Book 1 · Adhyay 11

upadhābhiḥ śuddha.amātya.vargo gūḍha.puruṣān utpādayet kāpaṭika.udāsthita.gṛha.patika.vaidehaka.tāpasa.vyañjanān sattri.tīṣkṇa.rasada.bhikṣukīś ca | 1 |

para.marmajñaḥ pragalbhaś chātraḥ kāpaṭikaḥ | 2 |

tam artha.mānābhyāṃ protsāhya mantrī brūyāt - "rājānaṃ māṃ ca pramāṇaṃ kṛtvā yasya yad akuśalaṃ paśyasi tat tadānīm eva pratyādiśa" iti | 3 |

pravrajyā pratyavasitaḥ prajñā.śauca.yukta udāsthitaḥ | 4 |

sa vārttā.karma.pradiṣṭāyāṃ bhūmau prabhūta.hiraṇya.antevāsī karma kārayet | 5 |

karma.phalāc ca sarva.pravrajitānāṃ grāsa.ācchādana.āvasathān pratividadhyāt | 6 |

vṛtti.kāmāṃś ca-upajapet - "etena-eva veṣeṇa rāja.arthaś caritavyo bhakta.vetana.kāle ca-upasthātavyam" iti | 7 |

sarva.pravrajitāś ca svaṃ svaṃ vargam evam upajapeyuḥ | 8 |

karṣako vṛtti.kṣīṇaḥ prajñā.śauca.yukto gṛha.patika.vyañjanaḥ | 9 |

sa kṛṣi.karma.pradiṣṭāyāṃ bhūmau - iti samānaṃ pūrveṇa | 10 |

vāṇijako vṛtti.kṣīṇaḥ prajñā.śauca.yukto vaidehaka.vyañjanaḥ | 11 |

sa vaṇik.karma.pradiṣṭāyāṃ bhūmau - iti samānaṃ pūrveṇa | 12 |

muṇḍo jaṭilo vā vṛtti.kāmas tāpasa.vyañjanaḥ | 13 |

sa nagara.abhyāśe prabhūta.muṇḍa.jaṭila.antevāsī śākaṃ yava.muṣṭiṃ vā māsa.dvimāsa.antaraṃ prakāśam aśnīyāt, gūḍham iṣṭam āhāram | 14 |

vaidehaka.antevāsinaś ca-enaṃ samiddha.yogair arcayeyuḥ | 15 |

śiṣyāś ca-asya-āvedayeyuḥ - "asau siddhaḥ sāmedhikaḥ" iti | 16 |

samedha.āśāstibhiś ca-abhigatānām aṅga.vidyayā śiṣya.sañjñābhiś ca karmāṇy abhijane avasitāny ādiśet - alpa.lābham agni.dāhaṃ cora.bhayaṃ dūṣya.vadhaṃ tuṣṭi.dānaṃ videśa.pravṛtti.jñānam, "idam adya śvo vā bhaviṣyati, idaṃ vā rājā kariṣyati" iti | 17 |

tad asya gūḍhāḥ sattriṇaś ca sampādayeyuḥ | 18 |

sattva.prajñā.vākya.śakti.sampannānāṃ rāja.bhāgyam anuvyāharet, mantri.samyogaṃ ca brūyāt | 19 |

mantrī ca-eṣāṃ vṛtti.karmabhyāṃ viyateta | 20 |

ye ca kāraṇād abhikruddhās tān artha.mānābhyāṃ śamayet, akāraṇa.kruddhāṃs tūṣṇīṃ daṇḍena, rāja.dviṣṭa.kāriṇaś ca | 21 |