Book 1 · Adhyay 17

rakṣito rājā rājyaṃ rakṣaty āsannebhyaḥ parebhyaś ca, pūrvaṃ dārebhyaḥ putrebhyaś ca | 1 |

dāra.rakṣaṇaṃ niśānta.praṇidhau vakṣyāmaḥ | 2 |

"putra.rakṣaṇaṃ tu | 3 |

"janma.prabhṛti rāja.putrān rakṣet | 4 |

karkaṭaka.sadharmāṇo hi janaka.bhakṣā rāja.putrāḥ | 5 |

teṣām ajāta.snehe pitary upāṃśu.daṇḍaḥ śreyān" iti bhāradvājaḥ | 6 |

"nṛśaṃsam aduṣṭa.vadhaḥ kṣatra.bīja.vināśaś ca" iti viśāla.akṣaḥ | 7 |

"tasmād eka.sthāna.avarodhaḥ śreyān" iti | 8 |

ahi.bhayam etad " iti pārāśarāḥ | 9 |

" kumāro hi "vikrama.bhayān māṃ pitā-avaruṇaddhi" iti jñātvā tam eva-aṅke kuryāt | 10 |

tasmād anta.pāla.durge vāsaḥ śreyān" iti | 11 |

"aurabhraṃ bhayam etad" iti piśunaḥ | 12 |

"pratyāpatter hi tad eva kāraṇaṃ jñātvā-anta.pāla.sakhaḥ syāt | 13 |

tasmāt sva.viṣayād apakṛṣṭe sāmanta.durge vāsaḥ śreyān" iti | 14 |

"vatsa.sthānam etad" iti kauṇapadantaḥ | 15 |

"vatsena-iva hi dhenuṃ pitaram asya sāmanto duhyāt | 16 |

tasmān mātṛ.bandhuṣu vāsaḥ śreyān" iti | 17 |

"dhvaja.sthānam etad" iti vāta.vyādhiḥ | 18 |

" tena hi dhvajena-aditi.kauśikavad asya mātṛ.bāndhavā bhikṣeran | 19 |

tasmād grāmya sukheṣv enam avasṛjet | 20 |

sukha.uparuddhā hi putrāḥ pitaraṃ na-abhidruhyanti" iti | 21 |

jīvan.maraṇam etad iti kauṭilyaḥ | 22 |

kāṣṭham iva ghuṇa.jagdhaṃ rāja.kulam avinīta.putram abhiyukta.mātraṃ bhajyeta | 23 |

tasmād ṛtumatyāṃ mahiṣyām ṛtvijaś carum aindrābārhaspatyaṃ nirvapeyuḥ | 24 |

āpanna.sattvāyāḥ kaumāra.bhṛtyo garbha.bharmaṇi prasave ca viyateta | 25 |

prajātāyāḥ putra.saṃskāraṃ purohitaḥ kuryāt | 26 |

samarthaṃ tadvido vinayeyuḥ | 27 |

" sattriṇām ekaś ca-enaṃ mṛgayā.dyūta.madya.strībhiḥ pralobhayet "pitari vikramya rājyaṃ gṛhāṇa" iti | 28 |

tam anyaḥ sattrī pratiṣedhayet " ity āmbhīyāḥ | 29 |

mahā.doṣam abuddha.bodhanam it kauṭilyaḥ | 30 |

navaṃ hi dravyaṃ yena yena-artha.jātena-upadihyate tat tad ācūṣati | 31 |

evam ayaṃ nava.buddhir yad yad ucyate tat tat.śāstra.upadeśam iva-abhijānāti | 32 |

tasmād dharmyam arthyaṃ ca-asya-upadiśen na-adharmyam anarthyaṃ ca | 33 |

sattriṇas tv enaṃ "tava smaḥ" iti vadantaḥ pālayeyuḥ | 34 |

yauvana.utsekāt para.strīṣu manaḥ kurvāṇam āryā.vyañjanābhiḥ strībhir amedhyābhiḥ śūnya.āgāreṣu rātrāv udvejayeyuḥ | 35 |

madya.kāmaṃ yoga.pānena-udvejayeyuḥ | 36 |

dyūta.kāmaṃ kāpaṭikair udvejayeyuḥ | 37 |

mṛgayā.kāmaṃ pratirodhaka.vyañjanais trāsayeyuḥ | 38 |

pitari vikrama.buddhiṃ "tathā" ity anupraviśya bhedayeyuḥ - "aprārthanīyo rājā, vipanne ghātaḥ, sampanne naraka.pātaḥ, saṅkrośaḥ, prajābhir eka.loṣṭa.vadhaś ca" iti | 39 |

virāgaṃ vedayeyuḥ | 40 |

priyam eka.putraṃ badhnīyāt | 41 |

bahu.putraḥ pratyantam anya.viṣayaṃ vā preṣayed yatra garbhaḥ paṇyaṃ ḍimbo vā na bhavet | 42 |

ātma.sampannaṃ saināpatye yauvarājye vā sthāpayet | 43 |

buddhimān.āhārya.buddhir durbuddhir iti putra.viśeṣāḥ | 44 |

śiṣyamāṇo dharma.arthāv upalabhate ca-anutiṣṭhati ca buddhimān | 45 |

upalabhamāno na-anutiṣṭhaty āhārya.buddhiḥ | 46 |

apāya.nityo dharma.artha.dveṣī ca-iti durbuddhiḥ | 47 |

sa yady eka.putraḥ putra.utpattāv asya prayateta | 48 |

putrikā.putrān utpādayed vā | 49 |

vṛddhas tu vyādhito vā rājā mātṛ.bandhu.kulya.guṇavat.sāmantānām anyatamena kṣetre bījam utpādayet | 50 |

na ca-eka.putram avinītaṃ rājye sthāpayet | 51 |