EeseDharmaSanātana Library
8काण्ड 8 · सूक्त 8
Atharvaveda Śaunaka Kand 8, Sukta 8.
24 shlokइन्द्रो॑ मन्थतु॒ मन्थि॑ता श॒क्रः शूरः॑ पुरंद॒रः ।
यथा॒ हना॑म॒ सेना॑ अ॒मित्रा॑णां सहस्र॒शः ॥१॥
indro॑ manthatu॒ manthi॑tā śa॒kraḥ śūraḥ॑ puraṃda॒raḥ | yathā॒ hanā॑ma॒ senā॑ a॒mitrā॑ṇāṃ sahasra॒śaḥ || १ ||
पू॒ति॒रज्जुरु॑प॒ध्मानी॒ पूतिं॒ सेनां॑ कृणोत्व॒मूम्।
धू॒मम॒ग्निं प॑रा॒दृश्या॒मित्रा॑ हृ॒त्स्वा द॑धतां भ॒यम् ॥२॥
pū॒ti॒rajjuru॑pa॒dhmānī॒ pūtiṃ॒ senāṃ॑ kṛṇotva॒mūm | dhū॒mama॒gniṃ pa॑rā॒dṛśyā॒mitrā॑ hṛ॒tsvā da॑dhatāṃ bha॒yam || २ ||
अ॒मून॑श्वत्थ॒ निः शृ॑णीहि॒ खादा॒मून् ख॑दिराजि॒रम्।
ता॒जद्भङ्ग॑ इव भजन्तां॒ हन्त्वे॑नान् वध॑को व॒धैः ॥३॥
a॒mūna॑śvattha॒ niḥ śṛ॑ṇīhi॒ khādā॒mūn kha॑dirāji॒ram | tā॒jadbhaṅga॑ iva bhajantāṃ॒ hantve॑nān vadha॑ko va॒dhaiḥ || ३ ||
प॒रु॒षान॒मून् प॑रुषा॒ह्वः कृ॑णोतु॒ हन्त्वे॑ना॒न् वध॑को व॒धैः ।
क्षि॒प्रं श॒र इ॑व भजन्तां बृहज्जा॒लेन॒ संदि॑ताः ॥४॥
pa॒ru॒ṣāna॒mūn pa॑ruṣā॒hvaḥ kṛ॑ṇotu॒ hantve॑nā॒n vadha॑ko va॒dhaiḥ | kṣi॒praṃ śa॒ra i॑va bhajantāṃ bṛhajjā॒lena॒ saṃdi॑tāḥ || ४ ||
अ॒न्तरि॑क्षं॒ जाल॑मासीज्जालद॒ण्डा दिशो॑ म॒हीः ।
तेना॑भि॒धाय॒ दस्यू॑नां श॒क्रः सेना॒मपा॑वपत् ॥५॥
a॒ntari॑kṣaṃ॒ jāla॑māsījjālada॒ṇḍā diśo॑ ma॒hīḥ | tenā॑bhi॒dhāya॒ dasyū॑nāṃ śa॒kraḥ senā॒mapā॑vapat || ५ ||
बृ॒हद्धि जालं॑ बृह॒तः श॒क्रस्य॑ वा॒जिनी॑वतः ।
तेन॒ शत्रू॑न॒भि सर्वा॒न् न्युऽब्ज॒ यथा॒ न मुच्या॑तै कत॒मश्च॒नैषा॑म् ॥६॥
bṛ॒haddhi jālaṃ॑ bṛha॒taḥ śa॒krasya॑ vā॒jinī॑vataḥ | tena॒ śatrū॑na॒bhi sarvā॒n nyu’bja॒ yathā॒ na mucyā॑tai kata॒maśca॒naiṣā॑m || ६ ||
बृ॒हत् ते॒ जालं॑ बृह॒त इ॑न्द्र शूर सहस्रा॒र्घस्य॑ श॒तवी॑र्यस्य ।
तेन॑ श॒तं स॒हस्र॑म॒युतं॒ न्यऽर्बुदं ज॒घान॑ श॒क्रो दस्यू॑नामभि॒धाय॒ सेन॑या ॥७॥
bṛ॒hat te॒ jālaṃ॑ bṛha॒ta i॑ndra śūra sahasrā॒rghasya॑ śa॒tavī॑ryasya | tena॑ śa॒taṃ sa॒hasra॑ma॒yutaṃ॒ nya’rbudaṃ ja॒ghāna॑ śa॒kro dasyū॑nāmabhi॒dhāya॒ sena॑yā || ७ ||
अ॒यं लो॒को जाल॑मासीच्छ॒क्रस्य॑ मह॒तो म॒हान्।
तेना॒हमि॑न्द्रजा॒लेना॒मूंस्तम॑सा॒भि द॑धामि॒ सर्वा॑न् ॥८॥
