EeseDharmaSanātana Library
29काण्ड 5 · सूक्त 29
Atharvaveda Śaunaka Kand 5, Sukta 29.
15 shlokपु॒रस्ता॑द् यु॒क्तो व॑ह जातवे॒दोऽग्ने॑ वि॒द्धि क्रि॒यमा॑णं॒ यथे॒दम्।
त्वं भि॒षग् भे॑ष॒जस्या॑सि क॒र्ता त्वया॒ गामश्वं॒ पुरु॑षं सनेम ॥१॥
pu॒rastā॑d yu॒kto va॑ha jātave॒do’gne॑ vi॒ddhi kri॒yamā॑ṇaṃ॒ yathe॒dam | tvaṃ bhi॒ṣag bhe॑ṣa॒jasyā॑si ka॒rtā tvayā॒ gāmaśvaṃ॒ puru॑ṣaṃ sanema || १ ||
तथा॒ तद॑ग्ने कृणु जातवेदो॒ विश्वे॑भिर्दे॒वैः स॒ह सं॑विदा॒नः ।
यो नो॑ दि॒देव॑ यत॒मो ज॒घास॒ यथा॒ सो अ॒स्य प॑रि॒धिष्पता॑ति ॥२॥
tathā॒ tada॑gne kṛṇu jātavedo॒ viśve॑bhirde॒vaiḥ sa॒ha saṃ॑vidā॒naḥ | yo no॑ di॒deva॑ yata॒mo ja॒ghāsa॒ yathā॒ so a॒sya pa॑ri॒dhiṣpatā॑ti || २ ||
यथा॒ सो अ॒स्य प॑रि॒धिष्पता॑ति तथा॒ तद॑ग्ने कृणु जातवेदः ।
विश्वे॑भिर्दे॒वैः स॒ह सं॑विदा॒नः ॥३॥
yathā॒ so a॒sya pa॑ri॒dhiṣpatā॑ti tathā॒ tada॑gne kṛṇu jātavedaḥ | viśve॑bhirde॒vaiḥ sa॒ha saṃ॑vidā॒naḥ || ३ ||
अ॒क्ष्यौ॒३नि वि॑ध्य॒ हृद॑यं॒ नि वि॑ध्य जि॒ह्वां नि तृ॑न्द्धि॒ प्र द॒तो मृ॑णीहि ।
पि॒शा॒चो अ॒स्य य॑त॒मो ज॒घासाग्ने यविष्ठ॒ प्रति॒ तं शृ॑णीहि ॥४॥
a॒kṣyau॒३ni vi॑dhya॒ hṛda॑yaṃ॒ ni vi॑dhya ji॒hvāṃ ni tṛ॑nddhi॒ pra da॒to mṛ॑ṇīhi | pi॒śā॒co a॒sya ya॑ta॒mo ja॒ghāsāgne yaviṣṭha॒ prati॒ taṃ śṛ॑ṇīhi || ४ ||
यद॑स्य हृ॒तं विहृ॑तं॒ यत् परा॑भृतमा॒त्मनो॑ ज॒ग्धं य॑तम॒त् पि॑शा॒चैः ।
तद॑ग्ने वि॒द्वान् पुन॒रा भ॑र॒ त्वं शरी॑रे मां॒समसु॒मेर॑यामः ॥५॥
yada॑sya hṛ॒taṃ vihṛ॑taṃ॒ yat parā॑bhṛtamā॒tmano॑ ja॒gdhaṃ ya॑tama॒t pi॑śā॒caiḥ | tada॑gne vi॒dvān puna॒rā bha॑ra॒ tvaṃ śarī॑re māṃ॒samasu॒mera॑yāmaḥ || ५ ||
आ॒मे सुप॑क्वे श॒बले॒ विप॑क्वे॒ यो मा॑ पिशा॒चो अश॑ने द॒दम्भ॑ ।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥६॥
ā॒me supa॑kve śa॒bale॒ vipa॑kve॒ yo mā॑ piśā॒co aśa॑ne da॒dambha॑ | tadā॒tmanā॑ pra॒jayā॑ piśā॒cā vi yā॑tayantāmaga॒do॒३yama॑stu || ६ ||
क्षि॒रे मा॑ म॒न्थे य॑त॒मो द॒दम्भा॑कृष्टप॒च्ये अश॑ने धा॒न्ये॒३यः ।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥७॥
kṣi॒re mā॑ ma॒nthe ya॑ta॒mo da॒dambhā॑kṛṣṭapa॒cye aśa॑ne dhā॒nye॒३yaḥ | tadā॒tmanā॑ pra॒jayā॑ piśā॒cā vi yā॑tayantāmaga॒do॒३yama॑stu || ७ ||
