EeseDharmaSanātana Library
22काण्ड 5 · सूक्त 22
Atharvaveda Śaunaka Kand 5, Sukta 22.
14 shlokअ॒ग्निस्त॒क्मान॒मप॑ बाधतामि॒तः सोमो॒ ग्रावा॒ वरु॑णः पू॒तद॑क्षाः ।
वेदि॑र्ब॒र्हिः स॒मिधः॒ शोशु॑चाना॒ अप॒ द्वेषां॑स्यमु॒या भ॑वन्तु ॥१॥
a॒gnista॒kmāna॒mapa॑ bādhatāmi॒taḥ somo॒ grāvā॒ varu॑ṇaḥ pū॒tada॑kṣāḥ | vedi॑rba॒rhiḥ sa॒midhaḥ॒ śośu॑cānā॒ apa॒ dveṣāṃ॑syamu॒yā bha॑vantu || १ ||
अ॒यं यो विश्वा॒न् हरि॑तान् कृ॒णोष्यु॑च्छो॒चय॑न्न॒ग्निरि॑वाभिदु॒न्वन्।
अधा॒ हि त॑क्मन्नर॒सो हि भू॒या अधा॒ न्यऽङ्ङध॒राङ् वा॒ परे॑हि ॥२॥
a॒yaṃ yo viśvā॒n hari॑tān kṛ॒ṇoṣyu॑ccho॒caya॑nna॒gniri॑vābhidu॒nvan | adhā॒ hi ta॑kmannara॒so hi bhū॒yā adhā॒ nya’ṅṅadha॒rāṅ vā॒ pare॑hi || २ ||
यः प॑रु॒षः पा॑रुषे॒योऽवध्वं॒स इ॑वारु॒णः ।
त॒क्मानं॑ विश्वधावीर्याध॒राञ्चं॒ परा॑ सुवा ॥३॥
yaḥ pa॑ru॒ṣaḥ pā॑ruṣe॒yo’vadhvaṃ॒sa i॑vāru॒ṇaḥ | ta॒kmānaṃ॑ viśvadhāvīryādha॒rāñcaṃ॒ parā॑ suvā || ३ ||
अ॒ध॒राञ्चं॒ प्र हि॑णोमि॒ नमः॑ कृ॒त्वा त॒क्मने॑ ।
श॒क॒म्भ॒रस्य॑ मुष्टि॒हा पुन॑रेतु महावृ॒षान् ॥४॥
a॒dha॒rāñcaṃ॒ pra hi॑ṇomi॒ namaḥ॑ kṛ॒tvā ta॒kmane॑ | śa॒ka॒mbha॒rasya॑ muṣṭi॒hā puna॑retu mahāvṛ॒ṣān || ४ ||
ओको॑ अस्य॒ मूज॑वन्त॒ ओको॑ अस्य महावृ॒षाः ।
याव॑ज्जा॒तस्त॑क्मं॒स्तावा॑नसि॒ बल्हि॑केषु न्योच॒रः ॥५॥
oko॑ asya॒ mūja॑vanta॒ oko॑ asya mahāvṛ॒ṣāḥ | yāva॑jjā॒tasta॑kmaṃ॒stāvā॑nasi॒ balhi॑keṣu nyoca॒raḥ || ५ ||
तक्म॒न् व्याऽल॒ वि ग॑द॒ व्यऽङ्ग॒ भूरि॑ यावय ।
दा॒सीं नि॒ष्टक्व॑रीमिछ॒ तां वज्रे॑ण॒ सम॑र्पय ॥६॥
takma॒n vyā’la॒ vi ga॑da॒ vya’ṅga॒ bhūri॑ yāvaya | dā॒sīṃ ni॒ṣṭakva॑rīmicha॒ tāṃ vajre॑ṇa॒ sama॑rpaya || ६ ||
तक्म॒न् मूज॑वतो गच्छ॒ बल्हि॑कान् वा परस्त॒राम्।
शू॒द्रामि॑च्छ प्रफ॒र्व्यं॑१ तां त॑क्म॒न् वीऽव धूनुहि ॥७॥
