EeseDharmaSanātana Library
122काण्ड 6 · सूक्त 122
Atharvaveda Śaunaka Kand 6, Sukta 122.
5 shlokए॒तं भा॒गं परि॑ ददामि वि॒द्वान् विश्व॑कर्मन् प्रथम॒जा ऋ॒तस्य॑ ।
अ॒स्माभि॑र्द॒त्तं ज॒रसः॑ प॒रस्ता॒दच्छि॑न्नं॒ तन्तु॒मनु॒ सं त॑रेम ॥१॥
e॒taṃ bhā॒gaṃ pari॑ dadāmi vi॒dvān viśva॑karman prathama॒jā ṛ॒tasya॑ | a॒smābhi॑rda॒ttaṃ ja॒rasaḥ॑ pa॒rastā॒dacchi॑nnaṃ॒ tantu॒manu॒ saṃ ta॑rema || १ ||
त॒तं तन्तु॒मन्वेके॑ तरन्ति॒ येषां॑ द॒त्तं पित्र्य॒माय॑नेन ।
अ॒ब॒न्ध्वेके॒ दद॑तः प्र॒यच्छ॑न्तो॒ दातुं॒ चेच्छिक्षा॒न्त्स स्व॒र्ग ए॒व ॥२॥
ta॒taṃ tantu॒manveke॑ taranti॒ yeṣāṃ॑ da॒ttaṃ pitrya॒māya॑nena | a॒ba॒ndhveke॒ dada॑taḥ pra॒yaccha॑nto॒ dātuṃ॒ cecchikṣā॒ntsa sva॒rga e॒va || २ ||
अ॒न्वार॑भेथामनु॒संर॑भेथामे॒तं लो॒कं श्र॒द्दधा॑नाः सचन्ते ।
यद् वां॑ प॒क्वं परि॑विष्टम॒ग्नौ तस्य॒ गुप्त॑ये दम्पती॒ सं श्र॑येथाम् ॥३॥
a॒nvāra॑bhethāmanu॒saṃra॑bhethāme॒taṃ lo॒kaṃ śra॒ddadhā॑nāḥ sacante | yad vāṃ॑ pa॒kvaṃ pari॑viṣṭama॒gnau tasya॒ gupta॑ye dampatī॒ saṃ śra॑yethām || ३ ||
य॒ज्ञं यन्तं॒ मन॑सा बृ॒हन्त॑म॒न्वारो॑हामि॒ तप॑सा॒ सयो॑निः ।
उप॑हूता अग्ने ज॒रसः॑ प॒रस्ता॑त् तृ॒तीये॒ नाके॑ सध॒मादं॑ मदेम ॥४॥
ya॒jñaṃ yantaṃ॒ mana॑sā bṛ॒hanta॑ma॒nvāro॑hāmi॒ tapa॑sā॒ sayo॑niḥ | upa॑hūtā agne ja॒rasaḥ॑ pa॒rastā॑t tṛ॒tīye॒ nāke॑ sadha॒mādaṃ॑ madema || ४ ||
शु॒द्धाः पू॒ता यो॒षितो॑ य॒ज्ञिया॑ इ॒मा ब्र॒ह्मणां॒ हस्ते॑षु प्रपृ॒थक् सा॑दयामि ।
यत्का॑म इ॒दम॑भिषि॒ञ्चामि॑ वो॒ऽहमिन्द्रो॑ म॒रुत्वा॒न्त्स ददातु॒ तन्मे॑ ॥५॥
śu॒ddhāḥ pū॒tā yo॒ṣito॑ ya॒jñiyā॑ i॒mā bra॒hmaṇāṃ॒ haste॑ṣu prapṛ॒thak sā॑dayāmi | yatkā॑ma i॒dama॑bhiṣi॒ñcāmi॑ vo॒’hamindro॑ ma॒rutvā॒ntsa dadātu॒ tanme॑ || ५ ||