EeseDharmaSanātana Library
25काण्ड 5 · सूक्त 25
Atharvaveda Śaunaka Kand 5, Sukta 25.
13 shlokपर्व॑ताद् दि॒वो योने॒रङ्गा॑दङ्गात् स॒माभृ॑तम्।
शेपो॒ गर्भ॑स्य रेतो॒धाः सरौ॑ प॒र्णमि॒वा द॑धत् ॥१॥
parva॑tād di॒vo yone॒raṅgā॑daṅgāt sa॒mābhṛ॑tam | śepo॒ garbha॑sya reto॒dhāḥ sarau॑ pa॒rṇami॒vā da॑dhat || १ ||
यथे॒यं पृ॑थि॒वी म॒ही भू॒तानां॒ गर्भ॑माद॒धे।
ए॒वा द॑धामि ते॒ गर्भं॒ तस्मै॒ त्वामव॑से हुवे ॥२॥
yathe॒yaṃ pṛ॑thi॒vī ma॒hī bhū॒tānāṃ॒ garbha॑māda॒dhe | e॒vā da॑dhāmi te॒ garbhaṃ॒ tasmai॒ tvāmava॑se huve || २ ||
गर्भं॑ धेहि सिनीवालि॒ गर्भं॒ धेहि सरस्वति ।
गर्भं॑ ते अ॒श्विनो॒भा ध॑त्तां॒ पुष्क॑रस्रजा ॥३॥
garbhaṃ॑ dhehi sinīvāli॒ garbhaṃ॒ dhehi sarasvati | garbhaṃ॑ te a॒śvino॒bhā dha॑ttāṃ॒ puṣka॑rasrajā || ३ ||
गर्भं॑ ते मि॒त्रावरु॑णौ॒ गर्भं॑ दे॒वो बृह॒स्पतिः॑ ।
गर्भं॑ त॒ इन्द्र॑श्चा॒ग्निश्च॒ गर्भं॑ धा॒ता द॑धातु ते ॥४॥
garbhaṃ॑ te mi॒trāvaru॑ṇau॒ garbhaṃ॑ de॒vo bṛha॒spatiḥ॑ | garbhaṃ॑ ta॒ indra॑ścā॒gniśca॒ garbhaṃ॑ dhā॒tā da॑dhātu te || ४ ||
विष्णु॒र्योनिं॑ कल्पयतु॒ त्वष्टा॑ रू॒पाणि॑ पिंशतु ।
आ सि॑ञ्चतु प्र॒जाप॑तिर्धा॒ता गर्भं॑ दधातु ते ॥५॥
viṣṇu॒ryoniṃ॑ kalpayatu॒ tvaṣṭā॑ rū॒pāṇi॑ piṃśatu | ā si॑ñcatu pra॒jāpa॑tirdhā॒tā garbhaṃ॑ dadhātu te || ५ ||
यद् वेद॒ राजा॒ वरु॑णो॒ यद् वा॑ दे॒वी सर॑स्वती ।
यदिन्द्रो॑ वृत्र॒हा वेद॒ तद् ग॑र्भ॒कर॑णं पिब ॥६॥
yad veda॒ rājā॒ varu॑ṇo॒ yad vā॑ de॒vī sara॑svatī | yadindro॑ vṛtra॒hā veda॒ tad ga॑rbha॒kara॑ṇaṃ piba || ६ ||
गर्भो॑ अ॒स्योष॑धीनां॒ गर्भो॒ वन॒स्पती॑नाम्।
गर्भो॒ विश्व॑स्य भू॒तस्य॒ सो अ॑ग्ने॒ गर्भ॒मेह धाः॑ ॥७॥
garbho॑ a॒syoṣa॑dhīnāṃ॒ garbho॒ vana॒spatī॑nām | garbho॒ viśva॑sya bhū॒tasya॒ so a॑gne॒ garbha॒meha dhāḥ॑ || ७ ||
अधि॑ स्कन्द वी॒रय॑स्व॒ गर्भ॒मा धे॑हि॒ योन्या॑म्।
वृषा॑सि वृष्ण्यावन् प्र॒जायै॒ त्वा न॑यामसि ॥८॥
adhi॑ skanda vī॒raya॑sva॒ garbha॒mā dhe॑hi॒ yonyā॑m | vṛṣā॑si vṛṣṇyāvan pra॒jāyai॒ tvā na॑yāmasi || ८ ||
वि जि॑हीष्व बार्हत्सामे॒ गर्भ॑स्ते॒ योनि॒मा श॑याम्।
अदु॑ष्टे दे॒वाः पु॒त्रं सो॑म॒पा उ॑भया॒विन॑म् ॥९॥
vi ji॑hīṣva bārhatsāme॒ garbha॑ste॒ yoni॒mā śa॑yām | adu॑ṣṭe de॒vāḥ pu॒traṃ so॑ma॒pā u॑bhayā॒vina॑m || ९ ||
धातः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१०॥
dhātaḥ॒ śreṣṭhe॑na rū॒peṇā॒syā nāryā॑ gavī॒nyoḥ | pumāṃ॑saṃ pu॒tramā dhe॑hi daśa॒me mā॒si sūta॑ve || १० ||
त्वष्टः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥११॥
tvaṣṭaḥ॒ śreṣṭhe॑na rū॒peṇā॒syā nāryā॑ gavī॒nyoḥ | pumāṃ॑saṃ pu॒tramā dhe॑hi daśa॒me mā॒si sūta॑ve || ११ ||
सवि॑तः॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१२॥
savi॑taḥ॒ śreṣṭhe॑na rū॒peṇā॒syā nāryā॑ gavī॒nyoḥ | pumāṃ॑saṃ pu॒tramā dhe॑hi daśa॒me mā॒si sūta॑ve || १२ ||
प्रजा॑पते॒ श्रेष्ठे॑न रू॒पेणा॒स्या नार्या॑ गवी॒न्योः ।
पुमां॑सं पु॒त्रमा धे॑हि दश॒मे मा॒सि सूत॑वे ॥१३॥
prajā॑pate॒ śreṣṭhe॑na rū॒peṇā॒syā nāryā॑ gavī॒nyoḥ | pumāṃ॑saṃ pu॒tramā dhe॑hi daśa॒me mā॒si sūta॑ve || १३ ||