EeseDharmaSanātana Library
4काण्ड 5 · सूक्त 4
Atharvaveda Śaunaka Kand 5, Sukta 4.
10 shlokयो गि॒रिष्वजा॑यथा वी॒रुधां॒ बल॑वत्तमः ।
कुष्ठेहि॑ तक्मनाशन त॒क्मानं॑ ना॒शय॑न्नि॒तः ॥१॥
yo gi॒riṣvajā॑yathā vī॒rudhāṃ॒ bala॑vattamaḥ | kuṣṭhehi॑ takmanāśana ta॒kmānaṃ॑ nā॒śaya॑nni॒taḥ || १ ||
सु॒प॒र्ण॒सुव॑ने गि॒रौ जा॒तं हि॒मव॑त॒स्परि॑ ।
धनै॑र॒भि श्रु॒त्वा य॑न्ति वि॒दुर्हि त॑क्म॒नाश॑नम् ॥२॥
su॒pa॒rṇa॒suva॑ne gi॒rau jā॒taṃ hi॒mava॑ta॒spari॑ | dhanai॑ra॒bhi śru॒tvā ya॑nti vi॒durhi ta॑kma॒nāśa॑nam || २ ||
अ॒श्व॒त्थो दे॑व॒सद॑नस्तृ॒तीय॑स्यामि॒तो दि॒वि।
तत्रा॒मृत॑स्य चक्ष॑णं दे॒वाः कुष्ठ॑मवन्वत ॥३॥
a॒śva॒ttho de॑va॒sada॑nastṛ॒tīya॑syāmi॒to di॒vi | tatrā॒mṛta॑sya cakṣa॑ṇaṃ de॒vāḥ kuṣṭha॑mavanvata || ३ ||
हि॒र॒ण्ययी॒ नौर॑चर॒द्धिर॑ण्यबन्धना दि॒वि।
तत्रा॒मृत॑स्य॒ पुष्पं॑ दे॒वाः कुष्ठ॑मवन्वत ॥४॥
hi॒ra॒ṇyayī॒ naura॑cara॒ddhira॑ṇyabandhanā di॒vi | tatrā॒mṛta॑sya॒ puṣpaṃ॑ de॒vāḥ kuṣṭha॑mavanvata || ४ ||
हि॒र॒ण्ययाः॒ पन्था॑न आस॒न्नरि॑त्राणि हिर॒ण्यया॑ ।
नावो॑ हिर॒ण्ययी॑रास॒न् याभिः॒ कुष्ठं॑ नि॒राव॑हन् ॥५॥
hi॒ra॒ṇyayāḥ॒ panthā॑na āsa॒nnari॑trāṇi hira॒ṇyayā॑ | nāvo॑ hira॒ṇyayī॑rāsa॒n yābhiḥ॒ kuṣṭhaṃ॑ ni॒rāva॑han || ५ ||
इ॒मं मे॑ कुष्ठ॒ पूरु॑षं॒ तमा व॑ह॒ तं निष्कु॑रु ।
तमु॑ मे अग॒दं कृ॑धि ॥६॥
i॒maṃ me॑ kuṣṭha॒ pūru॑ṣaṃ॒ tamā va॑ha॒ taṃ niṣku॑ru | tamu॑ me aga॒daṃ kṛ॑dhi || ६ ||
दे॒वेभ्यो॒ अधि॑ जा॒तोऽसि॒ सोम॑स्यासि॒ सखा॑ हि॒तः ।
स प्रा॒णाय॑ व्या॒नाय॒ च॑क्षुषे मे अ॒स्मै मृ॑ड ॥७॥
de॒vebhyo॒ adhi॑ jā॒to’si॒ soma॑syāsi॒ sakhā॑ hi॒taḥ | sa prā॒ṇāya॑ vyā॒nāya॒ ca॑kṣuṣe me a॒smai mṛ॑ḍa || ७ ||
उद॑ङ् जा॒तो हि॒मव॑तः॒ स प्रा॒च्यां नी॑यसे॒ जन॑म्।
तत्र॑ कुष्ठ॑स्य॒ नामा॑न्युत्त॒मानि॒ वि भे॑जिरे ॥८॥
uda॑ṅ jā॒to hi॒mava॑taḥ॒ sa prā॒cyāṃ nī॑yase॒ jana॑m | tatra॑ kuṣṭha॑sya॒ nāmā॑nyutta॒māni॒ vi bhe॑jire || ८ ||
उ॒त्त॒मो नाम॑ कुष्ठस्युत्त॒मो नाम॑ ते पि॒ता।
यक्ष्मं॑ च॒ सर्वं॑ ना॒शय॑ त॒क्मानं॑ चार॒सं कृ॑धि ॥९॥
u॒tta॒mo nāma॑ kuṣṭhasyutta॒mo nāma॑ te pi॒tā | yakṣmaṃ॑ ca॒ sarvaṃ॑ nā॒śaya॑ ta॒kmānaṃ॑ cāra॒saṃ kṛ॑dhi || ९ ||
शी॒र्षा॒म॒यमु॑पह॒त्याम॒क्ष्योस्त॒न्वो॒३रपः॑ ।
कुष्ठ॒स्तत् सर्वं॒ निष्क॑र॒द् दैवं॑ समह॒ वृष्ण्य॑म् ॥१०॥
śī॒rṣā॒ma॒yamu॑paha॒tyāma॒kṣyosta॒nvo॒३rapaḥ॑ | kuṣṭha॒stat sarvaṃ॒ niṣka॑ra॒d daivaṃ॑ samaha॒ vṛṣṇya॑m || १० ||