EeseDharmaSanātana Library
47काण्ड 6 · सूक्त 47
Atharvaveda Śaunaka Kand 6, Sukta 47.
3 shlokअ॒ग्निः प्रा॑तःसव॒ने पा॑त्व॒स्मान् वै॑श्वान॒रो वि॑श्व॒कृद् वि॒श्वशं॑भूः ।
स नः॑ पाव॒को द्रवि॑णे दधा॒त्वायु॑ष्मन्तः सहभ॑क्षाः स्याम ॥१॥
a॒gniḥ prā॑taḥsava॒ne pā॑tva॒smān vai॑śvāna॒ro vi॑śva॒kṛd vi॒śvaśaṃ॑bhūḥ | sa naḥ॑ pāva॒ko dravi॑ṇe dadhā॒tvāyu॑ṣmantaḥ sahabha॑kṣāḥ syāma || १ ||
विश्वे॑ दे॒वा म॒रुत॒ इन्द्रो॑ अ॒स्मान॒स्मिन् द्वि॒तीये॒ सव॑ने॒ न ज॑ह्युः ।
आयु॑ष्मन्तः प्रि॒यमे॑षां॒ वद॑न्तो व॒यं दे॒वानां॑ सुम॒तौ स्या॑म ॥२॥
viśve॑ de॒vā ma॒ruta॒ indro॑ a॒smāna॒smin dvi॒tīye॒ sava॑ne॒ na ja॑hyuḥ | āyu॑ṣmantaḥ pri॒yame॑ṣāṃ॒ vada॑nto va॒yaṃ de॒vānāṃ॑ suma॒tau syā॑ma || २ ||
इ॒दं तृ॒तीयं॒ सव॑नं कवी॒नामृ॒तेन॒ ये च॑म॒समैर॑यन्त ।
ते सौ॑धन्व॒नाः स्वऽरानशा॒नाः स्विऽष्टिं नो अ॒भि वस्यो॑ नयन्तु ॥३॥
i॒daṃ tṛ॒tīyaṃ॒ sava॑naṃ kavī॒nāmṛ॒tena॒ ye ca॑ma॒samaira॑yanta | te sau॑dhanva॒nāḥ sva’rānaśā॒nāḥ svi’ṣṭiṃ no a॒bhi vasyo॑ nayantu || ३ ||