a॒yaṃ lo॒ko jāla॑māsīccha॒krasya॑ maha॒to ma॒hān | tenā॒hami॑ndrajā॒lenā॒mūṃstama॑sā॒bhi da॑dhāmi॒ sarvā॑n || ८ ||
से॒दिरु॒ग्रा व्यृऽद्धि॒रार्ति॑श्चानपवाच॒ना।
श्रम॑स्त॒न्द्रीश्च॒ मोह॑श्च॒ तैर॒मून॒भि द॑धामि॒ सर्वा॑न् ॥९॥
se॒diru॒grā vyṛ’ddhi॒rārti॑ścānapavāca॒nā | śrama॑sta॒ndrīśca॒ moha॑śca॒ taira॒mūna॒bhi da॑dhāmi॒ sarvā॑n || ९ ||
मृ॒त्यवे॒ऽमून् प्र य॑च्छामि मृत्युपा॒शैर॒मी सि॒ताः ।
मृ॒त्योर्ये अ॑घ॒ला दू॒तास्तेभ्य॑ एना॒न् प्रति॑ नयामि ब॒द्ध्वा ॥१०॥
mṛ॒tyave॒’mūn pra ya॑cchāmi mṛtyupā॒śaira॒mī si॒tāḥ | mṛ॒tyorye a॑gha॒lā dū॒tāstebhya॑ enā॒n prati॑ nayāmi ba॒ddhvā || १० ||
नय॑ता॒मून् मृ॑त्युदूता॒ यम॑दूता॒ अपो॑म्भत ।
प॒रः॒स॒ह॒स्रा ह॑न्यन्तां तृ॒णेढ्वे॑नान् म॒त्यं भ॒वस्य॑ ॥११॥
naya॑tā॒mūn mṛ॑tyudūtā॒ yama॑dūtā॒ apo॑mbhata | pa॒raḥ॒sa॒ha॒srā ha॑nyantāṃ tṛ॒ṇeḍhve॑nān ma॒tyaṃ bha॒vasya॑ || ११ ||
सा॒ध्या एकं॑ जालद॒ण्डमु॒द्यत्य॑ य॒न्त्योज॑सा ।
रु॒द्रा एकं॒ वस॑व॒ एक॑मादि॒त्यैरेक॒ उद्य॑तः ॥१२॥
sā॒dhyā ekaṃ॑ jālada॒ṇḍamu॒dyatya॑ ya॒ntyoja॑sā | ru॒drā ekaṃ॒ vasa॑va॒ eka॑mādi॒tyaireka॒ udya॑taḥ || १२ ||
विश्वे॑ दे॒वाः उ॒परि॑ष्टादु॒ब्जन्तो॑ य॒न्त्वोज॑सा ।
मध्ये॑न॒ घ्नन्तो॑ यन्तु॒ सेना॒मङ्गि॑रसो म॒हीम् ॥१३॥
viśve॑ de॒vāḥ u॒pari॑ṣṭādu॒bjanto॑ ya॒ntvoja॑sā | madhye॑na॒ ghnanto॑ yantu॒ senā॒maṅgi॑raso ma॒hīm || १३ ||
वन॒स्पती॑न् वानस्प॒त्यानोष॑धीरु॒त वी॒रुधः॑ ।
द्वि॒पाच्चतु॑ष्पादिष्णामि॒ यथा॒ सेना॑म॒मूं हन॑न् ॥१४॥
vana॒spatī॑n vānaspa॒tyānoṣa॑dhīru॒ta vī॒rudhaḥ॑ | dvi॒pāccatu॑ṣpādiṣṇāmi॒ yathā॒ senā॑ma॒mūṃ hana॑n || १४ ||
ग॒न्ध॒र्वा॒प्स॒रसः॑ स॒र्पान् दे॒वान् पु॑ण्यज॒नान् पितॄ॒न्।
दृ॒ष्टान॒दृष्टा॑निष्णामि॒ यथा॒ सेना॑म॒मूं हन॑न् ॥१५॥
ga॒ndha॒rvā॒psa॒rasaḥ॑ sa॒rpān de॒vān pu॑ṇyaja॒nān pitṝ॒n | dṛ॒ṣṭāna॒dṛṣṭā॑niṣṇāmi॒ yathā॒ senā॑ma॒mūṃ hana॑n || १५ ||
इ॒म उ॒प्ता मृ॑त्युपा॒शा याना॒क्रम्य॒ न मु॒च्यसे॑ ।
अ॒मुष्या॑ हन्तु॒ सेना॑या इ॒दं कूटं॑ सहस्र॒शः ॥१६॥
i॒ma u॒ptā mṛ॑tyupā॒śā yānā॒kramya॒ na mu॒cyase॑ | a॒muṣyā॑ hantu॒ senā॑yā i॒daṃ kūṭaṃ॑ sahasra॒śaḥ || १६ ||
घ॒र्मः समि॑द्धो अ॒ग्निना॒यं होमः॑ सहस्र॒हः ।
भ॒वश्च॒ पृश्नि॑बाहुश्च॒ शर्व॒ सेना॑म॒मूं ह॑तम् ॥१७॥
