥ paśyeyuḥ | 20 |

aśītikāḥ puruṣāḥ pañcāśatkāḥ striyo vā mātā.pitṛ.vyañjanāḥ sthavira.varṣadhara.abhyāgārikāś ca-avarodhānāṃ śauca.āśaucaṃ vidyuḥ, sthāpayeyuś ca svāmi.hite, | 21 |