EeseDharmaSanātana Library
5काण्ड 5 · सूक्त 5
Atharvaveda Śaunaka Kand 5, Sukta 5.
9 shlokरात्री॑ मा॒ता नभः॑ पि॒तार्य॒मा ते॑ पिताम॒हः ।
सि॒ला॒ची नाम॒ वा अ॑सि॒ सा दे॒वाना॑मसि॒ स्वसा॑ ॥१॥
rātrī॑ mā॒tā nabhaḥ॑ pi॒tārya॒mā te॑ pitāma॒haḥ | si॒lā॒cī nāma॒ vā a॑si॒ sā de॒vānā॑masi॒ svasā॑ || १ ||
यस्त्वा॒ पिब॑ति॒ जीव॑ति॒ त्राय॑से॒ पुरु॑षं॒ त्वम्।
भ॒र्त्री हि शश्व॑ता॒मसि॒ जना॑नां च॒ न्यञ्च॑नी ॥२॥
yastvā॒ piba॑ti॒ jīva॑ti॒ trāya॑se॒ puru॑ṣaṃ॒ tvam | bha॒rtrī hi śaśva॑tā॒masi॒ janā॑nāṃ ca॒ nyañca॑nī || २ ||
वृ॒क्षंवृ॑क्ष॒मा रो॑हसि वृष॒ण्यन्ती॑व क॒न्यला॑ ।
जय॑न्ती प्रत्या॒तिष्ठ॑न्ती॒ स्पर॑णी॒ नाम॒ वा अ॑सि ॥३॥
vṛ॒kṣaṃvṛ॑kṣa॒mā ro॑hasi vṛṣa॒ṇyantī॑va ka॒nyalā॑ | jaya॑ntī pratyā॒tiṣṭha॑ntī॒ spara॑ṇī॒ nāma॒ vā a॑si || ३ ||
यद् द॒ण्डेन॒ यदिष्वा॒ यद् वारु॒र्हर॑सा कृ॒तम्।
तस्य॒ त्वम॑सि॒ निष्कृ॑तिः॒ सेमं निष्कृ॑धि॒ पूरु॑षम् ॥४॥
yad da॒ṇḍena॒ yadiṣvā॒ yad vāru॒rhara॑sā kṛ॒tam | tasya॒ tvama॑si॒ niṣkṛ॑tiḥ॒ semaṃ niṣkṛ॑dhi॒ pūru॑ṣam || ४ ||
भ॒द्रात् प्ल॒क्षान्निस्ति॑ष्ठस्यश्व॒त्थात् ख॑दि॒राद्ध॒वात्।
भ॒द्रान्न्य॒ग्रोधा॑त् प॒र्णात् सा न॒ एह्य॑रुन्धति ॥५॥
bha॒drāt pla॒kṣānnisti॑ṣṭhasyaśva॒tthāt kha॑di॒rāddha॒vāt | bha॒drānnya॒grodhā॑t pa॒rṇāt sā na॒ ehya॑rundhati || ५ ||
हिर॑ण्यवर्णे॒ सुभ॑गे॒ सूर्य॑वर्णे॒ वपु॑ष्टमे ।
रु॒तं ग॑छासि निष्कृते॒ निष्कृ॑ति॒र्नाम॒ वा अ॑सि ॥६॥
hira॑ṇyavarṇe॒ subha॑ge॒ sūrya॑varṇe॒ vapu॑ṣṭame | ru॒taṃ ga॑chāsi niṣkṛte॒ niṣkṛ॑ti॒rnāma॒ vā a॑si || ६ ||
हिर॑ण्यवर्णे॒ सुभ॑गे॒ शुष्मे॒ लोम॑शवक्षने ।
अ॒पाम॑सि॒ स्वसा॒ लाक्षे॒ वातो॑ हा॒त्मा ब॑भूव ते ॥७॥
hira॑ṇyavarṇe॒ subha॑ge॒ śuṣme॒ loma॑śavakṣane | a॒pāma॑si॒ svasā॒ lākṣe॒ vāto॑ hā॒tmā ba॑bhūva te || ७ ||
सि॒ला॒ची नाम॑ कानी॒नोऽज॑बभ्रु पि॒ता तव॑ ।
अश्वो॑ य॒मस्य॒ यः श्या॒वस्तस्य॑ हा॒स्नास्यु॑क्षि॒ता ॥८॥
si॒lā॒cī nāma॑ kānī॒no’ja॑babhru pi॒tā tava॑ | aśvo॑ ya॒masya॒ yaḥ śyā॒vastasya॑ hā॒snāsyu॑kṣi॒tā || ८ ||
अश्व॑स्या॒स्नः संप॑तिता॒ सा वृ॒क्षां अ॒भि सि॑ष्यदे ।
स॒रा प॑त॒त्रिणी॑ भू॒त्वा सा न॒ एह्य॑रुन्धति ॥९॥
aśva॑syā॒snaḥ saṃpa॑titā॒ sā vṛ॒kṣāṃ a॒bhi si॑ṣyade | sa॒rā pa॑ta॒triṇī॑ bhū॒tvā sā na॒ ehya॑rundhati || ९ ||