EeseDharmaSanātana Library
139काण्ड 6 · सूक्त 139
Atharvaveda Śaunaka Kand 6, Sukta 139.
5 shlokन्य॒स्ति॒का रु॑रोहिथ सुभगं॒कर॑णी॒ मम॑ ।
श॒तं तव॑ प्रता॒नास्त्रय॑स्त्रिंशन्निता॒नाः ॥
तया॑ सहस्रप॒र्ण्या हृद॑यं शोषयामि ते ॥१॥
nya॒sti॒kā ru॑rohitha subhagaṃ॒kara॑ṇī॒ mama॑ | śa॒taṃ tava॑ pratā॒nāstraya॑striṃśannitā॒nāḥ || tayā॑ sahasrapa॒rṇyā hṛda॑yaṃ śoṣayāmi te || १ ||
शुष्य॑तु॒ मयि॑ ते॒ हृद॑य॒मथो॑ शुष्यत्वा॒स्यऽम्।
अथो॒ नि शु॑ष्य॒ मां कामे॒नाथो॒ शुष्का॑स्या चर ॥२॥
śuṣya॑tu॒ mayi॑ te॒ hṛda॑ya॒matho॑ śuṣyatvā॒sya’m | atho॒ ni śu॑ṣya॒ māṃ kāme॒nātho॒ śuṣkā॑syā cara || २ ||
सं॒वन॑नी समुष्प॒ला बभ्रु॒ कल्या॑णि॒ सं नु॑द ।
अमूं च॒ मां च॒ सं नु॑द समा॒नं हृद॑यं कृधि ॥३॥
saṃ॒vana॑nī samuṣpa॒lā babhru॒ kalyā॑ṇi॒ saṃ nu॑da | amūṃ ca॒ māṃ ca॒ saṃ nu॑da samā॒naṃ hṛda॑yaṃ kṛdhi || ३ ||
यथो॑द॒कमप॑पुषोऽप॒शुष्य॑त्या॒स्यऽम्।
ए॒वा नि शु॑ष्य॒ मां कामे॒नाथो॒ शुष्का॑स्या चर ॥४॥
yatho॑da॒kamapa॑puṣo’pa॒śuṣya॑tyā॒sya’m | e॒vā ni śu॑ṣya॒ māṃ kāme॒nātho॒ śuṣkā॑syā cara || ४ ||
यथा॑ नकु॒लो वि॒च्छिद्य॑ सं॒दधा॒त्यहिं॒ पुनः॑ ।
ए॒वा काम॑स्य॒ विच्छि॑न्नं॒ सं धे॑हि वीर्यावति ॥५॥
yathā॑ naku॒lo vi॒cchidya॑ saṃ॒dadhā॒tyahiṃ॒ punaḥ॑ | e॒vā kāma॑sya॒ vicchi॑nnaṃ॒ saṃ dhe॑hi vīryāvati || ५ ||