EeseDharmaSanātana Library
27काण्ड 6 · सूक्त 27
Atharvaveda Śaunaka Kand 6, Sukta 27.
3 shlokदेवाः॑ क॒पोत॑ इषि॒तो यदि॒छन् दू॒तो निरृ॑त्या इ॒दमा॑ज॒गाम॑ ।
तस्मा॑ अर्चाम कृ॒णवा॑म॒ निष्कृ॑तिं॒ शं नो अस्तु द्वि॒पदे॒ शं चतु॑ष्पदे ॥१॥
devāḥ॑ ka॒pota॑ iṣi॒to yadi॒chan dū॒to nirṛ॑tyā i॒damā॑ja॒gāma॑ | tasmā॑ arcāma kṛ॒ṇavā॑ma॒ niṣkṛ॑tiṃ॒ śaṃ no astu dvi॒pade॒ śaṃ catu॑ṣpade || १ ||
शि॒वः क॒पोत॒ इषि॒तो नो॑ अस्त्वना॒गा दे॑वाः शकु॒नो गृ॒हं नः॑ ।
अ॒ग्निर्हि विप्रो॑ जु॒षतां॑ ह॒विर्नः॒ परि॑ हे॒तिः प॒क्षिणी॑ नो वृणक्तु ॥२॥
śi॒vaḥ ka॒pota॒ iṣi॒to no॑ astvanā॒gā de॑vāḥ śaku॒no gṛ॒haṃ naḥ॑ | a॒gnirhi vipro॑ ju॒ṣatāṃ॑ ha॒virnaḥ॒ pari॑ he॒tiḥ pa॒kṣiṇī॑ no vṛṇaktu || २ ||
हे॒तिः प॒क्षिणी॒ न द॑भात्य॒स्माना॒ष्ट्री प॒दं कृ॑णुते अग्नि॒धाने॑ ।
शि॒वो गोभ्य॑ उ॒त पुरु॑षेभ्यो नो अस्तु॒ मा नो॑ देवा इ॒ह हिं॑सीत् क॒पोतः॑ ॥३॥
he॒tiḥ pa॒kṣiṇī॒ na da॑bhātya॒smānā॒ṣṭrī pa॒daṃ kṛ॑ṇute agni॒dhāne॑ | śi॒vo gobhya॑ u॒ta puru॑ṣebhyo no astu॒ mā no॑ devā i॒ha hiṃ॑sīt ka॒potaḥ॑ || ३ ||