EeseDharmaSanātana Library
79काण्ड 7 · सूक्त 79
Atharvaveda Śaunaka Kand 7, Sukta 79.
4 shlokयत् ते॑ दे॒वा अकृ॑ण्वन् भाग॒धेय॒ममा॑वास्ये सं॒वस॑न्तो महि॒त्वा।
तेना॑ नो य॒ज्ञं पि॑पृहि विश्ववारे र॒यिं नो॑ धेहि सुभगे सु॒वीर॑म् ॥१॥
yat te॑ de॒vā akṛ॑ṇvan bhāga॒dheya॒mamā॑vāsye saṃ॒vasa॑nto mahi॒tvā | tenā॑ no ya॒jñaṃ pi॑pṛhi viśvavāre ra॒yiṃ no॑ dhehi subhage su॒vīra॑m || १ ||
अ॒हमे॒वास्म्य॑मावा॒स्या॒३ मामा व॑सन्ति सु॒कृतो॒ मयी॒मे।
मयि॑ दे॒वा उ॒भये॑ सा॒ध्याश्चेन्द्र॑ज्येष्ठाः॒ सम॑गच्छन्त॒ सर्वे॑ ॥२॥
a॒hame॒vāsmya॑māvā॒syā॒३ māmā va॑santi su॒kṛto॒ mayī॒me | mayi॑ de॒vā u॒bhaye॑ sā॒dhyāścendra॑jyeṣṭhāḥ॒ sama॑gacchanta॒ sarve॑ || २ ||
आग॒न् रात्री॑ सं॒गम॑नी॒ वसू॑ना॒मूर्जं॑ पु॒ष्टं वस्वा॑वे॒शय॑न्ती ।
अ॒मा॒वा॒स्याऽयै ह॒विषा॑ विधे॒मोर्जं॒ दुहा॑ना॒ पय॑सा न॒ आग॑न् ॥३॥
āga॒n rātrī॑ saṃ॒gama॑nī॒ vasū॑nā॒mūrjaṃ॑ pu॒ṣṭaṃ vasvā॑ve॒śaya॑ntī | a॒mā॒vā॒syā’yai ha॒viṣā॑ vidhe॒morjaṃ॒ duhā॑nā॒ paya॑sā na॒ āga॑n || ३ ||
अमा॑वास्ये न त्वदे॒तान्य॒न्यो विश्वा॑ रू॒पाणि॑ परि॒भूर्ज॑जान ।
यत् का॑मास्ते जुहु॒मस्तन्नो॑ अस्तु व॒यं स्या॑म॒ पत॑यो रयि॒णाम् ॥४॥
amā॑vāsye na tvade॒tānya॒nyo viśvā॑ rū॒pāṇi॑ pari॒bhūrja॑jāna | yat kā॑māste juhu॒mastanno॑ astu va॒yaṃ syā॑ma॒ pata॑yo rayi॒ṇām || ४ ||