EeseDharmaSanātana Library
38काण्ड 6 · सूक्त 38
Atharvaveda Śaunaka Kand 6, Sukta 38.
4 shlokसिं॒हे व्या॒घ्र उ॒त या पृदा॑कौ॒ त्विषि॑र॒ग्नौ ब्रा॑ह्म॒णे सूर्ये॒ या।
इन्द्रं॒ या दे॒वी सु॒भगा॑ ज॒जान॒ सा न॒ ऐतु॒ वर्च॑सा संविदा॒ना ॥१॥
siṃ॒he vyā॒ghra u॒ta yā pṛdā॑kau॒ tviṣi॑ra॒gnau brā॑hma॒ṇe sūrye॒ yā | indraṃ॒ yā de॒vī su॒bhagā॑ ja॒jāna॒ sā na॒ aitu॒ varca॑sā saṃvidā॒nā || १ ||
या ह॒स्तिनि॑ द्वी॒पिनि॒ या हिर॑ण्ये॒ त्विषि॑र॒प्सु गोषु॒ या पुरु॑षेषु ।
इन्द्रं॒ या दे॒वी सु॒भगा॑ ज॒जान॒ सा न॒ ऐतु॒ वर्च॑सा संविदा॒ना ॥२॥
yā ha॒stini॑ dvī॒pini॒ yā hira॑ṇye॒ tviṣi॑ra॒psu goṣu॒ yā puru॑ṣeṣu | indraṃ॒ yā de॒vī su॒bhagā॑ ja॒jāna॒ sā na॒ aitu॒ varca॑sā saṃvidā॒nā || २ ||
रथे॑ अ॒क्षेष्वृ॑ष॒भस्य॒ वाजे॒ वाते॑ प॒र्जन्ये॒ वरु॑णस्य॒ शुष्मे॑ ।
इन्द्रं॒ या दे॒वी सु॒भगा॑ ज॒जान॒ सा न॒ ऐतु॒ वर्च॑सा संविदा॒ना ॥३॥
rathe॑ a॒kṣeṣvṛ॑ṣa॒bhasya॒ vāje॒ vāte॑ pa॒rjanye॒ varu॑ṇasya॒ śuṣme॑ | indraṃ॒ yā de॒vī su॒bhagā॑ ja॒jāna॒ sā na॒ aitu॒ varca॑sā saṃvidā॒nā || ३ ||
रा॒ज॒न्येऽदुन्दु॒भावाय॑ताया॒मश्व॑स्य॒ वाजे॒ पुरु॑षस्य मा॒यौ।
इन्द्रं॒ या दे॒वी सु॒भगा॑ ज॒जान॒ सा न॒ ऐतु॒ वर्च॑सा संविदा॒ना ॥४॥
rā॒ja॒nye’dundu॒bhāvāya॑tāyā॒maśva॑sya॒ vāje॒ puru॑ṣasya mā॒yau | indraṃ॒ yā de॒vī su॒bhagā॑ ja॒jāna॒ sā na॒ aitu॒ varca॑sā saṃvidā॒nā || ४ ||