EeseDharmaSanātana Library
28काण्ड 5 · सूक्त 28
Atharvaveda Śaunaka Kand 5, Sukta 28.
14 shlok७,९-१०,१२ ककुम्मत्यनुष्टुप् १३ पुरउष्णिक्।
नव॑ प्रा॒णान् न॒वभिः॒ सं मि॑मीते दीर्घायु॒त्वाय॑ श॒तशा॑रदाय ।
हरि॑ते॒ त्रीणि॑ रज॒ते त्रीण्यय॑सि॒ त्रीणि॒ तप॒सावि॑ष्ठितानि ॥१॥
७,९-१०,१२ kakummatyanuṣṭup १३ purauṣṇik | nava॑ prā॒ṇān na॒vabhiḥ॒ saṃ mi॑mīte dīrghāyu॒tvāya॑ śa॒taśā॑radāya | hari॑te॒ trīṇi॑ raja॒te trīṇyaya॑si॒ trīṇi॒ tapa॒sāvi॑ṣṭhitāni || १ ||
अ॒ग्निः सूर्य॑श्च॒न्द्रमा॒ भूमि॒रापो॒ द्यौर॒न्तरि॑क्षं प्र॒दिशो॑ दिश॑श्च ।
आ॒र्त॒वा ऋ॒तुभिः॑ संविदा॒ना अ॒नेन॑ मा त्रि॒वृता॑ पारयन्तु ॥२॥
a॒gniḥ sūrya॑śca॒ndramā॒ bhūmi॒rāpo॒ dyaura॒ntari॑kṣaṃ pra॒diśo॑ diśa॑śca | ā॒rta॒vā ṛ॒tubhiḥ॑ saṃvidā॒nā a॒nena॑ mā tri॒vṛtā॑ pārayantu || २ ||
त्रयः॒ पोषा॑स्त्रि॒वृति॑ श्रयन्ताम॒नक्तु॑ पू॒षा पय॑सा घृ॒तेन॑ ।
अन्न॑स्य भू॒मा पुरु॑षस्य भू॒मा भू॒मा प॑शू॒नां त इ॒ह श्र॑यन्ताम् ॥३॥
trayaḥ॒ poṣā॑stri॒vṛti॑ śrayantāma॒naktu॑ pū॒ṣā paya॑sā ghṛ॒tena॑ | anna॑sya bhū॒mā puru॑ṣasya bhū॒mā bhū॒mā pa॑śū॒nāṃ ta i॒ha śra॑yantām || ३ ||
इ॒ममा॑दित्या॒ वसु॑ना॒ समु॑क्षते॒मम॑ग्ने वर्धय ववृधा॒नः ।
इ॒ममि॑न्द्र॒ सं सृ॑ज वी॒र्येऽणा॒स्मिन् त्रि॒वृच्छ्र॑यतां पोषयि॒ष्णु ॥४॥
i॒mamā॑dityā॒ vasu॑nā॒ samu॑kṣate॒mama॑gne vardhaya vavṛdhā॒naḥ | i॒mami॑ndra॒ saṃ sṛ॑ja vī॒rye’ṇā॒smin tri॒vṛcchra॑yatāṃ poṣayi॒ṣṇu || ४ ||
भूमि॑ष्ट्वा पातु॒ हरि॑तेन विश्व॒भृद॒ग्निः पि॑प॒र्त्वय॑सा स॒जोषाः॑ ।
वी॒रुद्भि॑ष्टे अर्जु॑नं संविदा॒नं दक्षं॑ दधातु सुमन॒स्यमा॑नम् ॥५॥
bhūmi॑ṣṭvā pātu॒ hari॑tena viśva॒bhṛda॒gniḥ pi॑pa॒rtvaya॑sā sa॒joṣāḥ॑ | vī॒rudbhi॑ṣṭe arju॑naṃ saṃvidā॒naṃ dakṣaṃ॑ dadhātu sumana॒syamā॑nam || ५ ||
त्रे॒धा जा॒तं जन्म॑ने॒दं हिर॑ण्यम॒ग्नेरेकं॑ प्रि॒यत॑मं बभूव॒ सोम॒स्यैकं॑ हिंसि॒तस्य॒ परा॑पतत्।
अ॒पामेकं॑ वे॒धसां॒ रेत॑ आहु॒स्तत् ते हिर॑ण्यं त्रि॒वृद॒स्त्वायु॑षे ॥६॥
tre॒dhā jā॒taṃ janma॑ne॒daṃ hira॑ṇyama॒gnerekaṃ॑ pri॒yata॑maṃ babhūva॒ soma॒syaikaṃ॑ hiṃsi॒tasya॒ parā॑patat | a॒pāmekaṃ॑ ve॒dhasāṃ॒ reta॑ āhu॒stat te hira॑ṇyaṃ tri॒vṛda॒stvāyu॑ṣe || ६ ||
