Book 1 · Adhyay 18

vinīto rāja.putraḥ kṛcchra.vṛttir asadṛśe karmaṇi niyuktaḥ pitaram anuvarteta, anyatra prāṇa.ābādhaka.prakṛti.kopaka.pātakebhyaḥ | 1 |

puṇye karmaṇi niyuktaḥ puruṣam adhiṣṭhātāraṃ yācet | 2 |

puruṣa.adhiṣṭhitaś ca saviśeṣam ādeśam anutiṣṭhet | 3 |

abhirūpaṃ ca karma.phalam aupāyanikaṃ ca lābhaṃ pitur upanāyayet | 4 |

tathā-apy atuṣyantam anyasmin putre dāreṣu vā snihyantam araṇyāya-āpṛccheta | 5 |

bandha.vadha.bhayād vā yaḥ sāmanto nyāya.vṛttir dhārmikaḥ satya.vāg.avisaṃvādakaḥ pratigrahītā mānayitā ca-abhipannānāṃ tam āśrayeta | 6 |

tatrasthaḥ kośa.daṇḍa.sampannaḥ pravīra.puruṣa.kanyā.sambandham aṭavī.sambandhaṃ kṛtya.pakṣa.upagrahaṃ ca kuryāt | 7 |

eka.caraḥ suvarṇa.pāka.maṇi.rāga.hema.rūpya.paṇya.ākara.karma.antān ājīvet | 8 |

pāṣaṇḍa.saṅgha.dravyam aśrotriya.upabhogyaṃ vā deva.dravyam āḍhya.vidhavā.dravyaṃ vā gūḍham anupraviśya sārtha.yāna.pātrāṇi ca madana.rasa.yogena-atisandhāya-apaharet | 9 |

pāragrāmikaṃ vā yogam ātiṣṭhet | 10 |

mātuḥ parijana.upagraheṇa vā ceṣṭeta | 11 |

kāru.śilpi.kuśīlava.cikitsaka.vāg.jīvana.pāṣaṇḍac.chadmabhir vā naṣṭa.rūpas tad.vyañjana.sakhaś.chidreṣu praviśya rājñaḥ śastra.rasābhyāṃ prahṛtya brūyāt - "aham asau kumāraḥ, saha.bhogyam idaṃ rājyam, eko na-arhati bhoktum, ye kāmayante māṃ bhartuṃ tān ahaṃ dviguṇena bhakta.vetanena-upasthāsyāmi" iti | 12 | ity aparuddha.vṛttam |

aparuddhaṃ tu mukhya.putra.apasarpāḥ pratipādya-ānayeyuḥ, mātā vā pratigṛhītā | 13 |

tyaktaṃ gūḍha.puruṣāḥ śastra.rasābhyāṃ hanyuḥ | 14 |

atyaktaṃ tulya.śīlābhiḥ strībhiḥ pānena mṛgayayā vā prasañjayitvā rātrāv upagṛhya-ānayeyuḥ | 15 |