gha॒rmaḥ sami॑ddho a॒gninā॒yaṃ homaḥ॑ sahasra॒haḥ | bha॒vaśca॒ pṛśni॑bāhuśca॒ śarva॒ senā॑ma॒mūṃ ha॑tam || १७ ||
मृ॒त्योराष॒मा प॑द्यन्तां॒ क्षुधं॑ से॒दिं व॒धं भ॒यम्।
इन्द्र॑श्चाक्षुजा॒लाभ्यां॒ शर्व॒ सेना॑म॒मूं ह॑तम् ॥१८॥
mṛ॒tyorāṣa॒mā pa॑dyantāṃ॒ kṣudhaṃ॑ se॒diṃ va॒dhaṃ bha॒yam | indra॑ścākṣujā॒lābhyāṃ॒ śarva॒ senā॑ma॒mūṃ ha॑tam || १८ ||
परा॑जिताः॒ प्र त्र॑सतामित्रा नु॒त्ता धा॑वत॒ ब्रह्म॑णा ।
बृह॒स्पति॑प्रनुत्तानां॒ मामीषां॑ मोचि कश्चन ॥१९॥
parā॑jitāḥ॒ pra tra॑satāmitrā nu॒ttā dhā॑vata॒ brahma॑ṇā | bṛha॒spati॑pranuttānāṃ॒ māmīṣāṃ॑ moci kaścana || १९ ||
अव॑ पद्यन्तामेषा॒मायु॑धानि॒ मा श॑कन् प्रति॒धामिषु॑म्।
अथै॑षां ब॒हु बिभ्य॑ता॒मिष॑वः घ्नन्तु॒ मर्म॑णि ॥२०॥
ava॑ padyantāmeṣā॒māyu॑dhāni॒ mā śa॑kan prati॒dhāmiṣu॑m | athai॑ṣāṃ ba॒hu bibhya॑tā॒miṣa॑vaḥ ghnantu॒ marma॑ṇi || २० ||
सं क्रो॑शतामेना॒न् द्यावा॑पृथि॒वी सम॒न्तरि॑क्षं स॒ह दे॒वता॑भिः ।
मा ज्ञा॒तारं॒ मा प्र॑ति॒ष्ठां वि॑दन्त मि॒थो वि॑घ्ना॒ना उप॑ यन्तु मृ॒त्युम् ॥२१॥
saṃ kro॑śatāmenā॒n dyāvā॑pṛthi॒vī sama॒ntari॑kṣaṃ sa॒ha de॒vatā॑bhiḥ | mā jñā॒tāraṃ॒ mā pra॑ti॒ṣṭhāṃ vi॑danta mi॒tho vi॑ghnā॒nā upa॑ yantu mṛ॒tyum || २१ ||
दिश॒श्चत॑स्रोऽश्वत॒र्यो देवर॒थस्य॑ पुरो॒डाशाः॑ श॒फा अन्तरि॑क्षमु॒द्धिः ।
द्यावा॑पृथि॒वी पक्ष॑सी ऋ॒तवो॒ऽभीश॑वोऽन्तर्दे॒शाः किं॑क॒रा वाक् परि॑रथ्यम् ॥२२॥
diśa॒ścata॑sro’śvata॒ryo devara॒thasya॑ puro॒ḍāśāḥ॑ śa॒phā antari॑kṣamu॒ddhiḥ | dyāvā॑pṛthi॒vī pakṣa॑sī ṛ॒tavo॒’bhīśa॑vo’ntarde॒śāḥ kiṃ॑ka॒rā vāk pari॑rathyam || २२ ||
सं॒व॒त्स॒रो रथः॑ परिवत्स॒रो र॑थोप॒स्थो वि॒राडी॒षाग्नी र॑थमु॒खम्।
इन्द्रः॑ सव्य॒ष्ठाश्च॒न्द्रमाः॒ सार॑थिः ॥२३॥
saṃ॒va॒tsa॒ro rathaḥ॑ parivatsa॒ro ra॑thopa॒stho vi॒rāḍī॒ṣāgnī ra॑thamu॒kham | indraḥ॑ savya॒ṣṭhāśca॒ndramāḥ॒ sāra॑thiḥ || २३ ||
इ॒तो ज॑ये॒तो वि ज॑य॒ सं ज॑य॒ जय॒ स्वाहा॑ ।
इ॒मे ज॑यन्तु॒ परा॒मी ज॑यन्तां॒ स्वाहै॒भ्यो दु॒राहा॒मीभ्यः॑ ।
नी॒ल॒लो॒हि॒तेना॒मून॒भ्यव॑तनोमि ॥२४॥
i॒to ja॑ye॒to vi ja॑ya॒ saṃ ja॑ya॒ jaya॒ svāhā॑ | i॒me ja॑yantu॒ parā॒mī ja॑yantāṃ॒ svāhai॒bhyo du॒rāhā॒mībhyaḥ॑ | nī॒la॒lo॒hi॒tenā॒mūna॒bhyava॑tanomi || २४ ||