EeseDharmaSanātana Library
21काण्ड 5 · सूक्त 21
Atharvaveda Śaunaka Kand 5, Sukta 21.
12 shlok६ जगती, ११ बृहतीगर्भा त्रिष्टुप्, १२ त्रिपदा यवमध्या गायत्री।
विहृ॑दयं वैमन॒स्यं वदा॒मित्रे॑षु दुन्दुभे ।
वि॒द्वे॒षं कश्म॑शं भ॒यम॒मित्रे॑षु॒ नि द॑ध्म॒स्यवैनान् दुन्दुभे जहि ॥१॥
६ jagatī, ११ bṛhatīgarbhā triṣṭup, १२ tripadā yavamadhyā gāyatrī | vihṛ॑dayaṃ vaimana॒syaṃ vadā॒mitre॑ṣu dundubhe | vi॒dve॒ṣaṃ kaśma॑śaṃ bha॒yama॒mitre॑ṣu॒ ni da॑dhma॒syavainān dundubhe jahi || १ ||
उ॒द्वेप॑माना॒ मन॑सा॒ चक्षु॑षा॒ हृद॑येन च ।
धाव॑न्तु॒ बिभ्य॑तो॒ऽमित्राः॑ प्रत्रा॒सेनाज्ये॑ हु॒ते ॥२॥
u॒dvepa॑mānā॒ mana॑sā॒ cakṣu॑ṣā॒ hṛda॑yena ca | dhāva॑ntu॒ bibhya॑to॒’mitrāḥ॑ pratrā॒senājye॑ hu॒te || २ ||
वा॒न॒स्प॒त्यः संभृ॑त उ॒स्रिया॑भिर्वि॒श्वगो॑त्र्यः ।
प्र॒त्रा॒सम॒मित्रे॑भ्यो व॒दाज्ये॑ना॒भिघा॑रितः ॥३॥
vā॒na॒spa॒tyaḥ saṃbhṛ॑ta u॒sriyā॑bhirvi॒śvago॑tryaḥ | pra॒trā॒sama॒mitre॑bhyo va॒dājye॑nā॒bhighā॑ritaḥ || ३ ||
यथा॑ मृ॒गाः सं॑वि॒जन्त॑ आर॒ण्याः पुरु॑षा॒दधि॑ ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥४॥
yathā॑ mṛ॒gāḥ saṃ॑vi॒janta॑ āra॒ṇyāḥ puru॑ṣā॒dadhi॑ | e॒vā tvaṃ du॑ndubhe॒’mitrā॑na॒bhi kra॑nda॒ pra trā॑sa॒yātho॑ ci॒ttāni॑ mohaya || ४ ||
यथा॒ वृका॑दजा॒वयो॒ धाव॑न्ति ब॒हु बिभ्य॑तीः ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥५॥
yathā॒ vṛkā॑dajā॒vayo॒ dhāva॑nti ba॒hu bibhya॑tīḥ | e॒vā tvaṃ du॑ndubhe॒’mitrā॑na॒bhi kra॑nda॒ pra trā॑sa॒yātho॑ ci॒ttāni॑ mohaya || ५ ||
यथा॑ श्ये॒नात् प॑त॒त्रिणः॑ संवि॒जन्ते॒ अह॑र्दिवि सिं॒हस्य॑ स्त॒नथो॒र्यथा॑ ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥६॥
yathā॑ śye॒nāt pa॑ta॒triṇaḥ॑ saṃvi॒jante॒ aha॑rdivi siṃ॒hasya॑ sta॒natho॒ryathā॑ | e॒vā tvaṃ du॑ndubhe॒’mitrā॑na॒bhi kra॑nda॒ pra trā॑sa॒yātho॑ ci॒ttāni॑ mohaya || ६ ||
परा॒मित्रा॑न् दुन्दु॒भिना॑ हरि॒णस्या॒जिने॑न च ।
सर्वे॑ दे॒वा अ॑तित्रस॒न् ये सं॑ग्रा॒मस्येशते ॥७॥
parā॒mitrā॑n dundu॒bhinā॑ hari॒ṇasyā॒jine॑na ca | sarve॑ de॒vā a॑titrasa॒n ye saṃ॑grā॒masyeśate || ७ ||
यैरिन्द्रः॑ प्र॒क्रीड॑ते पद्घो॒षैश्छा॒यया॑ स॒ह।
तैर॒मित्रा॑स्त्रसन्तु नो॒ऽमी ये यन्त्य॑नीक॒शः ॥८॥
yairindraḥ॑ pra॒krīḍa॑te padgho॒ṣaiśchā॒yayā॑ sa॒ha | taira॒mitrā॑strasantu no॒’mī ye yantya॑nīka॒śaḥ || ८ ||
ज्या॒घो॒षा दु॑न्दु॒भयो॒ भि क्रो॑शन्तु॒ या दिशः॑ ।
सेनाः॒ परा॑जिता य॒तीर॒मित्रा॑णामनीक॒शः ॥९॥
jyā॒gho॒ṣā du॑ndu॒bhayo॒ bhi kro॑śantu॒ yā diśaḥ॑ | senāḥ॒ parā॑jitā ya॒tīra॒mitrā॑ṇāmanīka॒śaḥ || ९ ||
आदि॑त्य॒ चक्षु॒रा द॑त्स्व॒ मरी॑च॒योऽनु॑ धावत ।
प॒त्स॒ङ्गिनी॒रा स॑जन्तु॒ विग॑ते बाहुवी॒र्येऽ ॥१०॥
ādi॑tya॒ cakṣu॒rā da॑tsva॒ marī॑ca॒yo’nu॑ dhāvata | pa॒tsa॒ṅginī॒rā sa॑jantu॒ viga॑te bāhuvī॒rye’ || १० ||
यू॒यमु॒ग्रा म॑रुतः पृश्निमातर॒ इन्द्रे॑ण यु॒जा प्र मृ॑णीत॒ शत्रू॑न्।
सोमो॒ राजा॒ वरु॑णो॒ राजा॑ महादे॒व उ॒त मृ॒त्युरिन्द्रः॑ ॥११॥
yū॒yamu॒grā ma॑rutaḥ pṛśnimātara॒ indre॑ṇa yu॒jā pra mṛ॑ṇīta॒ śatrū॑n | somo॒ rājā॒ varu॑ṇo॒ rājā॑ mahāde॒va u॒ta mṛ॒tyurindraḥ॑ || ११ ||
ए॒ता दे॑वसे॒नाः सूर्य॑केतवः॒ सचे॑तसः ।
अ॒मित्रा॑न् नो जयन्तु॒ स्वाहा॑ ॥१२॥
e॒tā de॑vase॒nāḥ sūrya॑ketavaḥ॒ sace॑tasaḥ | a॒mitrā॑n no jayantu॒ svāhā॑ || १२ ||