EeseDharmaSanātana Library
7काण्ड 5 · सूक्त 7
Atharvaveda Śaunaka Kand 5, Sukta 7.
10 shlok१ विराड्गर्भा प्रस्तारपङ्क्तिः, ४ पथ्याबृहती, ६ प्रस्तारपङ्क्तिः।
आ नो॑ भर॒ मा परि॑ ष्ठा अराते॒ मा नो॑ रक्षी॒र्दक्षि॑णां नी॒यमा॑नाम्।
नमो॑ वी॒र्त्साया॒ अस॑मृद्धये॒ नमो॑ अ॒स्त्वरा॑तये ॥१॥
१ virāḍgarbhā prastārapaṅktiḥ, ४ pathyābṛhatī, ६ prastārapaṅktiḥ | ā no॑ bhara॒ mā pari॑ ṣṭhā arāte॒ mā no॑ rakṣī॒rdakṣi॑ṇāṃ nī॒yamā॑nām | namo॑ vī॒rtsāyā॒ asa॑mṛddhaye॒ namo॑ a॒stvarā॑taye || १ ||
यम॑राते पुरोध॒त्से पुरु॑षं परिरा॒पिण॑म्।
नम॑स्ते॒ तस्मै॑ कृण्मो॒ मा व॒निं व्य॑थयी॒र्मम॑ ॥२॥
yama॑rāte purodha॒tse puru॑ṣaṃ parirā॒piṇa॑m | nama॑ste॒ tasmai॑ kṛṇmo॒ mā va॒niṃ vya॑thayī॒rmama॑ || २ ||
प्र णो॑ व॒निर्दे॒वकृ॑ता॒ दिवा॒ नक्तं॑ च कल्पताम्।
अरा॑तिमनु॒प्रेमो॑ व॒यं नमो॑ अ॒स्त्वरा॑तये ॥३॥
pra ṇo॑ va॒nirde॒vakṛ॑tā॒ divā॒ naktaṃ॑ ca kalpatām | arā॑timanu॒premo॑ va॒yaṃ namo॑ a॒stvarā॑taye || ३ ||
सर॑स्वती॒मनु॑मतिं॒ भगं॒ यन्तो॑ हवामहे ।
वाचं॑ जु॒ष्टां मधु॑मतीमवादिषं दे॒वानां॑ दे॒वहू॑तिषु ॥४॥
sara॑svatī॒manu॑matiṃ॒ bhagaṃ॒ yanto॑ havāmahe | vācaṃ॑ ju॒ṣṭāṃ madhu॑matīmavādiṣaṃ de॒vānāṃ॑ de॒vahū॑tiṣu || ४ ||
यं याचा॑म्य॒हं वा॒चा सर॑स्वत्या मनो॒युजा॑ ।
श्र॒द्धा तम॒द्य वि॑न्दतु द॒त्ता सोमे॑न ब॒भ्रुणा॑ ॥५॥
yaṃ yācā॑mya॒haṃ vā॒cā sara॑svatyā mano॒yujā॑ | śra॒ddhā tama॒dya vi॑ndatu da॒ttā some॑na ba॒bhruṇā॑ || ५ ||
मा व॒निं मा वाचं॑ नो॒ वीर्त्सी॑रु॒भावि॑न्द्रा॒ग्नी आ भ॑रतां नो॒ वसू॑नि ।
सर्वे॑ नो अ॒द्य दित्स॒न्तोऽरा॑तिं॒ प्रति॑ हर्यत ॥६॥
mā va॒niṃ mā vācaṃ॑ no॒ vīrtsī॑ru॒bhāvi॑ndrā॒gnī ā bha॑ratāṃ no॒ vasū॑ni | sarve॑ no a॒dya ditsa॒nto’rā॑tiṃ॒ prati॑ haryata || ६ ||
प॒रोऽपे॑ह्यसमृद्धे॒ वि ते॑ हे॒तिं न॑यामसि ।
वेद॑ त्वा॒हं नि॒मीव॑न्तीं नितु॒दन्ती॑मराते ॥७॥
pa॒ro’pe॑hyasamṛddhe॒ vi te॑ he॒tiṃ na॑yāmasi | veda॑ tvā॒haṃ ni॒mīva॑ntīṃ nitu॒dantī॑marāte || ७ ||
उ॒त न॒ग्ना बोभु॑वती स्वप्न॒या स॑चसे॒ जन॑म्।
अरा॑ते चि॒त्तं वीर्त्स॒न्त्याकू॑तिं॒ पुरु॑षस्य च ॥८॥
u॒ta na॒gnā bobhu॑vatī svapna॒yā sa॑case॒ jana॑m | arā॑te ci॒ttaṃ vīrtsa॒ntyākū॑tiṃ॒ puru॑ṣasya ca || ८ ||
या म॑ह॒ती म॒होन्मा॑ना॒ विश्वा॒ आशा॑ व्यान॒शे।
तस्यै॑ हिरण्यके॒श्यै निरृ॑त्या अकरं॒ नमः॑ ॥९॥
yā ma॑ha॒tī ma॒honmā॑nā॒ viśvā॒ āśā॑ vyāna॒śe | tasyai॑ hiraṇyake॒śyai nirṛ॑tyā akaraṃ॒ namaḥ॑ || ९ ||
हिर॑ण्यवर्णा सु॒भगा॒ हिर॑ण्यकशिपुर्म॒ही।
तस्यै॒ हिर॑ण्यद्राप॒येऽरा॑त्या अकरं॒ नमः॑ ॥१०॥
hira॑ṇyavarṇā su॒bhagā॒ hira॑ṇyakaśipurma॒hī | tasyai॒ hira॑ṇyadrāpa॒ye’rā॑tyā akaraṃ॒ namaḥ॑ || १० ||