EeseDharmaSanātana Library
74काण्ड 7 · सूक्त 74
Atharvaveda Śaunaka Kand 7, Sukta 74.
4 shlokअ॒प॒चितां॒ लोहि॑नीनां कृ॒ष्णा मा॒तेति॑ शुश्रुम ।
मुने॑र्दे॒वस्य॒ मूले॑न॒ सर्वा॑ विध्यामि॒ ता अ॒हम् ॥१॥
a॒pa॒citāṃ॒ lohi॑nīnāṃ kṛ॒ṣṇā mā॒teti॑ śuśruma | mune॑rde॒vasya॒ mūle॑na॒ sarvā॑ vidhyāmi॒ tā a॒ham || १ ||
विध्या॑म्यासां प्रथ॒मां विध्या॑म्यु॒त म॑ध्य॒माम्।
इ॒दं ज॑घ॒न्याऽमासा॒मा च्छि॑नद्मि॒ स्तुका॑मिव ॥२॥
vidhyā॑myāsāṃ pratha॒māṃ vidhyā॑myu॒ta ma॑dhya॒mām | i॒daṃ ja॑gha॒nyā’māsā॒mā cchi॑nadmi॒ stukā॑miva || २ ||
त्वा॒ष्ट्रेणा॒हं वच॑सा॒ वि त॑ ई॒र्ष्याम॑मीमदम्।
अथो॒ यो म॒न्युष्टे॑ पते॒ तमु॑ ते शमयामसि ॥३॥
tvā॒ṣṭreṇā॒haṃ vaca॑sā॒ vi ta॑ ī॒rṣyāma॑mīmadam | atho॒ yo ma॒nyuṣṭe॑ pate॒ tamu॑ te śamayāmasi || ३ ||
व्र॒तेन॒ त्वं व्र॑तपते॒ सम॑क्तो वि॒श्वाहा॑ सु॒मना॑ दीदिही॒ह।
तं त्वा॑ व॒यं जा॑तवेदः॒ समि॑द्धं प्र॒जाव॑न्त॒ उप॑ सदेम॒ सर्वे॑ ॥४॥
vra॒tena॒ tvaṃ vra॑tapate॒ sama॑kto vi॒śvāhā॑ su॒manā॑ dīdihī॒ha | taṃ tvā॑ va॒yaṃ jā॑tavedaḥ॒ sami॑ddhaṃ pra॒jāva॑nta॒ upa॑ sadema॒ sarve॑ || ४ ||