EeseDharmaSanātana Library
84काण्ड 6 · सूक्त 84
Atharvaveda Śaunaka Kand 6, Sukta 84.
4 shlokयस्या॑स्त आ॒सनि॑ घो॒रे जु॒होम्ये॒षां ब॒द्धाना॑मव॒सर्ज॑नाय॒ कम्।
भूमि॒रिति॑ त्वाभि॒प्रम॑न्वते॒ जना॒ निरृ॑ति॒रिति॑ त्वा॒हं परि॑ वेद स॒र्वतः॑ ॥१॥
yasyā॑sta ā॒sani॑ gho॒re ju॒homye॒ṣāṃ ba॒ddhānā॑mava॒sarja॑nāya॒ kam | bhūmi॒riti॑ tvābhi॒prama॑nvate॒ janā॒ nirṛ॑ti॒riti॑ tvā॒haṃ pari॑ veda sa॒rvataḥ॑ || १ ||
भूते॑ ह॒विष्म॑ती भवै॒ष ते॑ भा॒गो यो अ॒स्मासु॑ ।
मु॒ञ्चेमान॒मूनेन॑सः॒ स्वाहा॑ ॥२॥
bhūte॑ ha॒viṣma॑tī bhavai॒ṣa te॑ bhā॒go yo a॒smāsu॑ | mu॒ñcemāna॒mūnena॑saḥ॒ svāhā॑ || २ ||
ए॒वो ष्व॑१स्मन्नि॑रृतेऽने॒हा त्वम॑य॒स्मया॒न् वि चृ॑ता बन्धपा॒शान्।
य॒मो मह्यं॒ पुन॒रित् त्वां द॑दाति॒ तस्मै॑ य॒माय॒ नमो॑ अस्तु मृ॒त्यवे॑ ॥३॥
e॒vo ṣva॑१smanni॑rṛte’ne॒hā tvama॑ya॒smayā॒n vi cṛ॑tā bandhapā॒śān | ya॒mo mahyaṃ॒ puna॒rit tvāṃ da॑dāti॒ tasmai॑ ya॒māya॒ namo॑ astu mṛ॒tyave॑ || ३ ||
अ॒य॒स्मये॑ द्रुप॒दे बे॑धिष इ॒हाभिहि॑तो मृ॒त्युभि॒र्ये स॒हस्र॑म्।
य॒मेन॒ त्वं पि॒तृभिः॑ संविदा॒न उ॑त्त॒मं नाक॒मधि॑ रोहये॒मम् ॥४॥
a॒ya॒smaye॑ drupa॒de be॑dhiṣa i॒hābhihi॑to mṛ॒tyubhi॒rye sa॒hasra॑m | ya॒mena॒ tvaṃ pi॒tṛbhiḥ॑ saṃvidā॒na u॑tta॒maṃ nāka॒madhi॑ rohaye॒mam || ४ ||