EeseDharmaSanātana Library
115काण्ड 7 · सूक्त 115
Atharvaveda Śaunaka Kand 7, Sukta 115.
4 shlokप्र प॑ते॒तः पा॑पि लक्ष्मि॒ नश्ये॒तः प्रामुतः॑ पत ।
अ॒य॒स्मये॑ना॒ङ्केन॑ द्विष॒ते त्वा स॑जामसि ॥१॥
pra pa॑te॒taḥ pā॑pi lakṣmi॒ naśye॒taḥ prāmutaḥ॑ pata | a॒ya॒smaye॑nā॒ṅkena॑ dviṣa॒te tvā sa॑jāmasi || १ ||
या मा॑ ल॒क्ष्मीः प॑तया॒लूरजु॑ष्टाभिच॒स्कन्द॒ वन्द॑नेव वृ॒क्षम्।
अ॒न्यत्रा॒स्मत् स॑वित॒स्तामि॒तो धा॒ हिर॑ण्यहस्तो॒ वसु॑ नो॒ ररा॑णः ॥२॥
yā mā॑ la॒kṣmīḥ pa॑tayā॒lūraju॑ṣṭābhica॒skanda॒ vanda॑neva vṛ॒kṣam | a॒nyatrā॒smat sa॑vita॒stāmi॒to dhā॒ hira॑ṇyahasto॒ vasu॑ no॒ rarā॑ṇaḥ || २ ||
एक॑शतं ल॒क्ष्म्यो॒३मर्त्य॑स्य सा॒कं त॒न्वाऽज॒नुषोऽधि॑ जा॒ताः ।
तासां॒ पापि॑ष्ठा॒ निरि॒तः प्र हि॑ण्मः शि॒वा अ॒स्मभ्यं॑ जातवेदो॒ नि यच्छ ॥३॥
eka॑śataṃ la॒kṣmyo॒३martya॑sya sā॒kaṃ ta॒nvā’ja॒nuṣo’dhi॑ jā॒tāḥ | tāsāṃ॒ pāpi॑ṣṭhā॒ niri॒taḥ pra hi॑ṇmaḥ śi॒vā a॒smabhyaṃ॑ jātavedo॒ ni yaccha || ३ ||
ए॒ता ए॑ना॒ व्याक॑रं खि॒ले गा विष्ठि॑ता इव ।
रम॑न्तां॒ पुण्या॑ ल॒क्ष्मीर्याः पा॒पीस्ता अ॑नीनशम् ॥४॥
e॒tā e॑nā॒ vyāka॑raṃ khi॒le gā viṣṭhi॑tā iva | rama॑ntāṃ॒ puṇyā॑ la॒kṣmīryāḥ pā॒pīstā a॑nīnaśam || ४ ||