EeseDharmaSanātana Library
5काण्ड 7 · सूक्त 5
Atharvaveda Śaunaka Kand 7, Sukta 5.
5 shlokय॒ज्ञेन॑ य॒ज्ञम॑यजन्त दे॒वास्तानि॒ धर्मा॑णि प्रथ॒मान्या॑सन्।
ते ह॒ नाकं॑ महि॒मानः॑ सचन्त॒ यत्र॒ पूर्वे॑ सा॒ध्याः सन्ति॑ दे॒वाः ॥१॥
ya॒jñena॑ ya॒jñama॑yajanta de॒vāstāni॒ dharmā॑ṇi pratha॒mānyā॑san | te ha॒ nākaṃ॑ mahi॒mānaḥ॑ sacanta॒ yatra॒ pūrve॑ sā॒dhyāḥ santi॑ de॒vāḥ || १ ||
य॒ज्ञो ब॑भूव॒ स आ ब॑भूव॒ स प्र ज॑ज्ञे॒ स उ॑ वावृधे॒ पुनः॑ ।
स दे॒वाना॒मधि॑पतिर्बभूव॒ सो अ॒स्मासु॒ द्रवि॑ण॒मा द॑धातु ॥२॥
ya॒jño ba॑bhūva॒ sa ā ba॑bhūva॒ sa pra ja॑jñe॒ sa u॑ vāvṛdhe॒ punaḥ॑ | sa de॒vānā॒madhi॑patirbabhūva॒ so a॒smāsu॒ dravi॑ṇa॒mā da॑dhātu || २ ||
यद् दे॒वा दे॒वान् ह॒विषाय॑ज॒न्ताम॑र्त्या॒न् मन॒साम॑र्त्येन ।
मदे॑म॒ तत्र॑ पर॒मे व्योऽम॒न् पश्ये॑म॒ तदुदि॑तौ॒ सूर्य॑स्य ॥३॥
yad de॒vā de॒vān ha॒viṣāya॑ja॒ntāma॑rtyā॒n mana॒sāma॑rtyena | made॑ma॒ tatra॑ para॒me vyo’ma॒n paśye॑ma॒ tadudi॑tau॒ sūrya॑sya || ३ ||
यत् पुरु॑षेण ह॒विषा॑ य॒ज्ञं दे॒वा अत॑न्वत ।
अस्ति॒ नु तस्मा॒दोजी॑यो॒ यद् विहव्ये॑नेजि॒रे ॥४॥
yat puru॑ṣeṇa ha॒viṣā॑ ya॒jñaṃ de॒vā ata॑nvata | asti॒ nu tasmā॒dojī॑yo॒ yad vihavye॑neji॒re || ४ ||
मु॒ग्धा दे॒वा उ॒त शुनाय॑जन्तो॒त गोरङ्गैः॑ पुरु॒धाय॑जन्त ।
य इ॒मं य॒ज्ञं मन॑सा चि॒केत॒ प्र णो॑ वोच॑स्तमि॑हेह ब्र॑वः ॥५॥
mu॒gdhā de॒vā u॒ta śunāya॑janto॒ta goraṅgaiḥ॑ puru॒dhāya॑janta | ya i॒maṃ ya॒jñaṃ mana॑sā ci॒keta॒ pra ṇo॑ voca॑stami॑heha bra॑vaḥ || ५ ||