EeseDharmaSanātana Library
12काण्ड 7 · सूक्त 12
Atharvaveda Śaunaka Kand 7, Sukta 12.
4 shlokस॒भा च॑ मा॒ समि॑तिश्चावतां प्र॒जाप॑तेर्दुहि॒तरौ॑ संविदा॒ने।
येना॑ सं॒गच्छा॒ उप॑ मा॒ स शि॑क्षा॒च्चारु॑ वदानि पितरः॒ संग॑तेषु ॥१॥
sa॒bhā ca॑ mā॒ sami॑tiścāvatāṃ pra॒jāpa॑terduhi॒tarau॑ saṃvidā॒ne | yenā॑ saṃ॒gacchā॒ upa॑ mā॒ sa śi॑kṣā॒ccāru॑ vadāni pitaraḥ॒ saṃga॑teṣu || १ ||
वि॒द्म ते॑ सभे॒ नाम॑ न॒रिष्टा॒ नाम॒ वा अ॑सि ।
ये ते॒ के च॑ सभा॒सद॒स्ते मे॑ सन्तु॒ सवा॑चसः ॥२॥
vi॒dma te॑ sabhe॒ nāma॑ na॒riṣṭā॒ nāma॒ vā a॑si | ye te॒ ke ca॑ sabhā॒sada॒ste me॑ santu॒ savā॑casaḥ || २ ||
ए॒षाम॒हं स॒मासी॑नानां॒ वर्चो॑ वि॒ज्ञान॒मा द॑दे ।
अ॒स्याः सर्व॑स्याः सं॒सदो॒ मामि॑न्द्र भ॒गिनं॑ कृणु ॥३॥
e॒ṣāma॒haṃ sa॒māsī॑nānāṃ॒ varco॑ vi॒jñāna॒mā da॑de | a॒syāḥ sarva॑syāḥ saṃ॒sado॒ māmi॑ndra bha॒ginaṃ॑ kṛṇu || ३ ||
यद् वो॒ मनः॒ परा॑गतं॒ यद् ब॒द्धमि॒ह वे॒ह वा॑ ।
तद् व॒ आ व॑र्तयामसि॒ मयि॑ वो रमतां॒ मनः॑ ॥४॥
yad vo॒ manaḥ॒ parā॑gataṃ॒ yad ba॒ddhami॒ha ve॒ha vā॑ | tad va॒ ā va॑rtayāmasi॒ mayi॑ vo ramatāṃ॒ manaḥ॑ || ४ ||