EeseDharmaSanātana Library
26काण्ड 7 · सूक्त 26
Atharvaveda Śaunaka Kand 7, Sukta 26.
8 shlokविष्णो॒र्नु कं॒ प्रा वो॑चं वी॒र्याऽणि॒ यः पार्थि॑वानि विम॒मे रजां॑सि ।
यो अस्क॑भाय॒दुत्त॑रं स॒धस्थं॑ विचक्रमा॒णस्त्रे॒धोरु॑गा॒यः ॥१॥
viṣṇo॒rnu kaṃ॒ prā vo॑caṃ vī॒ryā’ṇi॒ yaḥ pārthi॑vāni vima॒me rajāṃ॑si | yo aska॑bhāya॒dutta॑raṃ sa॒dhasthaṃ॑ vicakramā॒ṇastre॒dhoru॑gā॒yaḥ || १ ||
प्र तद् विष्णु॑ स्तवते वी॒र्याऽणि मृ॒गो न भी॒मः कु॑च॒रो गि॑रि॒ष्ठाः ।
प॒रा॒वत॒ आ ज॑गम्या॒त् पर॑स्याः ॥२॥
pra tad viṣṇu॑ stavate vī॒ryā’ṇi mṛ॒go na bhī॒maḥ ku॑ca॒ro gi॑ri॒ṣṭhāḥ | pa॒rā॒vata॒ ā ja॑gamyā॒t para॑syāḥ || २ ||
यस्यो॒रुषु॑ त्रि॒षु वि॒क्रम॑नेष्वधिक्षि॒यन्ति॒ भुव॑नानि॒ विश्वा॑ ।
उ॒रु वि॑ष्णो॒ वि क्र॑मस्वो॒रु क्षया॑य नस्कृधि ।
घृ॒तं घृ॑तयोने पिब॒ प्रप्र॑ य॒ज्ञप॑तिं तिर ॥३॥
yasyo॒ruṣu॑ tri॒ṣu vi॒krama॑neṣvadhikṣi॒yanti॒ bhuva॑nāni॒ viśvā॑ | u॒ru vi॑ṣṇo॒ vi kra॑masvo॒ru kṣayā॑ya naskṛdhi | ghṛ॒taṃ ghṛ॑tayone piba॒ prapra॑ ya॒jñapa॑tiṃ tira || ३ ||
इ॒दं विष्णु॒र्वि च॑क्रमे त्रे॒धा नि द॑धे प॒दा।
समू॑ढमस्य पांसु॒रे ॥४॥
i॒daṃ viṣṇu॒rvi ca॑krame tre॒dhā ni da॑dhe pa॒dā | samū॑ḍhamasya pāṃsu॒re || ४ ||
त्रीणि॑ प॒दा वि च॑क्रमे॒ विष्णु॑र्गो॒पा अदा॑भ्यः ।
इ॒तो धर्मा॑णि धा॒रय॑न् ॥५॥
trīṇi॑ pa॒dā vi ca॑krame॒ viṣṇu॑rgo॒pā adā॑bhyaḥ | i॒to dharmā॑ṇi dhā॒raya॑n || ५ ||
विष्णोः॒ कर्मा॑णि पश्यत॒ यतो॑ व्र॒तानि॑ पस्प॒शे।
इन्द्र॑स्य॒ युज्यः॒ सखा॑ ॥६॥
viṣṇoḥ॒ karmā॑ṇi paśyata॒ yato॑ vra॒tāni॑ paspa॒śe | indra॑sya॒ yujyaḥ॒ sakhā॑ || ६ ||
तद् विष्णोः॑ पर॒मं प॒दं सदा॑ पश्यन्ति सू॒रयः॑ ।
दि॒वीऽव॒ चक्षु॒रात॑तम् ॥७॥
tad viṣṇoḥ॑ para॒maṃ pa॒daṃ sadā॑ paśyanti sū॒rayaḥ॑ | di॒vī’va॒ cakṣu॒rāta॑tam || ७ ||
दि॒वो वि॑ष्ण उ॒त वा॑ पृथि॒व्या म॒हो वि॑ष्ण उ॒रोर॒न्तरि॑क्षात्।
हस्तौ॑ पृणस्व ब॒हुभि॑र्व॒सव्यै॑रा॒प्रय॑च्छ॒ दक्षि॑णा॒दोत स॒व्यात् ॥८॥
di॒vo vi॑ṣṇa u॒ta vā॑ pṛthi॒vyā ma॒ho vi॑ṣṇa u॒rora॒ntari॑kṣāt | hastau॑ pṛṇasva ba॒hubhi॑rva॒savyai॑rā॒praya॑ccha॒ dakṣi॑ṇā॒dota sa॒vyāt || ८ ||