EeseDharmaSanātana Library
30काण्ड 6 · सूक्त 30
Atharvaveda Śaunaka Kand 6, Sukta 30.
3 shlokदे॒वा इ॒मं मधु॑ना॒ संयु॑तं॒ यवं॒ सर॑स्वत्या॒मधि॑ म॒णाव॑चर्कृषुः ।
इन्द्र॑ आसी॒त् सीर॑पतिः श॒तक्र॑तुः की॒नाशा॑ आसन् म॒रुतः॑ सु॒दान॑वः ॥१॥
de॒vā i॒maṃ madhu॑nā॒ saṃyu॑taṃ॒ yavaṃ॒ sara॑svatyā॒madhi॑ ma॒ṇāva॑carkṛṣuḥ | indra॑ āsī॒t sīra॑patiḥ śa॒takra॑tuḥ kī॒nāśā॑ āsan ma॒rutaḥ॑ su॒dāna॑vaḥ || १ ||
यस्ते॒ मदो॑ऽवके॒शो वि॑के॒शो येना॑भि॒हस्यं॒ पुरु॑षं कृ॒णोषि॑ ।
आ॒रात् त्वद॒न्या वना॑नि वृक्षि॒ त्वं श॑मि श॒तव॑ल्शा॒ वि रो॑ह ॥२॥
yaste॒ mado॑’vake॒śo vi॑ke॒śo yenā॑bhi॒hasyaṃ॒ puru॑ṣaṃ kṛ॒ṇoṣi॑ | ā॒rāt tvada॒nyā vanā॑ni vṛkṣi॒ tvaṃ śa॑mi śa॒tava॑lśā॒ vi ro॑ha || २ ||
बृह॑त्पलाशे॒ सुभ॑गे॒ वर्ष॑वृद्ध॒ ऋता॑वरि ।
मा॒तेव॑ पु॒त्रेभ्यो॑ मृड॒ केशे॑भ्यः शमि ॥३॥
bṛha॑tpalāśe॒ subha॑ge॒ varṣa॑vṛddha॒ ṛtā॑vari | mā॒teva॑ pu॒trebhyo॑ mṛḍa॒ keśe॑bhyaḥ śami || ३ ||