takma॒n mūja॑vato gaccha॒ balhi॑kān vā parasta॒rām | śū॒drāmi॑ccha prapha॒rvyaṃ॑१ tāṃ ta॑kma॒n vī’va dhūnuhi || ७ ||
म॒हा॒वृ॒षान् मूज॑वतो॒ बन्ध्व॑द्धि प॒रेत्य॑ ।
प्रैतानि॑ त॒क्मने॑ ब्रूमो अन्यक्षे॒त्राणि॒ वा इ॒मा ॥८॥
ma॒hā॒vṛ॒ṣān mūja॑vato॒ bandhva॑ddhi pa॒retya॑ | praitāni॑ ta॒kmane॑ brūmo anyakṣe॒trāṇi॒ vā i॒mā || ८ ||
अ॒न्य॒क्षे॒त्रे न र॑मसे व॒शी सन्मृ॑डयासि नः ।
अभू॑दु॒ प्रार्थ॑स्त॒क्मा स ग॑मिष्यति॒ बल्हि॑कान् ॥९॥
a॒nya॒kṣe॒tre na ra॑mase va॒śī sanmṛ॑ḍayāsi naḥ | abhū॑du॒ prārtha॑sta॒kmā sa ga॑miṣyati॒ balhi॑kān || ९ ||
यत् त्वं शी॒तोऽथो॑ रू॒रः स॒ह का॒सावे॑पयः ।
भी॒मास्ते॑ तक्मन् हे॒तय॒स्ताभिः॑ स्म॒ परि॑ वृङ्ग्धि नः ॥१०॥
yat tvaṃ śī॒to’tho॑ rū॒raḥ sa॒ha kā॒sāve॑payaḥ | bhī॒māste॑ takman he॒taya॒stābhiḥ॑ sma॒ pari॑ vṛṅgdhi naḥ || १० ||
मा स्मै॒तान्त्सखी॑न् कुरुथा ब॒लासं॑ का॒समु॑द्यु॒गम्।
मास्मातो॒ऽर्वाङैः पुन॒स्तत् त्वा॑ तक्म॒न्नुप॑ ब्रुवे ॥११॥
mā smai॒tāntsakhī॑n kuruthā ba॒lāsaṃ॑ kā॒samu॑dyu॒gam | māsmāto॒’rvāṅaiḥ puna॒stat tvā॑ takma॒nnupa॑ bruve || ११ ||
तक्म॒न् भ्रात्रा॑ ब॒लासे॑न॒ स्वस्रा॒ कासि॑कया स॒ह।
पा॒प्मा भ्रातृ॑व्येण स॒ह गछा॒मुमर॑णं॒ जन॑म् ॥१२॥
takma॒n bhrātrā॑ ba॒lāse॑na॒ svasrā॒ kāsi॑kayā sa॒ha | pā॒pmā bhrātṛ॑vyeṇa sa॒ha gachā॒mumara॑ṇaṃ॒ jana॑m || १२ ||
तृती॑यकं वितृती॒यं स॑द॒न्दिमु॒त शा॑र॒दम्।
त॒क्मानं॑ शी॒तं रू॒रं ग्रैष्मं॑ नाशय॒ वार्षि॑कम् ॥१३॥
tṛtī॑yakaṃ vitṛtī॒yaṃ sa॑da॒ndimu॒ta śā॑ra॒dam | ta॒kmānaṃ॑ śī॒taṃ rū॒raṃ graiṣmaṃ॑ nāśaya॒ vārṣi॑kam || १३ ||
ग॒न्धारि॑भ्यो॒ मूज॑व॒द्भ्योऽङ्गे॑भ्यो म॒गधे॑भ्यः ।
प्रै॒ष्यन् जन॑मिव शेव॒धिं त॒क्मानं॒ परि॑ दद्मसि ॥१४॥
ga॒ndhāri॑bhyo॒ mūja॑va॒dbhyo’ṅge॑bhyo ma॒gadhe॑bhyaḥ | prai॒ṣyan jana॑miva śeva॒dhiṃ ta॒kmānaṃ॒ pari॑ dadmasi || १४ ||