EeseDharmaSanātana Library
81काण्ड 7 · सूक्त 81
Atharvaveda Śaunaka Kand 7, Sukta 81.
6 shlokपू॒र्वा॒प॒रं च॑रतो मा॒ययै॒तौ शिशू॒ क्रीड॑न्तौ॒ परि॑ यातोऽर्ण॒वम्।
विश्वा॒न्यो भुव॑ना वि॒चष्ट॑ ऋ॒तूँर॒न्यो वि॒दध॑ज्जायसे॒ नवः॑ ॥१॥
pū॒rvā॒pa॒raṃ ca॑rato mā॒yayai॒tau śiśū॒ krīḍa॑ntau॒ pari॑ yāto’rṇa॒vam | viśvā॒nyo bhuva॑nā vi॒caṣṭa॑ ṛ॒tūm̐ra॒nyo vi॒dadha॑jjāyase॒ navaḥ॑ || १ ||
नवो॑नवो भवसि॒ जाय॑मा॒नोऽह्नां॑ के॒तुरु॒षसा॑मे॒ष्यग्र॑म्।
भा॒गं दे॒वेभ्यो॒ वि द॑धास्या॒यन् प्र च॑न्द्रमस्तिरसे दी॒र्घमायुः॑ ॥२॥
navo॑navo bhavasi॒ jāya॑mā॒no’hnāṃ॑ ke॒turu॒ṣasā॑me॒ṣyagra॑m | bhā॒gaṃ de॒vebhyo॒ vi da॑dhāsyā॒yan pra ca॑ndramastirase dī॒rghamāyuḥ॑ || २ ||
सोम॑स्यांशो युधां प॒तेऽनू॑नो॒ नाम॒ वा अ॑सि ।
अनू॑नं दर्श मा कृधि प्र॒जया॑ च॒ धने॑न च ॥३॥
soma॑syāṃśo yudhāṃ pa॒te’nū॑no॒ nāma॒ vā a॑si | anū॑naṃ darśa mā kṛdhi pra॒jayā॑ ca॒ dhane॑na ca || ३ ||
द॒र्शोऽसि दर्श॒तोऽसि॒ सम॑ग्रोऽसि॒ सम॑न्तः ।
सम॑ग्रः॒ सम॑न्तो भूयासं॒ गोभि॒रश्वैः॑ प्र॒जया॑ प॒शुभि॑र्गृहैर्धने॑न ॥४॥
da॒rśo’si darśa॒to’si॒ sama॑gro’si॒ sama॑ntaḥ | sama॑graḥ॒ sama॑nto bhūyāsaṃ॒ gobhi॒raśvaiḥ॑ pra॒jayā॑ pa॒śubhi॑rgṛhairdhane॑na || ४ ||
यो॒३ऽस्मान् द्वेष्टि॒ यं व॒यं द्वि॒ष्मस्तस्य॒ त्वं प्रा॒णेना प्या॑यस्व ।
आ व॒यं प्या॑सिषीमहि॒ गोभि॒रश्वैः॑ प्र॒जया॑ प॒शुभि॑र्गृ॒हैर्धने॑न ॥५॥
yo॒३’smān dveṣṭi॒ yaṃ va॒yaṃ dvi॒ṣmastasya॒ tvaṃ prā॒ṇenā pyā॑yasva | ā va॒yaṃ pyā॑siṣīmahi॒ gobhi॒raśvaiḥ॑ pra॒jayā॑ pa॒śubhi॑rgṛ॒hairdhane॑na || ५ ||
यं दे॒वा अं॒शुमा॑प्या॒यय॑न्ति॒ यमक्षि॑त॒मक्षि॑ता भ॒क्षय॑न्ति ।
तेना॒स्मानिन्द्रो॒ वरु॑णो॒ बृह॒स्पति॒रा प्या॑ययन्तु॒ भुव॑नस्य गो॒पाः ॥६॥
yaṃ de॒vā aṃ॒śumā॑pyā॒yaya॑nti॒ yamakṣi॑ta॒makṣi॑tā bha॒kṣaya॑nti | tenā॒smānindro॒ varu॑ṇo॒ bṛha॒spati॒rā pyā॑yayantu॒ bhuva॑nasya go॒pāḥ || ६ ||