EeseDharmaSanātana Library
38काण्ड 7 · सूक्त 38
Atharvaveda Śaunaka Kand 7, Sukta 38.
5 shlokइ॒दं ख॑नामि भेष॒जं मां॑प॒श्यम॑भिरोरु॒दम्।
प॒रा॒य॒तो नि॒वर्त॑नमाय॒तः प्र॑ति॒नन्द॑नम् ॥१॥
i॒daṃ kha॑nāmi bheṣa॒jaṃ māṃ॑pa॒śyama॑bhiroru॒dam | pa॒rā॒ya॒to ni॒varta॑namāya॒taḥ pra॑ti॒nanda॑nam || १ ||
येना॑ निच॒क्र आ॑सु॒रीन्द्रं॑ दे॒वेभ्य॒स्परि॑ ।
तेना॒ नि कु॑र्वे॒ त्वाम॒हं यथा॒ तेऽसा॑नि॒ सुप्रि॑या ॥२॥
yenā॑ nica॒kra ā॑su॒rīndraṃ॑ de॒vebhya॒spari॑ | tenā॒ ni ku॑rve॒ tvāma॒haṃ yathā॒ te’sā॑ni॒ supri॑yā || २ ||
प्र॒तीची॒ सोम॑मसि प्र॒तीच्यु॒त सूर्य॑म्।
प्र॒तीची॒ विश्वा॑न् दे॒वान् तां त्वा॒च्छाव॑दामसि ॥३॥
pra॒tīcī॒ soma॑masi pra॒tīcyu॒ta sūrya॑m | pra॒tīcī॒ viśvā॑n de॒vān tāṃ tvā॒cchāva॑dāmasi || ३ ||
अ॒हं व॑दामि॒ नेत् त्वं स॒भाया॒मह॒ त्वं वद॑ ।
ममेदस॒स्त्वं केव॑लो॒ नान्यासां॑ की॒र्तया॑श्च॒न ॥४॥
a॒haṃ va॑dāmi॒ net tvaṃ sa॒bhāyā॒maha॒ tvaṃ vada॑ | mamedasa॒stvaṃ keva॑lo॒ nānyāsāṃ॑ kī॒rtayā॑śca॒na || ४ ||
यदि॒ वासि॑ तिरोज॒नं यदि॑ वा न॒द्यऽस्ति॒रः ।
इ॒यं ह॒ मह्यं॒ त्वामोष॑धिर्ब॒द्ध्वेव॒ न्यान॑यत् ॥५॥
yadi॒ vāsi॑ tiroja॒naṃ yadi॑ vā na॒dya’sti॒raḥ | i॒yaṃ ha॒ mahyaṃ॒ tvāmoṣa॑dhirba॒ddhveva॒ nyāna॑yat || ५ ||