EeseDharmaSanātana Library
20काण्ड 7 · सूक्त 20
Atharvaveda Śaunaka Kand 7, Sukta 20.
6 shlokअन्व॒द्य नोऽनु॑मतिर्य॒ज्ञं दे॒वेषु॑ मन्यताम्।
अ॒ग्निश्च॑ हव्य॒वाह॑नो॒ भव॑तां दा॒शुषे॒ मम॑ ॥१॥
anva॒dya no’nu॑matirya॒jñaṃ de॒veṣu॑ manyatām | a॒gniśca॑ havya॒vāha॑no॒ bhava॑tāṃ dā॒śuṣe॒ mama॑ || १ ||
अन्विद॑नुमते॒ त्वं मंस॑से॒ शं च॑ नस्कृधि ।
जुष॒स्व॑ ह॒व्यमाहु॑तं प्र॒जां दे॑वि ररास्व नः ॥२॥
anvida॑numate॒ tvaṃ maṃsa॑se॒ śaṃ ca॑ naskṛdhi | juṣa॒sva॑ ha॒vyamāhu॑taṃ pra॒jāṃ de॑vi rarāsva naḥ || २ ||
अनु॑ मन्यतामनु॒मन्य॑मानः प्र॒जाव॑न्तं र॒यिमक्षी॑यमाणम्।
तस्य॑ व॒यं हेड॑सि॒ मापि॑ भूम सुमृडी॒के अ॑स्य सुम॒तौ स्या॑म ॥३॥
anu॑ manyatāmanu॒manya॑mānaḥ pra॒jāva॑ntaṃ ra॒yimakṣī॑yamāṇam | tasya॑ va॒yaṃ heḍa॑si॒ māpi॑ bhūma sumṛḍī॒ke a॑sya suma॒tau syā॑ma || ३ ||
यत् ते॒ नाम॑ सु॒हवं॑ सुप्रणी॒तेऽनु॑मते॒ अनु॑मतं सु॒दानु॑ ।
तेना॑ नो य॒ज्ञं पि॑पृहि विश्ववारे र॒यिं नो॑ धेहि सुभगे सु॒वीर॑म् ॥४॥
yat te॒ nāma॑ su॒havaṃ॑ supraṇī॒te’nu॑mate॒ anu॑mataṃ su॒dānu॑ | tenā॑ no ya॒jñaṃ pi॑pṛhi viśvavāre ra॒yiṃ no॑ dhehi subhage su॒vīra॑m || ४ ||
एमं य॒ज्ञमनु॑मतिर्जगाम सुक्षे॒त्रता॑यै सुवी॒रता॑यै सुजा॑तम्।
भ॒द्रा ह्यऽस्याः॒ प्रम॑तिर्ब॒भूव॒ सेमं य॒ज्ञम॑वतु दे॒वगो॑पा ॥५॥
emaṃ ya॒jñamanu॑matirjagāma sukṣe॒tratā॑yai suvī॒ratā॑yai sujā॑tam | bha॒drā hya’syāḥ॒ prama॑tirba॒bhūva॒ semaṃ ya॒jñama॑vatu de॒vago॑pā || ५ ||
अनु॑मतिः॒ सर्व॑मि॒दं ब॑भूव॒ यत् तिष्ठ॑ति॒ चर॑ति॒ यदु॑ च॒ विश्व॒मेज॑ति ।
तस्या॑स्ते देवि सुम॒तौ स्या॒मानु॑मते॒ अनु॒ हि मंस॑से नः ॥६॥
anu॑matiḥ॒ sarva॑mi॒daṃ ba॑bhūva॒ yat tiṣṭha॑ti॒ cara॑ti॒ yadu॑ ca॒ viśva॒meja॑ti | tasyā॑ste devi suma॒tau syā॒mānu॑mate॒ anu॒ hi maṃsa॑se naḥ || ६ ||