EeseDharmaSanātana Library
97काण्ड 7 · सूक्त 97
Atharvaveda Śaunaka Kand 7, Sukta 97.
8 shlok७ त्रिपदा साम्नी भुरिग्जगती, ८ उपरिष्टाद्बृहती।
यद॒द्य त्वा॑ प्रय॒ति य॒ज्ञे अ॒स्मिन् होत॑श्चिकित्व॒न्नवृ॑णीमही॒ह।
ध्रु॒वम॑यो ध्रु॒वमु॒ता श॑विष्ठ प्रवि॒द्वान् य॒ज्ञमुप॑ याहि॒ सोम॑म् ॥१॥
७ tripadā sāmnī bhurigjagatī, ८ upariṣṭādbṛhatī | yada॒dya tvā॑ praya॒ti ya॒jñe a॒smin hota॑ścikitva॒nnavṛ॑ṇīmahī॒ha | dhru॒vama॑yo dhru॒vamu॒tā śa॑viṣṭha pravi॒dvān ya॒jñamupa॑ yāhi॒ soma॑m || १ ||
समि॑न्द्र नो॒ मन॑सा नेष॒ गोभिः॒ सं सू॒रिभि॑र्हरिव॒न्त्सं स्व॒स्त्या।
सं ब्रह्म॑णा दे॒वहि॑तं॒ यदस्ति॒ सं दे॒वानां॑ सुम॒तौ य॒ज्ञिया॑नाम् ॥२॥
sami॑ndra no॒ mana॑sā neṣa॒ gobhiḥ॒ saṃ sū॒ribhi॑rhariva॒ntsaṃ sva॒styā | saṃ brahma॑ṇā de॒vahi॑taṃ॒ yadasti॒ saṃ de॒vānāṃ॑ suma॒tau ya॒jñiyā॑nām || २ ||
यानाव॑ह उश॒तो दे॑व दे॒वांस्तान् प्रेर॑य॒ स्वे अ॑ग्ने स॒धस्थे॑ ।
ज॒क्षि॒वांसः॑ पपि॒वांसो॒ मधू॑न्य॒स्मै ध॑त्त वसवो॒ वसू॑नि ॥३॥
yānāva॑ha uśa॒to de॑va de॒vāṃstān prera॑ya॒ sve a॑gne sa॒dhasthe॑ | ja॒kṣi॒vāṃsaḥ॑ papi॒vāṃso॒ madhū॑nya॒smai dha॑tta vasavo॒ vasū॑ni || ३ ||
सु॒गा वो॑ देवाः॒ सद॑ना अकर्म॒ य आ॑ज॒ग्म सव॑ने मा जुषा॒णाः ।
वह॑माना॒ भर॑माणाः॒ स्वा वसू॑नि॒ वसुं॑ घ॒र्मं दिव॒मा रो॑ह॒तानु॑ ॥४॥
su॒gā vo॑ devāḥ॒ sada॑nā akarma॒ ya ā॑ja॒gma sava॑ne mā juṣā॒ṇāḥ | vaha॑mānā॒ bhara॑māṇāḥ॒ svā vasū॑ni॒ vasuṃ॑ gha॒rmaṃ diva॒mā ro॑ha॒tānu॑ || ४ ||
यज्ञ॑ य॒ज्ञं ग॑च्छ य॒ज्ञप॑तिं गच्छ ।
स्वां योनिं॑ गच्छ॒ स्वाहा॑ ॥५॥
yajña॑ ya॒jñaṃ ga॑ccha ya॒jñapa॑tiṃ gaccha | svāṃ yoniṃ॑ gaccha॒ svāhā॑ || ५ ||
ए॒ष ते॑ य॒ज्ञो य॑ज्ञपते स॒हसू॑क्तवाकः ।
सु॒वीर्यः॒ स्वाहा॑ ॥६॥
e॒ṣa te॑ ya॒jño ya॑jñapate sa॒hasū॑ktavākaḥ | su॒vīryaḥ॒ svāhā॑ || ६ ||
वष॑ड् ढु॒तेभ्यो॒ वष॒डहु॑तेभ्यः ।
देवा॑ गातुविदो गा॒तुं वि॒त्त्वा गा॒तुमि॑त ॥७॥
vaṣa॑ḍ ḍhu॒tebhyo॒ vaṣa॒ḍahu॑tebhyaḥ | devā॑ gātuvido gā॒tuṃ vi॒ttvā gā॒tumi॑ta || ७ ||
मन॑सस्पत इ॒मं नो॑ दि॒वि दे॒वेषु॑ य॒ज्ञम्।
स्वाहा॑ दि॒वि स्वाहा॑ पृथि॒व्यां स्वाहा॒न्तरि॑क्षे॒ स्वाहा॒ वाते॑ धां॒ स्वाहा॑ ॥८॥
mana॑saspata i॒maṃ no॑ di॒vi de॒veṣu॑ ya॒jñam | svāhā॑ di॒vi svāhā॑ pṛthi॒vyāṃ svāhā॒ntari॑kṣe॒ svāhā॒ vāte॑ dhāṃ॒ svāhā॑ || ८ ||