अ॒पां मा॒ पाने॑ यत॒मो द॒दम्भ॑ क्र॒व्याद् या॑तू॒नां शय॑ने॒ शया॑नम्।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥८॥
a॒pāṃ mā॒ pāne॑ yata॒mo da॒dambha॑ kra॒vyād yā॑tū॒nāṃ śaya॑ne॒ śayā॑nam | tadā॒tmanā॑ pra॒jayā॑ piśā॒cā vi yā॑tayantāmaga॒do॒३yama॑stu || ८ ||
दिवा॑ मा॒ नक्तं॑ यत॒मो द॒दम्भ॑ क्रव्या॒द् या॑तू॒नां शय॑ने॒ शया॑नम्।
तदा॒त्मना॑ प्र॒जया॑ पिशा॒चा वि या॑तयन्तामग॒दो॒३यम॑स्तु ॥९॥
divā॑ mā॒ naktaṃ॑ yata॒mo da॒dambha॑ kravyā॒d yā॑tū॒nāṃ śaya॑ne॒ śayā॑nam | tadā॒tmanā॑ pra॒jayā॑ piśā॒cā vi yā॑tayantāmaga॒do॒३yama॑stu || ९ ||
क्र॒व्याद॑मग्ने रुधि॒रं पि॑शा॒चं म॑नो॒हनं॑ जहि जातवेदः ।
तमिन्द्रो॑ वा॒जी वज्रे॑ण हन्तु छि॒नत्तु॒ सोमः॒ शिरो॑ अस्य धृ॒ष्णुः ॥१०॥
kra॒vyāda॑magne rudhi॒raṃ pi॑śā॒caṃ ma॑no॒hanaṃ॑ jahi jātavedaḥ | tamindro॑ vā॒jī vajre॑ṇa hantu chi॒nattu॒ somaḥ॒ śiro॑ asya dhṛ॒ṣṇuḥ || १० ||
स॒नाद॑ग्ने मृणसि यातु॒धाना॒न् न त्वा॒ रक्षां॑सि॒ पृत॑नासु जिग्युः ।
स॒हमू॑रा॒ननु॑ दह क्र॒व्यादो॒ मा ते॑ हे॒त्या मु॑क्षतः॒ दैव्या॑याः ॥११॥
sa॒nāda॑gne mṛṇasi yātu॒dhānā॒n na tvā॒ rakṣāṃ॑si॒ pṛta॑nāsu jigyuḥ | sa॒hamū॑rā॒nanu॑ daha kra॒vyādo॒ mā te॑ he॒tyā mu॑kṣataḥ॒ daivyā॑yāḥ || ११ ||
स॒माह॑र जातवेदो॒ यद्धृ॒तं यत् परा॑भृतम्।
गात्रा॑ण्यस्य वर्धन्तामं॒शुरि॒वा प्या॑यताम॒यम् ॥१२॥
sa॒māha॑ra jātavedo॒ yaddhṛ॒taṃ yat parā॑bhṛtam | gātrā॑ṇyasya vardhantāmaṃ॒śuri॒vā pyā॑yatāma॒yam || १२ ||
सोम॑स्येव जातवेदो अं॒शुरा प्या॑यताम॒यम्।
अग्ने॑ विर॒प्शिनं॒ मेध्य॑मय॒क्ष्मं कृ॑णु॒ जीव॑तु ॥१३॥
soma॑syeva jātavedo aṃ॒śurā pyā॑yatāma॒yam | agne॑ vira॒pśinaṃ॒ medhya॑maya॒kṣmaṃ kṛ॑ṇu॒ jīva॑tu || १३ ||
ए॒तास्ते॑ अग्ने स॒मिधः॑ पिशाच॒जम्भ॑नीः ।
तास्त्वं जु॑षस्व॒ प्रति॑ चैना गृहाण जातवेदः ॥१४॥
e॒tāste॑ agne sa॒midhaḥ॑ piśāca॒jambha॑nīḥ | tāstvaṃ ju॑ṣasva॒ prati॑ cainā gṛhāṇa jātavedaḥ || १४ ||
ता॒र्ष्टा॒घीर॑ग्ने स॒मिधः॒ प्रति॑ गृह्णाह्य॒र्चिषा॑ ।
जहा॑तु क्र॒व्याद् रू॒पं यो अ॑स्य मां॒सं जिही॑र्षति ॥१५॥
tā॒rṣṭā॒ghīra॑gne sa॒midhaḥ॒ prati॑ gṛhṇāhya॒rciṣā॑ | jahā॑tu kra॒vyād rū॒paṃ yo a॑sya māṃ॒saṃ jihī॑rṣati || १५ ||