EeseDharmaSanātana Library
6काण्ड 7 · सूक्त 6
Atharvaveda Śaunaka Kand 7, Sukta 6.
4 shlokअदि॑ति॒र्द्यौरदि॑तिर॒न्तरि॑क्ष॒मदि॑तिर्मा॒ता स पि॒ता स पु॒त्रः ।
विश्वे॑ दे॒वा अदि॑तिः॒ पञ्च॒ जना॒ अदि॑तिर्जा॒तमदि॑ति॒र्जनि॑त्वम् ॥१॥
adi॑ti॒rdyauradi॑tira॒ntari॑kṣa॒madi॑tirmā॒tā sa pi॒tā sa pu॒traḥ | viśve॑ de॒vā adi॑tiḥ॒ pañca॒ janā॒ adi॑tirjā॒tamadi॑ti॒rjani॑tvam || १ ||
म॒हीमू॒ षु मा॒तरं॑ सुव्र॒ताना॑मृ॒तस्य॒ पत्नी॒मव॑से हवामहे ।
तु॒वि॒क्ष॒त्राम॒जर॑न्तीमुरू॒चीं सु॒शर्मा॑ण॒मदि॑तिं सु॒प्रणी॑तिम् ॥२॥
ma॒hīmū॒ ṣu mā॒taraṃ॑ suvra॒tānā॑mṛ॒tasya॒ patnī॒mava॑se havāmahe | tu॒vi॒kṣa॒trāma॒jara॑ntīmurū॒cīṃ su॒śarmā॑ṇa॒madi॑tiṃ su॒praṇī॑tim || २ ||
सु॒त्रामा॑णं पृथि॒वीं द्याम॑ने॒हसं॑ सु॒शर्मा॑ण॒मदि॑तिं सु॒प्रणी॑तिम्।
दैवीं॒ नावं॑ स्वरि॒त्रामना॑गसो॒ अस्र॑वन्ती॒मा रु॑हेमा स्व॒स्तये॑ ॥३॥
su॒trāmā॑ṇaṃ pṛthi॒vīṃ dyāma॑ne॒hasaṃ॑ su॒śarmā॑ṇa॒madi॑tiṃ su॒praṇī॑tim | daivīṃ॒ nāvaṃ॑ svari॒trāmanā॑gaso॒ asra॑vantī॒mā ru॑hemā sva॒staye॑ || ३ ||
वाज॑स्य॒ नु प्र॑स॒वे मा॒तरं॑ म॒हीमदि॑तिं॒ नाम॒ वच॑सा करामहे ।
यस्या॑ उ॒पस्थ॑ उ॒र्व॑१न्तरि॑क्षं॒ सा नः॒ शर्म॑ त्रि॒वरू॑थं॒ नि य॑च्छात् ॥४॥
vāja॑sya॒ nu pra॑sa॒ve mā॒taraṃ॑ ma॒hīmadi॑tiṃ॒ nāma॒ vaca॑sā karāmahe | yasyā॑ u॒pastha॑ u॒rva॑१ntari॑kṣaṃ॒ sā naḥ॒ śarma॑ tri॒varū॑thaṃ॒ ni ya॑cchāt || ४ ||