EeseDharmaSanātana Library
56काण्ड 7 · सूक्त 56
Atharvaveda Śaunaka Kand 7, Sukta 56.
8 shlokतिर॑श्चिराजेरसि॒तात् पृदा॑कोः॒ परि॒ संभृ॑तम्।
तत् क॒ङ्कप॑र्वणो वि॒षमि॒यं वी॒रुद॑नीनशत् ॥१॥
tira॑ścirājerasi॒tāt pṛdā॑koḥ॒ pari॒ saṃbhṛ॑tam | tat ka॒ṅkapa॑rvaṇo vi॒ṣami॒yaṃ vī॒ruda॑nīnaśat || १ ||
इ॒यं वी॒रुन्मधु॑जाता मधु॒श्चुन्म॑धु॒ला म॒धूः ।
सा विह्रु॑तस्य भेष॒ज्यथो॑ मशक॒जम्भ॑नी ॥२॥
i॒yaṃ vī॒runmadhu॑jātā madhu॒ścunma॑dhu॒lā ma॒dhūḥ | sā vihru॑tasya bheṣa॒jyatho॑ maśaka॒jambha॑nī || २ ||
यतो॑ द॒ष्टं यतो॑ धी॒तं तत॑स्ते॒ निर्ह्व॑यामसि ।
अ॒र्भस्य॑ तृप्रदं॒शिनो॑ म॒शक॑स्यार॒सं वि॒षम् ॥३॥
yato॑ da॒ṣṭaṃ yato॑ dhī॒taṃ tata॑ste॒ nirhva॑yāmasi | a॒rbhasya॑ tṛpradaṃ॒śino॑ ma॒śaka॑syāra॒saṃ vi॒ṣam || ३ ||
अ॒यं यो व॒क्रो विप॑रु॒र्व्यऽङ्गो॒ मुखा॑नि व॒क्रा वृ॑जि॒ना कृ॒णोषि॑ ।
तानि॒ त्वं ब्र॑ह्मणस्पत इ॒षीका॑मिव॒ सं न॑मः ॥४॥
a॒yaṃ yo va॒kro vipa॑ru॒rvya’ṅgo॒ mukhā॑ni va॒krā vṛ॑ji॒nā kṛ॒ṇoṣi॑ | tāni॒ tvaṃ bra॑hmaṇaspata i॒ṣīkā॑miva॒ saṃ na॑maḥ || ४ ||
अ॒र॒सस्य॑ श॒र्कोट॑स्य नी॒चीन॑स्योप॒सर्प॑तः ।
वि॒षं ह्य॑१स्यादि॒ष्यथो॑ एनमजीजभम् ॥५॥
a॒ra॒sasya॑ śa॒rkoṭa॑sya nī॒cīna॑syopa॒sarpa॑taḥ | vi॒ṣaṃ hya॑१syādi॒ṣyatho॑ enamajījabham || ५ ||
न ते॑ बा॒ह्वोर्बल॑मस्ति॒ न शी॒र्षे नोत म॑ध्य॒तः ।
अथ॒ किं पा॒पया॑मु॒या पुच्छे॑ बिभर्ष्यर्भ॒कम् ॥६॥
na te॑ bā॒hvorbala॑masti॒ na śī॒rṣe nota ma॑dhya॒taḥ | atha॒ kiṃ pā॒payā॑mu॒yā pucche॑ bibharṣyarbha॒kam || ६ ||
अ॒दन्ति॑ त्वा पि॒पीलि॑का॒ वि वृ॑श्चन्ति मयू॒र्यः ।
सर्वे॑ भल ब्रवाथ॒ शार्को॑टमर॒सं वि॒षम् ॥७॥
a॒danti॑ tvā pi॒pīli॑kā॒ vi vṛ॑ścanti mayū॒ryaḥ | sarve॑ bhala bravātha॒ śārko॑ṭamara॒saṃ vi॒ṣam || ७ ||
य उ॒भाभ्यां॑ प्र॒हर॑सि॒ पुच्छे॑न चा॒स्येऽन च ।
आ॒स्ये॒३ न ते॑ वि॒षं किमु॑ ते पुच्छ॒धाव॑सत् ॥८॥
ya u॒bhābhyāṃ॑ pra॒hara॑si॒ pucche॑na cā॒sye’na ca | ā॒sye॒३ na te॑ vi॒ṣaṃ kimu॑ te puccha॒dhāva॑sat || ८ ||