EeseDharmaSanātana Library
109काण्ड 7 · सूक्त 109
Atharvaveda Śaunaka Kand 7, Sukta 109.
7 shlokइ॒दमु॒ग्राय॑ ब॒भ्रवे॒ नमो॒ यो अ॒क्षेषु॑ तनूव॒शी।
घृ॒तेन॒ कलिं॑ शिक्षामि॒ स नो॑ मृडाती॒दृशे॑ ॥१॥
i॒damu॒grāya॑ ba॒bhrave॒ namo॒ yo a॒kṣeṣu॑ tanūva॒śī | ghṛ॒tena॒ kaliṃ॑ śikṣāmi॒ sa no॑ mṛḍātī॒dṛśe॑ || १ ||
घृ॒तम॑प्स॒राभ्यो॑ वह॒ त्वम॑ग्ने पां॒सून॒क्षेभ्यः॒ सिक॑ता अ॒पश्च॑ ।
य॒था॒भ॒गं ह॒व्यदा॑तिं जुषा॒णा मद॑न्ति दे॒वा उ॒भया॑नि ह॒व्या ॥२॥
ghṛ॒tama॑psa॒rābhyo॑ vaha॒ tvama॑gne pāṃ॒sūna॒kṣebhyaḥ॒ sika॑tā a॒paśca॑ | ya॒thā॒bha॒gaṃ ha॒vyadā॑tiṃ juṣā॒ṇā mada॑nti de॒vā u॒bhayā॑ni ha॒vyā || २ ||
अ॒प्स॒रसः॑ सध॒मादं॑ मदन्ति हवि॒र्धान॑मन्त॒रा सूर्यं॑ च ।
ता मे॒ हस्तौ॒ सं सृ॑जन्तु घृ॒तेन॑ स॒पत्नं॑ मे कित॒वं र॑न्धयन्तु ॥३॥
a॒psa॒rasaḥ॑ sadha॒mādaṃ॑ madanti havi॒rdhāna॑manta॒rā sūryaṃ॑ ca | tā me॒ hastau॒ saṃ sṛ॑jantu ghṛ॒tena॑ sa॒patnaṃ॑ me kita॒vaṃ ra॑ndhayantu || ३ ||
आ॒दि॒न॒वं प्र॑ति॒दीव्ने॑ घृ॒तेना॒स्माँ अ॒भि क्ष॑र ।
वृ॒क्षमि॑वा॒शन्या॑ जहि॒ यो अ॒स्मान् प्र॑ति॒दीव्य॑ति ॥४॥
ā॒di॒na॒vaṃ pra॑ti॒dīvne॑ ghṛ॒tenā॒smām̐ a॒bhi kṣa॑ra | vṛ॒kṣami॑vā॒śanyā॑ jahi॒ yo a॒smān pra॑ti॒dīvya॑ti || ४ ||
यो नो॑ द्यु॒वे धन॑मि॒दं च॒कार॒ यो अ॒क्षाणां॒ ग्लह॑नं॒ शेष॑णं च ।
स नो॑ दे॒वो ह॒विरि॒दं जु॑षा॒णो ग॑न्ध॒र्वेभिः॑ सध॒मादं॑ मदेम ॥५॥
yo no॑ dyu॒ve dhana॑mi॒daṃ ca॒kāra॒ yo a॒kṣāṇāṃ॒ glaha॑naṃ॒ śeṣa॑ṇaṃ ca | sa no॑ de॒vo ha॒viri॒daṃ ju॑ṣā॒ṇo ga॑ndha॒rvebhiḥ॑ sadha॒mādaṃ॑ madema || ५ ||
संव॑सव॒ इति॑ वो नाम॒धेय॑मुग्रंप॒श्या रा॑ष्ट्रभृतो॒ ह्य॑१क्षाः ।
तेभ्यो॑ व इन्दवो ह॒विषा॑ विधेम व॒यं स्या॑म॒ पत॑यो॒ रयी॒णाम् ॥६॥
saṃva॑sava॒ iti॑ vo nāma॒dheya॑mugraṃpa॒śyā rā॑ṣṭrabhṛto॒ hya॑१kṣāḥ | tebhyo॑ va indavo ha॒viṣā॑ vidhema va॒yaṃ syā॑ma॒ pata॑yo॒ rayī॒ṇām || ६ ||
दे॒वान् यन्ना॑थि॒तो हु॒वे ब्र॑ह्म॒चर्यं॒ यदू॑षि॒म।
अ॒क्षान् यद् ब॒भ्रूना॒लभे॒ ते नो॑ मृडन्त्वी॒दृशे॑ ॥७॥
de॒vān yannā॑thi॒to hu॒ve bra॑hma॒caryaṃ॒ yadū॑ṣi॒ma | a॒kṣān yad ba॒bhrūnā॒labhe॒ te no॑ mṛḍantvī॒dṛśe॑ || ७ ||