EeseDharmaSanātana Library
23काण्ड 5 · सूक्त 23
Atharvaveda Śaunaka Kand 5, Sukta 23.
13 shlokओते॑ मे॒ द्यावा॑पृथि॒वी ओता॑ दे॒वी सर॑स्वती ।
ओतौ॑ म॒ इन्द्र॑श्चा॒ग्निश्च॒ क्रिमिं॑ जम्भयता॒मिति॑ ॥१॥
ote॑ me॒ dyāvā॑pṛthi॒vī otā॑ de॒vī sara॑svatī | otau॑ ma॒ indra॑ścā॒gniśca॒ krimiṃ॑ jambhayatā॒miti॑ || १ ||
अ॒स्येन्द्र॑ कुमा॒रस्य॒ क्रिमी॑न् धनपते जहि ।
ह॒ता विश्वा॒ अरा॑तय उ॒ग्रेण॒ वच॑सा॒ मम॑ ॥२॥
a॒syendra॑ kumā॒rasya॒ krimī॑n dhanapate jahi | ha॒tā viśvā॒ arā॑taya u॒greṇa॒ vaca॑sā॒ mama॑ || २ ||
यो अ॒क्ष्यौऽपरि॒सर्प॑ति॒ यो नासे॑ परि॒सर्प॑ति ।
द॒तां यो मध्यं॒ गच्छ॑ति॒ तं क्रिमिं॑ जम्भयामसि ॥३॥
yo a॒kṣyau’pari॒sarpa॑ti॒ yo nāse॑ pari॒sarpa॑ti | da॒tāṃ yo madhyaṃ॒ gaccha॑ti॒ taṃ krimiṃ॑ jambhayāmasi || ३ ||
सरू॑पौ॒ द्वौ विरू॑पौ॒ द्वौ कृ॒ष्णौ द्वौ रोहि॑तौ॒ द्वौ।
ब॒भ्रुश्च॑ ब॒भ्रुक॑र्णश्च॒ गृध्रः॒ कोक॑श्च॒ ते ह॒ताः ॥४॥
sarū॑pau॒ dvau virū॑pau॒ dvau kṛ॒ṣṇau dvau rohi॑tau॒ dvau | ba॒bhruśca॑ ba॒bhruka॑rṇaśca॒ gṛdhraḥ॒ koka॑śca॒ te ha॒tāḥ || ४ ||
ये क्रिम॑यः शिति॒कक्षा॒ ये कृ॒ष्णाः शि॑ति॒बाह॑वः ।
ये के च॑ वि॒श्वरू॑पा॒स्तान् क्रिमी॑न् जम्भयामसि ॥५॥
ye krima॑yaḥ śiti॒kakṣā॒ ye kṛ॒ṣṇāḥ śi॑ti॒bāha॑vaḥ | ye ke ca॑ vi॒śvarū॑pā॒stān krimī॑n jambhayāmasi || ५ ||
उत् पु॒रस्ता॒त् सूर्य॑ एति वि॒श्वदृ॑ष्टो अदृष्ट॒हा।
दृ॒ष्टांश्च॒ घ्नन्न॒दॄष्टां॑श्च॒ सर्वां॑श्च प्रमृ॒णन् क्रिमी॑न् ॥६॥
ut pu॒rastā॒t sūrya॑ eti vi॒śvadṛ॑ṣṭo adṛṣṭa॒hā | dṛ॒ṣṭāṃśca॒ ghnanna॒dṝṣṭāṃ॑śca॒ sarvāṃ॑śca pramṛ॒ṇan krimī॑n || ६ ||
येवा॑षासः॒ कष्क॑षास एज॒त्काः शि॑पवित्नु॒काः ।
दृ॒ष्टांश्च॑ ह॒न्यतां॑ क्रिमि॑रु॒तादृष्ट॑श्च हन्यताम् ॥७॥
yevā॑ṣāsaḥ॒ kaṣka॑ṣāsa eja॒tkāḥ śi॑pavitnu॒kāḥ | dṛ॒ṣṭāṃśca॑ ha॒nyatāṃ॑ krimi॑ru॒tādṛṣṭa॑śca hanyatām || ७ ||
ह॒तो येवा॑षः॒ क्रिमी॑णां ह॒तो न॑दनि॒मोत।
सर्वा॒न् नि म॑ष्म॒षाक॑रं दृ॒षदा॒ खल्वाँ॑ इव ॥८॥
ha॒to yevā॑ṣaḥ॒ krimī॑ṇāṃ ha॒to na॑dani॒mota | sarvā॒n ni ma॑ṣma॒ṣāka॑raṃ dṛ॒ṣadā॒ khalvām̐॑ iva || ८ ||
त्रि॒शी॒र्षाणं॑ त्रिक॒कुदं॒ क्रिमिं॑ सा॒रङ्ग॒मर्जु॑नम्।
शृ॒णाम्य॑स्य पृ॒ष्टीरपि॑ वृश्चामि॒ यच्छिरः॑ ॥९॥
tri॒śī॒rṣāṇaṃ॑ trika॒kudaṃ॒ krimiṃ॑ sā॒raṅga॒marju॑nam | śṛ॒ṇāmya॑sya pṛ॒ṣṭīrapi॑ vṛścāmi॒ yacchiraḥ॑ || ९ ||
अ॒त्रि॒वद् वः॑ क्रिमयो हन्मि कण्व॒वज्ज॑मदग्नि॒वत्।
अ॒गस्त्य॑स्य॒ ब्रह्म॑णा॒ सं पि॑नष्म्य॒हं क्रिमी॑न् ॥१०॥
a॒tri॒vad vaḥ॑ krimayo hanmi kaṇva॒vajja॑madagni॒vat | a॒gastya॑sya॒ brahma॑ṇā॒ saṃ pi॑naṣmya॒haṃ krimī॑n || १० ||
ह॒तो राजा॒ क्रिमी॑णामु॒तैषां॑ स्थ॒पति॑र्ह॒तः ।
ह॒तो ह॒तमा॑ता॒ क्रिमि॑र्ह॒तभ्रा॑ता ह॒तस्व॑सा ॥११॥
ha॒to rājā॒ krimī॑ṇāmu॒taiṣāṃ॑ stha॒pati॑rha॒taḥ | ha॒to ha॒tamā॑tā॒ krimi॑rha॒tabhrā॑tā ha॒tasva॑sā || ११ ||
ह॒तासो॑ अस्य वे॒शसो॑ ह॒तासः॒ परि॑वेशसः ।
अथो॒ ये क्षु॑ल्ल॒का इ॑व॒ सर्वे॒ ते क्रिम॑यो ह॒ताः ॥१२॥
ha॒tāso॑ asya ve॒śaso॑ ha॒tāsaḥ॒ pari॑veśasaḥ | atho॒ ye kṣu॑lla॒kā i॑va॒ sarve॒ te krima॑yo ha॒tāḥ || १२ ||
सर्वे॑षां च॒ क्रिमी॑णां॒ सर्वा॑सां च क्रि॒मीना॑म्।
भि॒नद्म्यश्म॑ना॒ शिरो॒ दहा॑म्य॒ग्निना॒ मुख॑म् ॥१३॥
sarve॑ṣāṃ ca॒ krimī॑ṇāṃ॒ sarvā॑sāṃ ca kri॒mīnā॑m | bhi॒nadmyaśma॑nā॒ śiro॒ dahā॑mya॒gninā॒ mukha॑m || १३ ||