EeseDharmaSanātana Library
8काण्ड 5 · सूक्त 8
Atharvaveda Śaunaka Kand 5, Sukta 8.
9 shlokवै॒क॒ङ्क॒तेने॒ध्मेन॑ दे॒वेभ्य॒ आज्यं॑ वह ।
अग्ने॒ ताँ इ॒ह मा॑दय॒ सर्व॑ आ य॑न्तु मे॒ हव॑म् ॥१॥
vai॒ka॒ṅka॒tene॒dhmena॑ de॒vebhya॒ ājyaṃ॑ vaha | agne॒ tām̐ i॒ha mā॑daya॒ sarva॑ ā ya॑ntu me॒ hava॑m || १ ||
इन्द्रा या॑हि मे॒ हव॑मि॒दं क॑रिष्यामि॒ तच्छृ॑णु ।
इ॒म ऐ॒न्द्रा अ॑तिस॒रा आकू॑तिं॒ सं न॑मन्तु मे ।
तेभिः॑ शकेम वी॒र्यं१ जात॑वेद॒स्तनू॑वशिन् ॥२॥
indrā yā॑hi me॒ hava॑mi॒daṃ ka॑riṣyāmi॒ tacchṛ॑ṇu | i॒ma ai॒ndrā a॑tisa॒rā ākū॑tiṃ॒ saṃ na॑mantu me | tebhiḥ॑ śakema vī॒ryaṃ१ jāta॑veda॒stanū॑vaśin || २ ||
यद॒साव॒मुतो॑ देवा अदे॒वः संश्चिकी॑र्षति ।
मा तस्या॒ग्निर्ह॒व्यं वा॑क्षी॒द्धवं॑ दे॒वा अ॑स्य॒ मोप॑ गु॒र्ममै॒व हव॒मेत॑न ॥३॥
yada॒sāva॒muto॑ devā ade॒vaḥ saṃścikī॑rṣati | mā tasyā॒gnirha॒vyaṃ vā॑kṣī॒ddhavaṃ॑ de॒vā a॑sya॒ mopa॑ gu॒rmamai॒va hava॒meta॑na || ३ ||
अति॑ धावतातिसरा॒ इन्द्र॑स्य॒ वच॑सा हत ।
अविं॒ वृक॑ इव मथ्नीत॒ स वो॒ जीव॒न्मा मो॑चि प्रा॒णम॒स्यापि॑ नह्यत ॥४॥
ati॑ dhāvatātisarā॒ indra॑sya॒ vaca॑sā hata | aviṃ॒ vṛka॑ iva mathnīta॒ sa vo॒ jīva॒nmā mo॑ci prā॒ṇama॒syāpi॑ nahyata || ४ ||
यम॒मी पु॑रोदधि॒रे ब्र॒ह्माण॒मप॑भूतये ।
इन्द्र॒ स ते॑ अधस्प॒दं तं प्रत्य॑स्यामि मृ॒त्यवे॑ ॥५॥
yama॒mī pu॑rodadhi॒re bra॒hmāṇa॒mapa॑bhūtaye | indra॒ sa te॑ adhaspa॒daṃ taṃ pratya॑syāmi mṛ॒tyave॑ || ५ ||
यदि॑ प्रे॒युर्देव॑पु॒रा ब्रह्म॒ वर्मा॑णि चक्रि॒रे।
त॒नू॒पानं॑ परि॒पाणं॑ कृण्वा॒ना यदु॑पोचि॒रे सर्वं॒ तद॑र॒सं कृ॑धि ॥६॥
yadi॑ pre॒yurdeva॑pu॒rā brahma॒ varmā॑ṇi cakri॒re | ta॒nū॒pānaṃ॑ pari॒pāṇaṃ॑ kṛṇvā॒nā yadu॑poci॒re sarvaṃ॒ tada॑ra॒saṃ kṛ॑dhi || ६ ||
यान॒साव॑तिस॒रांश्च॒कार॑ कृ॒णव॑च्च॒ यान्।
त्वं तानि॑न्द्र वृत्रहन् प्र॒तीचः॒ पुन॒रा कृ॑धि॒ यथा॒मुं तृ॒णहां॒ जन॑म् ॥७॥
yāna॒sāva॑tisa॒rāṃśca॒kāra॑ kṛ॒ṇava॑cca॒ yān | tvaṃ tāni॑ndra vṛtrahan pra॒tīcaḥ॒ puna॒rā kṛ॑dhi॒ yathā॒muṃ tṛ॒ṇahāṃ॒ jana॑m || ७ ||
यथेन्द्र॑ उ॒द्वाच॑नं ल॒ब्ध्वा च॒क्रे अ॑धस्प॒दम्।
कृ॒ण्वे॒३ऽहमध॑रां॒स्तथा॒मूञ्छ॑श्व॒तीभ्यः॒ समा॑भ्यः ॥८॥
yathendra॑ u॒dvāca॑naṃ la॒bdhvā ca॒kre a॑dhaspa॒dam | kṛ॒ṇve॒३’hamadha॑rāṃ॒stathā॒mūñcha॑śva॒tībhyaḥ॒ samā॑bhyaḥ || ८ ||
अत्रै॑नानिन्द्र वृत्रहन्नु॒ग्रो मर्म॑णि विध्य ।
अत्रै॒वैना॑न॒भि ति॒ष्ठेन्द्र मे॒द्य॑१हं तव॑ ।
अनु॑ त्वे॒न्द्रा र॑भामहे॒ स्याम॑ सुम॒तौ तव॑ ॥९॥
atrai॑nānindra vṛtrahannu॒gro marma॑ṇi vidhya | atrai॒vainā॑na॒bhi ti॒ṣṭhendra me॒dya॑१haṃ tava॑ | anu॑ tve॒ndrā ra॑bhāmahe॒ syāma॑ suma॒tau tava॑ || ९ ||