Book 1 · Adhyay 10

mantri.purohita.sakhaḥ sāmānyeṣv adhikaraṇeṣu sthāpayitvā-amātyān upadhābhiḥ śodhayet | 1 |

purohitam ayājya.yājana.adhyāpane niyuktam amṛṣyamāṇaṃ rājā-avakṣipet | 2 |

sa sattribhiḥ śapatha.pūrvam ekaikam amātyam upajāpayet - "adhārmiko ayaṃ rājā, sādhu dhārmikam anyam asya tat.kulīnam aparuddhaṃ kulyam eka.pragrahaṃ sāmantam āṭavikam aupapādikaṃ vā pratipādayāmaḥ, sarveṣām etad rocate, kathaṃ vā tava" iti | 3 |

pratyākhyāne śuciḥ | iti dharma.upadhā | 4 |

senā.patir asat.pragraheṇa-avakṣiptaḥ sattribhir ekaikam amātyam upajāpayet lobhanīyena-arthena rāja.vināśāya, "sarveṣām etad rocate, kathaṃ vā tava" iti | 5 |

pratyākhyāne śuciḥ | ity artha.upadhā | 6 |

parivrājikā labdha.viśvāsā-antaḥpure kṛta.satkārā mahā.mātram ekaikam upajapet - "rāja.mahiṣī tvāṃ kāmayate kṛta.samāgama.upāyā, mahān arthaś ca te bhaviṣyati" iti | 7 |

pratyākhyāne śuciḥ | iti kāma.upadhā | 8 |

prahavaṇa.nimittam eko amātyaḥ sarvān amātyān āvāhayet | 9 |

tena-udvegena rājā tān avarundhyāt | 10 |

kāpaṭikaś ca-atra pūrva.avaruddhas teṣām artha.māna.avakṣiptam ekaikam amātyam upajapet - "asat pravṛtto ayaṃ rājā, sādhv enaṃ hatvā-anyaṃ pratipādayāmaḥ, sarveṣām etad rocate, kathaṃ vā tava" iti | 11 |

pratyākhyāne śuciḥ | iti bhaya.upadhā | 12 |

tatra dharma.upadhā.śuddhān dharma.sthīya.kaṇṭaka.śodhaneṣu karmasu sthāpayet, artha.upadhā.śuddhān samāhartṛ.samnidhātṛ.nicaya.karmasu, kāma.upadhā śuddhān bāhya.ābhyantara.vihāra.rakṣāsu, bhaya.upadhā.śuddhān āsanna.kāryeṣu rājñaḥ | 13 |

sarva.upadhā.śuddhān mantriṇaḥ kuryāt | 14 |

sarvatra-aśucīn khani.dravya.hasti.vana.karma.anteṣu upayojayet | 15 |