EeseDharmaSanātana Library
60काण्ड 7 · सूक्त 60
Atharvaveda Śaunaka Kand 7, Sukta 60.
7 shlokऊर्जं॒ बिभ्र॑द् वसु॒वनिः॑ सुमे॒धा अघो॑रेण॒ चक्षु॑षा मि॒त्रिये॑ण ।
गृ॒हानैमि॑ सु॒मना॒ वन्द॑मानो॒ रम॑ध्वं॒ मा बि॑भीत॒ मत् ॥१॥
ūrjaṃ॒ bibhra॑d vasu॒vaniḥ॑ sume॒dhā agho॑reṇa॒ cakṣu॑ṣā mi॒triye॑ṇa | gṛ॒hānaimi॑ su॒manā॒ vanda॑māno॒ rama॑dhvaṃ॒ mā bi॑bhīta॒ mat || १ ||
इ॒मे गृ॒हा म॑यो॒भुव॒ ऊर्ज॑स्वन्तः॒ पय॑स्वन्तः ।
पू॒र्णा वा॒मेन॒ तिष्ठ॑न्त॒स्ते नो॑ जानन्त्वाय॒तः ॥२॥
i॒me gṛ॒hā ma॑yo॒bhuva॒ ūrja॑svantaḥ॒ paya॑svantaḥ | pū॒rṇā vā॒mena॒ tiṣṭha॑nta॒ste no॑ jānantvāya॒taḥ || २ ||
येषा॑म॒ध्येति॑ प्र॒वस॒न् येषु॑ सौमन॒सो ब॒हुः ।
गृ॒हानुप॑ ह्वयामहे॒ ते नो॑ जानन्त्वाय॒तः ॥३॥
yeṣā॑ma॒dhyeti॑ pra॒vasa॒n yeṣu॑ saumana॒so ba॒huḥ | gṛ॒hānupa॑ hvayāmahe॒ te no॑ jānantvāya॒taḥ || ३ ||
उप॑हूता॒ भूरि॑धनाः॒ सखा॑यः स्वा॒दुसं॑मुदः ।
अ॒क्षु॒ध्या अ॑तृ॒ष्या स्त॒ गृहा॒ मास्मद् बि॑भीतन ॥४॥
upa॑hūtā॒ bhūri॑dhanāḥ॒ sakhā॑yaḥ svā॒dusaṃ॑mudaḥ | a॒kṣu॒dhyā a॑tṛ॒ṣyā sta॒ gṛhā॒ māsmad bi॑bhītana || ४ ||
उप॑हूता इ॒ह गाव॒ उप॑हूता अजा॒वयः॑ ।
अथो॒ अन्न॑स्य की॒लाल॒ उप॑हूतो गृ॒हेषु॑ नः ॥५॥
upa॑hūtā i॒ha gāva॒ upa॑hūtā ajā॒vayaḥ॑ | atho॒ anna॑sya kī॒lāla॒ upa॑hūto gṛ॒heṣu॑ naḥ || ५ ||
सू॒नृता॑वन्तः सु॒भगा॒ इरा॑वन्तो हसामु॒दाः ।
अ॒तृ॒ष्या अ॑क्षु॒ध्या स्त॒ गृहा॒ मास्मद् बि॑भीतन ॥६॥
sū॒nṛtā॑vantaḥ su॒bhagā॒ irā॑vanto hasāmu॒dāḥ | a॒tṛ॒ṣyā a॑kṣu॒dhyā sta॒ gṛhā॒ māsmad bi॑bhītana || ६ ||
इ॒हैव स्त॒ मानु॑ गात॒ विश्वा॑ रू॒पाणि॑ पुष्यत ।
ऐष्या॑मि भ॒द्रेणा॑ स॒ह भूयां॑सो भवता॒ मया॑ ॥७॥
i॒haiva sta॒ mānu॑ gāta॒ viśvā॑ rū॒pāṇi॑ puṣyata | aiṣyā॑mi bha॒dreṇā॑ sa॒ha bhūyāṃ॑so bhavatā॒ mayā॑ || ७ ||