EeseDharmaSanātana Library
31काण्ड 5 · सूक्त 31
Atharvaveda Śaunaka Kand 5, Sukta 31.
12 shlokयां ते॑ च॒क्रुरा॒मे पात्रे॒ यां च॒क्रुर्मि॒श्रधा॑न्ये ।
आ॒मे मां॒से कृ॒त्यां यां च॒क्रुः पुनः॒ प्रति॑ हरामि॒ ताम् ॥१॥
yāṃ te॑ ca॒krurā॒me pātre॒ yāṃ ca॒krurmi॒śradhā॑nye | ā॒me māṃ॒se kṛ॒tyāṃ yāṃ ca॒kruḥ punaḥ॒ prati॑ harāmi॒ tām || १ ||
यां ते॑ च॒क्रुः कृ॑क॒वाका॑व॒जे वा॒ यां कु॑री॒रिणि॑ ।
अव्यां॑ ते कृ॒त्यां यां च॒क्रुः पुनः॒ प्रति॑ हरामि॒ ताम् ॥२॥
yāṃ te॑ ca॒kruḥ kṛ॑ka॒vākā॑va॒je vā॒ yāṃ ku॑rī॒riṇi॑ | avyāṃ॑ te kṛ॒tyāṃ yāṃ ca॒kruḥ punaḥ॒ prati॑ harāmi॒ tām || २ ||
यां ते॑ च॒क्रुरेक॑शफे पशू॒नामु॑भ॒याद॑ति ।
ग॒र्द॒भे कृ॒त्यां यां च॒क्रुः पुनः॒ प्रति॑ हरामि॒ ताम् ॥३॥
yāṃ te॑ ca॒krureka॑śaphe paśū॒nāmu॑bha॒yāda॑ti | ga॒rda॒bhe kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ३ ||
यां ते॑ च॒क्रुर॑मू॒लायां॑ वल॒गं वा॑ नरा॒च्याम्।
क्षेत्रे॑ ते कृ॒त्यां यां च॒क्रुः पुनः॒ प्रति॑ हरामि॒ ताम् ॥४॥
yāṃ te॑ ca॒krura॑mū॒lāyāṃ॑ vala॒gaṃ vā॑ narā॒cyām | kṣetre॑ te kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ४ ||
यां ते॑ च॒क्रुर्गार्ह॑पत्ये पूर्वा॒ग्नावु॒त दु॒श्चितः॑ ।
शाला॑यां कृ॒त्यां यां च॒क्रुः पुनः॒ प्रति॑ हरामि॒ ताम् ॥५॥
yāṃ te॑ ca॒krurgārha॑patye pūrvā॒gnāvu॒ta du॒ścitaḥ॑ | śālā॑yāṃ kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ५ ||
यां ते॑ च॒क्रुः स॒भायां॒ यां च॒क्रुर॑धि॒देव॑ने ।
अ॒क्षेषु॑ कृ॒त्यां यां च॒क्रुः पुनः॒ प्रति॑ हरामि॒ ताम् ॥६॥
yāṃ te॑ ca॒kruḥ sa॒bhāyāṃ॒ yāṃ ca॒krura॑dhi॒deva॑ne | a॒kṣeṣu॑ kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ६ ||
यां ते॑ च॒क्रुः सेना॑यां॒ यां च॒क्रुरि॑ष्वायु॒धे।
दु॒न्दु॒भौ कृ॒त्यां यां च॒क्रुः पुनः॒ प्रति॑ हरामि॒ ताम् ॥७॥
yāṃ te॑ ca॒kruḥ senā॑yāṃ॒ yāṃ ca॒kruri॑ṣvāyu॒dhe | du॒ndu॒bhau kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ७ ||
यां ते॑ कृ॒त्यां कूपे॑ऽवद॒धुः श्म॑शा॒ने वा॑ निच॒ख्नुः ।
सद्म॑नि कृ॒त्यां यां च॒क्रुः पुनः॒ प्रति॑ हरामि॒ ताम् ॥८॥
yāṃ te॑ kṛ॒tyāṃ kūpe॑’vada॒dhuḥ śma॑śā॒ne vā॑ nica॒khnuḥ | sadma॑ni kṛ॒tyāṃ yāṃ ca॒kruḥ punaḥ॒ prati॑ harāmi॒ tām || ८ ||
यां ते॑ च॒क्रुः पु॑रुषा॒स्थे अ॒ग्नौ संक॑सुके च॒ याम्।
म्रो॒कं नि॑र्दा॒हं क्र॒व्यादं॒ पुनः॒ प्रति॑ हरामि॒ ताम् ॥९॥
yāṃ te॑ ca॒kruḥ pu॑ruṣā॒sthe a॒gnau saṃka॑suke ca॒ yām | mro॒kaṃ ni॑rdā॒haṃ kra॒vyādaṃ॒ punaḥ॒ prati॑ harāmi॒ tām || ९ ||
अप॑थे॒ना ज॑भारैणां॒ तां प॒थेतः प्र हि॑ण्मसि ।
अधी॑रो मर्या॒धीरे॑भ्यः॒ सं ज॑भा॒राचि॑त्त्या ॥१०॥
apa॑the॒nā ja॑bhāraiṇāṃ॒ tāṃ pa॒thetaḥ pra hi॑ṇmasi | adhī॑ro maryā॒dhīre॑bhyaḥ॒ saṃ ja॑bhā॒rāci॑ttyā || १० ||
यश्च॒कार॒ न श॒शाक॒ कर्तुं॑ श॒श्रे पाद॑म॒ङ्गुरि॑म्।
च॒कार॑ भ॒द्रम॒स्मभ्य॑मभ॒गो भग॑वद्भ्यः ॥११॥
yaśca॒kāra॒ na śa॒śāka॒ kartuṃ॑ śa॒śre pāda॑ma॒ṅguri॑m | ca॒kāra॑ bha॒drama॒smabhya॑mabha॒go bhaga॑vadbhyaḥ || ११ ||
कृ॒त्या॒कृतं॑ वल॒गिनं॑ मू॒लिनं॑ शपथे॒य्यऽम्।
इन्द्र॒स्तं ह॑न्तु मह॒ता व॒धेना॒ग्निर्वि॑ध्यत्व॒स्तया॑ ॥१२॥
kṛ॒tyā॒kṛtaṃ॑ vala॒ginaṃ॑ mū॒linaṃ॑ śapathe॒yya’m | indra॒staṃ ha॑ntu maha॒tā va॒dhenā॒gnirvi॑dhyatva॒stayā॑ || १२ ||