Book 1 · Adhyay 19

rājānam utthitam anūttiṣṭhante bhṛtyāḥ | 1 |

pramādyantam anupramādyanti | 2 |

karmāṇi ca-asya bhakṣayanti | 3 |

dviṣadbhiś ca-atisandhīyate | 4 |

tasmād utthānam ātmanaḥ kurvīta | 5 |

nālikābhir ahar aṣṭadhā rātriṃ ca vibhajet, chāyā.pramāṇena vā | 6 |

tripauruṣī pauruṣī catur.aṅgulā naṣṭac.chāyo madhya.ahna-iti catvāraḥ pūrve divasasya-aṣṭa.bhāgāḥ | 7 |

taiḥ paścimā vyākhyātāḥ | 8 |

tatra pūrve divasasya-aṣṭa.bhāge rakṣā.vidhānam āya.vyayau ca śṛṇuyāt | 9 |

dvitīye paura.jānapadānāṃ kāryāṇi paśyet | 10 |

tṛtīye snāna.bhojanaṃ seveta, svādhyāyaṃ ca kurvīta | 11 |

caturthe hiraṇya.pratigraham adhyakṣāṃś ca kurvīta | 12 |

pañcame mantri.pariṣadā pattra.sampreṣaṇena mantrayeta, cāra.guhya.bodhanīyāni ca budhyeta | 13 |

ṣaṣṭhe svaira.vihāraṃ mantraṃ vā seveta | 14 |

saptame hasty.aśva.ratha.āyudhīyān paśyet | 15 |

aṣṭame senā.pati.sakho vikramaṃ cintayet | 16 |

pratiṣṭhite 'hani sandhyām upāsīta | 17 |

prathame rātri.bhāge gūḍha.puruṣān paśyet | 18 |

dvitīye snāna.bhojanaṃ kurvīta, svādhyāyaṃ ca | 19 |

tṛtīye tūrya.ghoṣeṇa saṃviṣṭaś caturtha.pañcamau śayīta | 20 |

ṣaṣṭhe tūrya.ghoṣeṇa pratibuddhaḥ śāstram itikartavyatāṃ ca cintayet | 21 |

saptame mantram adhyāsīta, gūḍha.puruṣāṃś ca preṣayet | 22 |

aṣṭame ṛtvig.ācārya.purohita.svastyayanāni pratigṛhṇīyāt, cikitsaka.māhānasika.mauhūrtikāṃś ca paśyet | 23 |

savastāṃ dhenuṃ vṛṣabhaṃ ca pradakṣiṇī.kṛtya-upasthānaṃ gacchet | 24 |

ātma.bala.ānukūlyena vā niśā.ahar.bhāgān pravibhajya kāryāṇi seveta | 25 |

upasthāna.gataḥ kārya.arthinām advāra.āsaṅgaṃ kārayet | 26 |

durdarśo hi rājā kārya.akārya.viparyāsam āsannaiḥ kāryate | 27 |

tena prakṛti.kopam ari.vaśaṃ vā gacchet | 28 |

tasmād devatā.āśrama.pāṣaṇḍa.śrotriya.paśu.puṇya.sthānānāṃ bāla.vṛddha.vyādhita.vyasany.anāthānāṃ strīṇāṃ ca krameṇa kāryāṇi paśyet, kārya.gauravād ātyayika.vaśena vā | 29 |