Book 1 · Adhyay 13

kṛta.mahā.mātra.apasarpaḥ paura.jānapadān apasarpayet | 1 |

sattriṇo dvandvinas tīrtha.sabhā.pūga.jana.samavāyeṣu vivādaṃ kuryuḥ | 2 |

"sarva.guṇa.sampannaś ca-ayaṃ rājā śrūyate, na ca-asya kaścid guṇo dṛśyate yaḥ paura.jānapadān daṇḍa.karābhyāṃ pīḍayati" iti | 3 |

tatra ye 'nupraśaṃseyus tān itaras taṃ ca pratiṣedhayet | 4 |

" mātsya.nyāya.abhibhūtāḥ prajā manuṃ vaivasvataṃ rājānaṃ cakrire | 5 |

dhānya.ṣaḍ.bhāgaṃ paṇya.daśa.bhāgaṃ hiraṇyaṃ ca-asya bhāga.dheyaṃ prakalpayām-āsuḥ | 6 |

tena bhṛtā rājānaḥ prajānāṃ yoga.kṣema.āvahāḥ | 7 |

teṣāṃ kilbiṣam adaṇḍa.karā haranty ayoga.kṣema.āvahāś ca prajānām | 8 |

tasmād uñcha.ṣaḍ.bhāgam āraṇyakā-api nirvapanti - "tasya-etad bhāga.dheyaṃ yo 'smān gopāyati" iti | 9 |

indra.yama.sthānam etad rājānaḥ pratyakṣa.heḍa.prasādāḥ | 10 |

tān avamanyamānān daivo 'pi daṇḍaḥ spṛśati | 11 |

tasmād rājāno na-avamantavyāḥ | 12 |

ity evaṃ kṣudrakān pratiṣedhayet | 13 |

kiṃ.vadantīṃ ca vidyuḥ | 14 |

ye ca-asya dhānya.paśu.hiraṇyāny ājīvanti, tair upakurvanti vyasane 'bhyudaye vā, kupitaṃ bandhuṃ rāṣṭraṃ vā vyāvartayanti, amitram āṭavikaṃ vā pratiṣedhayanti, teṣāṃ muṇḍa.jaṭila.vyañjanās tuṣṭa.atuṣṭatvaṃ vidyuḥ | 15 |

tuṣṭān bhūyo 'rtha.mānābhyāṃ pūjayet | 16 |

atuṣṭāṃs tuṣṭi.hetos tyāgena sāmnā ca prasādayet | 17 |

parasparād vā bhedayed enān, sāmanta.āṭavika.tat.kulīna.aparuddhebhyaś ca | 18 |

tathā-apy atuṣyato daṇḍa.kara.sādhana.adhikāreṇa janapada.vidveṣaṃ grāhayet | 19 |

viviṣṭān upāṃśu.daṇḍena janapada.kopena vā sādhayet | 20 |

gupta.putra.dārān ākara.karma.anteṣu vā vāsayet pareṣām āspada.bhayāt | 21 |

kruddha.lubdha.bhīta.māninas tu pareṣāṃ kṛtyāḥ | 22 |

teṣāṃ kārtāntika.naimittika.mauhūrtika.vyañjanāḥ paraspara.abhisambandham amitra.āṭavika.sambandhaṃ vā vidyuḥ | 23 |

tuṣṭān artha.mānābhyāṃ pūjayet | 24 |

atuṣṭān sāma.dāna.bheda.daṇḍaiḥ sādhayet | 25 |