EeseDharmaSanātana Library
82काण्ड 7 · सूक्त 82
Atharvaveda Śaunaka Kand 7, Sukta 82.
6 shlokअ॒भ्यऽर्चत सुष्टु॒तिं गव्य॑मा॒जिम॒स्मासु॑ भ॒द्रा द्रवि॑णानि धत्त ।
इ॒मं य॒ज्ञं न॑यत दे॒वता॑ नो घृ॒तस्य॒ धारा॒ मधु॑मत् पवन्ताम् ॥१॥
a॒bhya’rcata suṣṭu॒tiṃ gavya॑mā॒jima॒smāsu॑ bha॒drā dravi॑ṇāni dhatta | i॒maṃ ya॒jñaṃ na॑yata de॒vatā॑ no ghṛ॒tasya॒ dhārā॒ madhu॑mat pavantām || १ ||
मय्यग्रे॑ अ॒ग्निं गृ॑ह्णामि स॒ह क्ष॒त्रेण॒ वर्च॑सा॒ बले॑न ।
मयि॑ प्र॒जां मय्यायु॑र्दधामि॒ स्वाहा॒ मय्य॒ग्निम् ॥२॥
mayyagre॑ a॒gniṃ gṛ॑hṇāmi sa॒ha kṣa॒treṇa॒ varca॑sā॒ bale॑na | mayi॑ pra॒jāṃ mayyāyu॑rdadhāmi॒ svāhā॒ mayya॒gnim || २ ||
इ॒हैवाग्ने॒ अधि॑ धारया र॒यिं मा त्वा॒ नि क्र॒न् पूर्व॑चित्ता निका॒रिणः॑ ।
क्ष॒त्रेणा॑ग्ने सु॒यम॑मस्तु॒ तुभ्य॑मुपस॒त्ता व॑र्धतां ते॒ अनि॑ष्टृतः ॥३॥
i॒haivāgne॒ adhi॑ dhārayā ra॒yiṃ mā tvā॒ ni kra॒n pūrva॑cittā nikā॒riṇaḥ॑ | kṣa॒treṇā॑gne su॒yama॑mastu॒ tubhya॑mupasa॒ttā va॑rdhatāṃ te॒ ani॑ṣṭṛtaḥ || ३ ||
अन्व॒ग्निरु॒षसा॒मग्र॑मख्य॒दन्वहा॑नि प्रथ॒मो जा॒तवे॑दाः ।
अनु॒ सूर्य॑ उ॒षसो॒ अनु॑ र॒श्मीननु॒ द्यावा॑पृथि॒वी आ वि॑वेश ॥४॥
anva॒gniru॒ṣasā॒magra॑makhya॒danvahā॑ni pratha॒mo jā॒tave॑dāḥ | anu॒ sūrya॑ u॒ṣaso॒ anu॑ ra॒śmīnanu॒ dyāvā॑pṛthi॒vī ā vi॑veśa || ४ ||
प्रत्य॒ग्निरु॒षसा॒मग्र॑मख्य॒त् प्रत्यहा॑नि प्रथ॒मो जा॒तवे॑दाः ।
प्रति॒ सूर्य॑स्य पुरु॒धा च॑ र॒श्मीन् प्रति॒ द्यावा॑पृथि॒वी आ त॑तान ॥५॥
pratya॒gniru॒ṣasā॒magra॑makhya॒t pratyahā॑ni pratha॒mo jā॒tave॑dāḥ | prati॒ sūrya॑sya puru॒dhā ca॑ ra॒śmīn prati॒ dyāvā॑pṛthi॒vī ā ta॑tāna || ५ ||
घृ॒तं ते॑ अग्ने दि॒व्ये स॒धस्थे॑ घृ॒तेन॒ त्वां मनु॑र॒द्या समि॑न्धे ।
घृ॒तं ते॑ दे॒वीर्न॒प्त्य॑१आ व॑हन्तु घृ॒तं तुभ्यं॑ दुह्रतां॒ गावो॑ अग्ने ॥६॥
ghṛ॒taṃ te॑ agne di॒vye sa॒dhasthe॑ ghṛ॒tena॒ tvāṃ manu॑ra॒dyā sami॑ndhe | ghṛ॒taṃ te॑ de॒vīrna॒ptya॑१ā va॑hantu ghṛ॒taṃ tubhyaṃ॑ duhratāṃ॒ gāvo॑ agne || ६ ||