EeseDharmaSanātana Library
63काण्ड 6 · सूक्त 63
Atharvaveda Śaunaka Kand 6, Sukta 63.
4 shlokयत् ते॑ दे॒वी निरृ॑तिराब॒बन्ध॒ दाम॑ ग्री॒वास्व॑विमो॒क्यं यत्।
तत् ते वि ष्या॒म्यायु॑षे॒ वर्च॑से॒ बला॑यादोम॒दमन्न॑मद्धि॒ प्रसू॑तः ॥१॥
yat te॑ de॒vī nirṛ॑tirāba॒bandha॒ dāma॑ grī॒vāsva॑vimo॒kyaṃ yat | tat te vi ṣyā॒myāyu॑ṣe॒ varca॑se॒ balā॑yādoma॒damanna॑maddhi॒ prasū॑taḥ || १ ||
नमो॑ऽस्तु ते निरृते तिग्मतेजोऽय॒स्मया॒न् वि चृ॑ता बन्धपा॒शान्।
य॒मो मह्यं॒ पुन॒रित् त्वां द॑दाति॒ तस्मै॑ य॒माय॒ नमो॑ अस्तु मृ॒त्यवे॑ ॥२॥
namo॑’stu te nirṛte tigmatejo’ya॒smayā॒n vi cṛ॑tā bandhapā॒śān | ya॒mo mahyaṃ॒ puna॒rit tvāṃ da॑dāti॒ tasmai॑ ya॒māya॒ namo॑ astu mṛ॒tyave॑ || २ ||
अ॒य॒स्मये॑ द्रुप॒दे बे॑धिषे इ॒हाभिहि॑तो मृ॒त्युभि॒र्ये स॒हस्र॑म्।
य॒मेन॒ त्वं पि॒तृभिः॑ संविदा॒न उ॑त्त॒मं नाक॒मधि॑ रोहये॒मम् ॥३॥
a॒ya॒smaye॑ drupa॒de be॑dhiṣe i॒hābhihi॑to mṛ॒tyubhi॒rye sa॒hasra॑m | ya॒mena॒ tvaṃ pi॒tṛbhiḥ॑ saṃvidā॒na u॑tta॒maṃ nāka॒madhi॑ rohaye॒mam || ३ ||
संस॒मिद् यु॑वसे वृष॒न्नग्ने॒ विश्वा॑न्य॒र्यृ आ।
इ॒डस्प॒दे समि॑ध्यसे॒ स नो॒ वसू॒न्या भ॑र ॥४॥
saṃsa॒mid yu॑vase vṛṣa॒nnagne॒ viśvā॑nya॒ryṛ ā | i॒ḍaspa॒de sami॑dhyase॒ sa no॒ vasū॒nyā bha॑ra || ४ ||