EeseDharmaSanātana Library
108काण्ड 6 · सूक्त 108
Atharvaveda Śaunaka Kand 6, Sukta 108.
5 shlokत्वं नो॑ मेधे प्रथ॒मा गोभि॒रश्वे॑भि॒रा ग॑हि ।
त्वं सूर्य॑स्य र॒श्मिभि॒स्त्वं नो॑ असि य॒ज्ञिया॑ ॥१॥
tvaṃ no॑ medhe pratha॒mā gobhi॒raśve॑bhi॒rā ga॑hi | tvaṃ sūrya॑sya ra॒śmibhi॒stvaṃ no॑ asi ya॒jñiyā॑ || १ ||
मे॒धाम॒हं प्र॑थ॒मां ब्रह्म॑ण्वतीं॒ ब्रह्म॑जूता॒मृषि॑ष्टुताम्।
प्रपी॑तां ब्रह्मचा॒रिभि॑र्दे॒वाना॒मव॑से हुवे ॥२॥
me॒dhāma॒haṃ pra॑tha॒māṃ brahma॑ṇvatīṃ॒ brahma॑jūtā॒mṛṣi॑ṣṭutām | prapī॑tāṃ brahmacā॒ribhi॑rde॒vānā॒mava॑se huve || २ ||
यां मे॒धामृ॒भवो॑ वि॒दुर्यां मे॒धामसु॑रा वि॒दुः ।
ऋष॑यो भ॒द्रां मे॒धां यां वि॒दुस्तां मय्या वे॑शयामसि ॥३॥
yāṃ me॒dhāmṛ॒bhavo॑ vi॒duryāṃ me॒dhāmasu॑rā vi॒duḥ | ṛṣa॑yo bha॒drāṃ me॒dhāṃ yāṃ vi॒dustāṃ mayyā ve॑śayāmasi || ३ ||
यामृष॑यो भूत॒कृतो॑ मे॒धां मे॑धा॒विनो॑ वि॒दुः ।
तया॒ माम॒द्य मे॒धयाग्ने॑ मेधा॒विनं॑ कृणु ॥४॥
yāmṛṣa॑yo bhūta॒kṛto॑ me॒dhāṃ me॑dhā॒vino॑ vi॒duḥ | tayā॒ māma॒dya me॒dhayāgne॑ medhā॒vinaṃ॑ kṛṇu || ४ ||
मे॒धां सा॒यं मे॒धां प्रा॒तर्मे॒धां म॒ध्यन्दि॑नं॒ परि॑ ।
मे॒धां सूर्य॑स्य र॒श्मिभि॒र्वच॒सा वे॑शयामहे ॥५॥
me॒dhāṃ sā॒yaṃ me॒dhāṃ prā॒tarme॒dhāṃ ma॒dhyandi॑naṃ॒ pari॑ | me॒dhāṃ sūrya॑sya ra॒śmibhi॒rvaca॒sā ve॑śayāmahe || ५ ||