EeseDharmaSanātana Library
50काण्ड 7 · सूक्त 50
Atharvaveda Śaunaka Kand 7, Sukta 50.
9 shlokयथा॑ वृ॒क्षम॒शनि॑र्वि॒श्वाहा॒ हन्त्य॑प्र॒ति।
ए॒वाहम॒द्य कि॑त॒वान॒क्षैर्ब॑ध्यासमप्र॒ति ॥१॥
yathā॑ vṛ॒kṣama॒śani॑rvi॒śvāhā॒ hantya॑pra॒ti | e॒vāhama॒dya ki॑ta॒vāna॒kṣairba॑dhyāsamapra॒ti || १ ||
तु॒राणा॒मतु॑राणां वि॒शामव॑र्जुषीणाम्।
स॒मैतु॑ वि॒श्वतो॒ भगो॑ अन्तर्ह॒स्तं कृ॒तं मम॑ ॥२॥
tu॒rāṇā॒matu॑rāṇāṃ vi॒śāmava॑rjuṣīṇām | sa॒maitu॑ vi॒śvato॒ bhago॑ antarha॒staṃ kṛ॒taṃ mama॑ || २ ||
ईडे॑ अग्निं स्वाव॑सुं॒ नमो॑भिरि॒ह प्र॑स॒क्तो वि च॑यत् कृ॒तं नः ।
रथै॑रिव॒ प्र भ॑रे वा॒जय॑द्भिः प्रदक्षि॒णं म॒रुतां॒ स्तोम॑मृध्याम् ॥३॥
īḍe॑ agniṃ svāva॑suṃ॒ namo॑bhiri॒ha pra॑sa॒kto vi ca॑yat kṛ॒taṃ naḥ | rathai॑riva॒ pra bha॑re vā॒jaya॑dbhiḥ pradakṣi॒ṇaṃ ma॒rutāṃ॒ stoma॑mṛdhyām || ३ ||
व॒यं ज॑येम॒ त्वया॑ यु॒जा वृत॑म॒स्माक॒मंश॒मुद॑वा॒ भरे॑भरे ।
अ॒स्मभ्य॑मिन्द्र॒ वरी॑यः सु॒गं कृ॑धि॒ प्र शत्रू॑णां मघव॒न् वृष्ण्या॑ रुज ॥४॥
va॒yaṃ ja॑yema॒ tvayā॑ yu॒jā vṛta॑ma॒smāka॒maṃśa॒muda॑vā॒ bhare॑bhare | a॒smabhya॑mindra॒ varī॑yaḥ su॒gaṃ kṛ॑dhi॒ pra śatrū॑ṇāṃ maghava॒n vṛṣṇyā॑ ruja || ४ ||
अजै॑षं त्वा॒ संलि॑खित॒मजै॑षमु॒त सं॒रुध॑म्।
अविं॒ वृको॒ यथा॒ मथ॑दे॒वा म॑थ्नामि ते कृ॒तम् ॥५॥
ajai॑ṣaṃ tvā॒ saṃli॑khita॒majai॑ṣamu॒ta saṃ॒rudha॑m | aviṃ॒ vṛko॒ yathā॒ matha॑de॒vā ma॑thnāmi te kṛ॒tam || ५ ||
उ॒त प्र॒हामति॑दीवा जयति कृ॒तमि॑व श्व॒घ्नी वि चि॑नोति का॒ले।
यो दे॒वका॑मो॒ न धनं रु॒णद्धि॒ समित् तं रा॒यः सृ॑जति स्व॒धाभिः॑ ॥६॥
u॒ta pra॒hāmati॑dīvā jayati kṛ॒tami॑va śva॒ghnī vi ci॑noti kā॒le | yo de॒vakā॑mo॒ na dhanaṃ ru॒ṇaddhi॒ samit taṃ rā॒yaḥ sṛ॑jati sva॒dhābhiḥ॑ || ६ ||
गोभि॑ष्टरे॒माम॑तिं दु॒रेवां॒ यवे॑न वा॒ क्षुधं॑ पुरुहूत॒ विश्वे॑ ।
व॒यं राज॑सु प्रथ॒मा धना॒न्यरि॑ष्टासो वृज॒नीभि॑र्जयेम ॥७॥
gobhi॑ṣṭare॒māma॑tiṃ du॒revāṃ॒ yave॑na vā॒ kṣudhaṃ॑ puruhūta॒ viśve॑ | va॒yaṃ rāja॑su pratha॒mā dhanā॒nyari॑ṣṭāso vṛja॒nībhi॑rjayema || ७ ||
कृ॒तं मे॒ दक्षि॑णे॒ हस्ते॑ ज॒यो मे॑ स॒व्य आहि॑तः ।
गो॒जिद् भू॑यासमश्व॒जिद् ध॑नंज॒यो हि॑रण्य॒जित् ॥८॥
kṛ॒taṃ me॒ dakṣi॑ṇe॒ haste॑ ja॒yo me॑ sa॒vya āhi॑taḥ | go॒jid bhū॑yāsamaśva॒jid dha॑naṃja॒yo hi॑raṇya॒jit || ८ ||
अक्षाः॒ फल॑वतीं॒ द्युवं॑ द॒त्त गां क्षी॒रिणी॑मिव ।
सं मा॑ कृ॒तस्य॒ धार॑या॒ धनुः॒ स्नाव्ने॑व नह्यत ॥९॥
akṣāḥ॒ phala॑vatīṃ॒ dyuvaṃ॑ da॒tta gāṃ kṣī॒riṇī॑miva | saṃ mā॑ kṛ॒tasya॒ dhāra॑yā॒ dhanuḥ॒ snāvne॑va nahyata || ९ ||