EeseDharmaSanātana Library
73काण्ड 7 · सूक्त 73
Atharvaveda Śaunaka Kand 7, Sukta 73.
11 shlokसमि॑द्धो अ॒ग्निर्वृ॑षणा र॒थी दि॒वस्त॒प्तो घ॒र्मो दु॑ह्यते वामि॒षे मधु॑ ।
व॒यं हि वां॑ पुरु॒दमा॑सो अश्विना॒ हवा॑महे सध॒मादे॑षु का॒रवः॑ ॥१॥
sami॑ddho a॒gnirvṛ॑ṣaṇā ra॒thī di॒vasta॒pto gha॒rmo du॑hyate vāmi॒ṣe madhu॑ | va॒yaṃ hi vāṃ॑ puru॒damā॑so aśvinā॒ havā॑mahe sadha॒māde॑ṣu kā॒ravaḥ॑ || १ ||
समि॑द्धो अ॒ग्निर॑श्विना त॒प्तो वां॑ घ॒र्म आ ग॑तम्।
दु॒ह्यन्ते॑ नू॒नं वृ॑षणे॒ह धे॒नवो॒ दस्रा॒ मद॑न्ति वे॒धसः॑ ॥२॥
sami॑ddho a॒gnira॑śvinā ta॒pto vāṃ॑ gha॒rma ā ga॑tam | du॒hyante॑ nū॒naṃ vṛ॑ṣaṇe॒ha dhe॒navo॒ dasrā॒ mada॑nti ve॒dhasaḥ॑ || २ ||
स्वाहा॑कृतः॒ शुचि॑र्दे॒वेषु॑ य॒ज्ञो यो अ॒श्विनो॑श्चम॒सो दे॑व॒पानः॑ ।
तमु॒ विश्वे॑ अ॒मृता॑सो जुषा॒णा ग॑न्ध॒र्वस्य॒ प्रत्या॒स्ना रि॑हन्ति ॥३॥
svāhā॑kṛtaḥ॒ śuci॑rde॒veṣu॑ ya॒jño yo a॒śvino॑ścama॒so de॑va॒pānaḥ॑ | tamu॒ viśve॑ a॒mṛtā॑so juṣā॒ṇā ga॑ndha॒rvasya॒ pratyā॒snā ri॑hanti || ३ ||
यदु॒स्रिया॒स्वाहु॑तं घृ॒तं पयो॒ऽयं स वा॑मश्विना भा॒ग आ ग॑तम्।
माध्वी॑ धर्तारा विदथस्य सत्पती त॒प्तं घ॒र्मं पि॑बतं रोच॒ने दि॒वः ॥४॥
yadu॒sriyā॒svāhu॑taṃ ghṛ॒taṃ payo॒’yaṃ sa vā॑maśvinā bhā॒ga ā ga॑tam | mādhvī॑ dhartārā vidathasya satpatī ta॒ptaṃ gha॒rmaṃ pi॑bataṃ roca॒ne di॒vaḥ || ४ ||
त॒प्तो वां॑ घ॒र्मो न॑क्षतु॒ स्वहो॑ता॒ प्र वा॑मध्व॒र्युश्च॑रतु॒ पय॑स्वान्।
मधो॑र्दु॒ग्धस्या॑श्विना त॒नाया॑ वी॒तं पा॒तं पय॑स उ॒स्रिया॑याः ॥५॥
ta॒pto vāṃ॑ gha॒rmo na॑kṣatu॒ svaho॑tā॒ pra vā॑madhva॒ryuśca॑ratu॒ paya॑svān | madho॑rdu॒gdhasyā॑śvinā ta॒nāyā॑ vī॒taṃ pā॒taṃ paya॑sa u॒sriyā॑yāḥ || ५ ||
उप॑ द्रव॒ पय॑सा गोधुगो॒षमा घ॒र्मे सि॑ञ्च॒ पय॑ उ॒स्रिया॑याः ।
