EeseDharmaSanātana Library
53काण्ड 7 · सूक्त 53
Atharvaveda Śaunaka Kand 7, Sukta 53.
7 shlokअ॒मु॒त्र॒भूया॒दधि॒ यद् य॒मस्य॒ बृह॑स्पतेर॒भिश॑स्तेर॑मुञ्चः ।
प्रत्यौ॑हताम॒श्विना॑ मृ॒त्युम॒स्मद् दे॒वाना॑मग्ने भि॒षजा॒ शची॑भिः ॥१॥
a॒mu॒tra॒bhūyā॒dadhi॒ yad ya॒masya॒ bṛha॑spatera॒bhiśa॑stera॑muñcaḥ | pratyau॑hatāma॒śvinā॑ mṛ॒tyuma॒smad de॒vānā॑magne bhi॒ṣajā॒ śacī॑bhiḥ || १ ||
सं क्रा॑मतं॒ मा ज॑हीतं॒ शरी॑रं प्राणापा॒नौ ते॑ स॒युजा॑वि॒ह स्ता॑म्।
श॒तं जी॑व श॒रदो॒ वर्ध॑मानो॒ऽग्निष्टे॑ गो॒पा अ॑धि॒पा वसि॑ष्ठः ॥२॥
saṃ krā॑mataṃ॒ mā ja॑hītaṃ॒ śarī॑raṃ prāṇāpā॒nau te॑ sa॒yujā॑vi॒ha stā॑m | śa॒taṃ jī॑va śa॒rado॒ vardha॑māno॒’gniṣṭe॑ go॒pā a॑dhi॒pā vasi॑ṣṭhaḥ || २ ||
आयु॒र्यत् ते॒ अति॑हितं परा॒चैर॑पा॒नः प्रा॒णः पुन॒रा तावि॑ताम्।
अ॒ग्निष्टदाहा॒र्निरृ॑तेरु॒पस्था॒त् तदा॒त्मनि॒ पुन॒रा वे॑शयामि ते ॥३॥
āyu॒ryat te॒ ati॑hitaṃ parā॒caira॑pā॒naḥ prā॒ṇaḥ puna॒rā tāvi॑tām | a॒gniṣṭadāhā॒rnirṛ॑teru॒pasthā॒t tadā॒tmani॒ puna॒rā ve॑śayāmi te || ३ ||
मेमं प्रा॒णो हा॑सी॒न्मो अ॑पा॒नोऽव॒हाय॒ परा॑ गात्।
स॒प्त॒र्षिभ्य॑ एनं॒ परि॑ ददामि॒ त ए॑नं स्व॒स्ति ज॒रसे॑ वहन्तु ॥४॥
memaṃ prā॒ṇo hā॑sī॒nmo a॑pā॒no’va॒hāya॒ parā॑ gāt | sa॒pta॒rṣibhya॑ enaṃ॒ pari॑ dadāmi॒ ta e॑naṃ sva॒sti ja॒rase॑ vahantu || ४ ||
प्र वि॑शतं प्राणापानावन॒ड्वाहा॑विव व्र॒जम्।
अ॒यं ज॑रि॒म्णः शे॑व॒धिररि॑ष्ट इ॒ह व॑र्धताम् ॥५॥
pra vi॑śataṃ prāṇāpānāvana॒ḍvāhā॑viva vra॒jam | a॒yaṃ ja॑ri॒mṇaḥ śe॑va॒dhirari॑ṣṭa i॒ha va॑rdhatām || ५ ||
आ ते॑ प्रा॒णं सु॑वामसि॒ परा॒ यक्ष्मं॑ सुवामि ते ।
आयु॑र्नो वि॒श्वतो॑ दधद॒यम॒ग्निर्वरे॑ण्यः ॥६॥
ā te॑ prā॒ṇaṃ su॑vāmasi॒ parā॒ yakṣmaṃ॑ suvāmi te | āyu॑rno vi॒śvato॑ dadhada॒yama॒gnirvare॑ṇyaḥ || ६ ||
उद् व॒यं तम॑स॒स्परि॒ रोह॑न्तो॒ नाक॑मुत्त॒मम्।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ॥७॥
ud va॒yaṃ tama॑sa॒spari॒ roha॑nto॒ nāka॑mutta॒mam | de॒vaṃ de॑va॒trā sūrya॒maga॑nma॒ jyoti॑rutta॒mam || ७ ||