त्र्या॒यु॒षं ज॒मद॑ग्नेः क॒श्यप॑स्य त्र्यायु॒षम्।
त्रे॒धामृत॑स्य॒ चक्ष॑णं॒ त्रीण्यायूं॑षि ते ऽकरम् ॥७॥
tryā॒yu॒ṣaṃ ja॒mada॑gneḥ ka॒śyapa॑sya tryāyu॒ṣam | tre॒dhāmṛta॑sya॒ cakṣa॑ṇaṃ॒ trīṇyāyūṃ॑ṣi te ’karam || ७ ||
त्रयः॑ सुप॒र्णास्त्रि॒वृता॒ यदाय॑न्नेकाक्ष॒रम॑भिसं॒भूय॑ श॒क्राः ।
प्रत्यौ॑हन् मृ॒त्युम॒मृते॑न सा॒कम॑न्त॒र्दधा॑ना दुरि॒तानि॑ विश्वा॑ ॥८॥
trayaḥ॑ supa॒rṇāstri॒vṛtā॒ yadāya॑nnekākṣa॒rama॑bhisaṃ॒bhūya॑ śa॒krāḥ | pratyau॑han mṛ॒tyuma॒mṛte॑na sā॒kama॑nta॒rdadhā॑nā duri॒tāni॑ viśvā॑ || ८ ||
दि॒वस्त्वा॑ पातु॒ हरि॑तं॒ मध्या॑त् त्वा पा॒त्वर्जु॑नम्।
भूम्या॑ अय॒स्मयं॑ पातु॒ प्रागा॑द् देवपु॒रा अ॒यम् ॥९॥
di॒vastvā॑ pātu॒ hari॑taṃ॒ madhyā॑t tvā pā॒tvarju॑nam | bhūmyā॑ aya॒smayaṃ॑ pātu॒ prāgā॑d devapu॒rā a॒yam || ९ ||
इ॒मास्ति॒स्रो दे॑वपु॒रास्तास्त्वा॑ रक्षन्तु स॒र्वतः॑ ।
तास्त्वं बिभ्र॑द् वर्च॒स्व्युत्त॑रो द्विष॒तां भ॑व ॥१०॥
i॒māsti॒sro de॑vapu॒rāstāstvā॑ rakṣantu sa॒rvataḥ॑ | tāstvaṃ bibhra॑d varca॒svyutta॑ro dviṣa॒tāṃ bha॑va || १० ||
पुरं॑ दे॒वाना॑म॒मृतं॒ हिर॑ण्यं॒ य आ॑बे॒धे प्र॑थ॒मो दे॒वो अग्रे॑ ।
तस्मै॒ नमो॒ दश॒ प्राचीः॑ कृणो॒म्यनु॑ मन्यतां त्रि॒वृदा॒बधे॑ मे ॥११॥
puraṃ॑ de॒vānā॑ma॒mṛtaṃ॒ hira॑ṇyaṃ॒ ya ā॑be॒dhe pra॑tha॒mo de॒vo agre॑ | tasmai॒ namo॒ daśa॒ prācīḥ॑ kṛṇo॒myanu॑ manyatāṃ tri॒vṛdā॒badhe॑ me || ११ ||
आ त्वा॑ चृतत्वर्य॒मा पू॒षा बृह॒स्पतिः॑ ।
अह॑र्जातस्य॒ यन्नाम॒ तेन॒ त्वाति॑ चृतामसि ॥१२॥
ā tvā॑ cṛtatvarya॒mā pū॒ṣā bṛha॒spatiḥ॑ | aha॑rjātasya॒ yannāma॒ tena॒ tvāti॑ cṛtāmasi || १२ ||
ऋ॒तुभि॑ष्ट्वार्त॒वैरायु॑षे॒ वर्च॑से त्वा ।
सं॒व॒त्स॒रस्य॒ तेज॑सा॒ तेन॒ संह॑नु कृण्मसि ॥१३॥
ṛ॒tubhi॑ṣṭvārta॒vairāyu॑ṣe॒ varca॑se tvā | saṃ॒va॒tsa॒rasya॒ teja॑sā॒ tena॒ saṃha॑nu kṛṇmasi || १३ ||
घृ॒तादुल्लु॑प्तं॒ मधु॑ना॒ सम॑क्तं भूमिदृं॒हमच्यु॑तं पारयि॒ष्णु।
भि॒न्दत् स॒पत्ना॒नध॑रांश्च कृ॒ण्वदा मा॑ रोह मह॒ते सौभ॑गाय ॥१४॥
ghṛ॒tādullu॑ptaṃ॒ madhu॑nā॒ sama॑ktaṃ bhūmidṛṃ॒hamacyu॑taṃ pārayi॒ṣṇu | bhi॒ndat sa॒patnā॒nadha॑rāṃśca kṛ॒ṇvadā mā॑ roha maha॒te saubha॑gāya || १४ ||