वि नाक॑मख्यत् सवि॒ता वरे॑ण्योऽनुप्र॒याण॑मुषसो॒ वि रा॑जति ॥६॥
upa॑ drava॒ paya॑sā godhugo॒ṣamā gha॒rme si॑ñca॒ paya॑ u॒sriyā॑yāḥ | vi nāka॑makhyat savi॒tā vare॑ṇyo’nupra॒yāṇa॑muṣaso॒ vi rā॑jati || ६ ||
उप॑ ह्वये सु॒दुघां॑ धे॒नुमे॒तां सु॒हस्तो॑ गो॒धुगु॒त दो॑हदेनाम्।
श्रेष्ठं॑ स॒वं स॑वि॒ता सा॑विषन्नो॒ऽभीऽद्धो घ॒र्मस्तदु॒ षु प्र वो॑चत् ॥७॥
upa॑ hvaye su॒dughāṃ॑ dhe॒nume॒tāṃ su॒hasto॑ go॒dhugu॒ta do॑hadenām | śreṣṭhaṃ॑ sa॒vaṃ sa॑vi॒tā sā॑viṣanno॒’bhī’ddho gha॒rmastadu॒ ṣu pra vo॑cat || ७ ||
हि॒ङ्कृ॒ण्व॒ती व॑सु॒पत्नी॒ वसू॑नां व॒त्समि॒च्छन्ती॒ मन॑सा॒ न्याग॑न्।
दु॒हाम॒श्विभ्यां॒ पयो॑ अ॒घ्न्येयं सा व॑र्धतां मह॒ते सौभ॑गाय ॥८॥
hi॒ṅkṛ॒ṇva॒tī va॑su॒patnī॒ vasū॑nāṃ va॒tsami॒cchantī॒ mana॑sā॒ nyāga॑n | du॒hāma॒śvibhyāṃ॒ payo॑ a॒ghnyeyaṃ sā va॑rdhatāṃ maha॒te saubha॑gāya || ८ ||
जुष्टो॒ दमू॑ना॒ अति॑थिर्दुरो॒ण इ॒मं नो॑ य॒ज्ञमुप॑ याहि वि॒द्वान्।
विश्वा॑ अग्ने अभि॒युजो॑ वि॒हत्य॑ शत्रूय॒तामा भ॑रा॒ भोज॑नानि ॥९॥
juṣṭo॒ damū॑nā॒ ati॑thirduro॒ṇa i॒maṃ no॑ ya॒jñamupa॑ yāhi vi॒dvān | viśvā॑ agne abhi॒yujo॑ vi॒hatya॑ śatrūya॒tāmā bha॑rā॒ bhoja॑nāni || ९ ||
अग्ने॒ शर्ध॑ मह॒ते सौभ॑गाय॒ तव॑ द्यु॒म्नान्यु॑त्त॒मानि॑ सन्तु ।
सं जा॑स्प॒त्यं सु॒यम॒मा कृ॑णुष्व शत्रूय॒ताम॒भि ति॑ष्ठा॒ महां॑सि ॥१०॥
agne॒ śardha॑ maha॒te saubha॑gāya॒ tava॑ dyu॒mnānyu॑tta॒māni॑ santu | saṃ jā॑spa॒tyaṃ su॒yama॒mā kṛ॑ṇuṣva śatrūya॒tāma॒bhi ti॑ṣṭhā॒ mahāṃ॑si || १० ||
सू॒य॒व॒साद् भग॑वती॒ हि भू॒या अधा॑ व॒यं भग॑वन्तः स्याम ।
अ॒द्धि तृण॑मघ्न्ये विश्व॒दानीं॒ पिब॑ शु॒द्धमु॑द॒कमा॒चर॑न्ती ॥११॥
sū॒ya॒va॒sād bhaga॑vatī॒ hi bhū॒yā adhā॑ va॒yaṃ bhaga॑vantaḥ syāma | a॒ddhi tṛṇa॑maghnye viśva॒dānīṃ॒ piba॑ śu॒ddhamu॑da॒kamā॒cara॑ntī || ११ ||