EeseDharmaSanātana Library
20काण्ड 5 · सूक्त 20
Atharvaveda Śaunaka Kand 5, Sukta 20.
12 shlokउ॒च्चैर्घो॑षो दुन्दु॒भिः स॑त्वना॒यन् वा॑नस्प॒त्यः संभृ॑त उ॒स्रिया॑भिः ।
वाचं॑ क्षुणुवा॒नो द॒मय॑न्त्स॒पत्ना॑न्त्सिं॒ह इ॑व जे॒ष्यन्न॒भि तंस्तनीहि ॥१॥
u॒ccairgho॑ṣo dundu॒bhiḥ sa॑tvanā॒yan vā॑naspa॒tyaḥ saṃbhṛ॑ta u॒sriyā॑bhiḥ | vācaṃ॑ kṣuṇuvā॒no da॒maya॑ntsa॒patnā॑ntsiṃ॒ha i॑va je॒ṣyanna॒bhi taṃstanīhi || १ ||
सिं॒ह इ॑वास्तानीद् द्रु॒वयो॒ विब॑द्धोऽभि॒क्रन्द॑न्नृष॒भो वा॑सि॒तामि॑व ।
वृषा॒ त्वं वध्र॑यस्ते स॒पत्ना॑ ऐ॒न्द्रस्ते॒ शुष्मो॑ अभिमातिषा॒हः ॥२॥
siṃ॒ha i॑vāstānīd dru॒vayo॒ viba॑ddho’bhi॒kranda॑nnṛṣa॒bho vā॑si॒tāmi॑va | vṛṣā॒ tvaṃ vadhra॑yaste sa॒patnā॑ ai॒ndraste॒ śuṣmo॑ abhimātiṣā॒haḥ || २ ||
वृषे॑व यू॒थे सह॑सा विदा॒नो ग॒व्यन्न॒भि रु॑व संधनाजित्।
शु॒चा वि॑ध्य॒ हृद॑यं॒ परे॑षां हि॒त्वा ग्रामा॒न् प्रच्यु॑ता यन्तु॒ शत्र॑वः ॥३॥
vṛṣe॑va yū॒the saha॑sā vidā॒no ga॒vyanna॒bhi ru॑va saṃdhanājit | śu॒cā vi॑dhya॒ hṛda॑yaṃ॒ pare॑ṣāṃ hi॒tvā grāmā॒n pracyu॑tā yantu॒ śatra॑vaḥ || ३ ||
सं॒जय॒न् पृत॑ना ऊ॒र्ध्वमा॑यु॒र्गृह्या॑ गृह्णा॒नो ब॑हु॒धा वि च॑क्ष्व ।
दैवीं॒ वाचं॑ दुन्दुभ॒ आ गु॑रस्व वे॒धाः शत्रू॑णा॒मुप॑ भरस्व॒ वेदः॑ ॥४॥
saṃ॒jaya॒n pṛta॑nā ū॒rdhvamā॑yu॒rgṛhyā॑ gṛhṇā॒no ba॑hu॒dhā vi ca॑kṣva | daivīṃ॒ vācaṃ॑ dundubha॒ ā gu॑rasva ve॒dhāḥ śatrū॑ṇā॒mupa॑ bharasva॒ vedaḥ॑ || ४ ||
दु॒न्दु॒भेर्वाचं॒ प्रय॑तां॒ वद॑न्तीमाशृण्व॒ती ना॑थि॒ता घोष॑बुद्धा ।
नारी॑ पु॒त्रं धा॑वतु हस्त॒गह्या॑मि॒त्री भी॒ता स॑म॒रे व॒धाना॑म् ॥५॥
du॒ndu॒bhervācaṃ॒ praya॑tāṃ॒ vada॑ntīmāśṛṇva॒tī nā॑thi॒tā ghoṣa॑buddhā | nārī॑ pu॒traṃ dhā॑vatu hasta॒gahyā॑mi॒trī bhī॒tā sa॑ma॒re va॒dhānā॑m || ५ ||
पूर्वो॑ दुन्दुभे॒ प्र व॑दासि॒ वाचं॒ भूम्याः॑ पृ॒ष्ठे व॑द॒ रोच॑मानः ।
अ॒मि॒त्र॒से॒नाम॑भि॒जञ्ज॑भानो द्यु॒मद् व॑द दुन्दुभे सू॒नृता॑वत् ॥६॥
pūrvo॑ dundubhe॒ pra va॑dāsi॒ vācaṃ॒ bhūmyāḥ॑ pṛ॒ṣṭhe va॑da॒ roca॑mānaḥ | a॒mi॒tra॒se॒nāma॑bhi॒jañja॑bhāno dyu॒mad va॑da dundubhe sū॒nṛtā॑vat || ६ ||
अ॒न्त॒रेमे नभ॑सी॒ घोषो॑ अस्तु॒ पृथ॑क् ते ध्व॒नयो॑ यन्तु॒ शीभ॑म्।
अ॒भि क्र॑न्द स्त॒नयो॒त्पिपा॑नः श्लोक॒कृन्मि॑त्र॒तूर्या॑य स्व॒र्धी ॥७॥
a॒nta॒reme nabha॑sī॒ ghoṣo॑ astu॒ pṛtha॑k te dhva॒nayo॑ yantu॒ śībha॑m | a॒bhi kra॑nda sta॒nayo॒tpipā॑naḥ śloka॒kṛnmi॑tra॒tūryā॑ya sva॒rdhī || ७ ||
धी॒भिः कृ॒तः प्र व॑दाति॒ वाच॒मुद्ध॑र्षय॒ सत्व॑ना॒मायु॑धानि ।
इन्द्र॑मेदी॒ सत्व॑नो॒ नि ह्व॑यस्व मि॒त्रैर॒मित्राँ॒ अव॑ जङ्घनीहि ॥८॥
dhī॒bhiḥ kṛ॒taḥ pra va॑dāti॒ vāca॒muddha॑rṣaya॒ satva॑nā॒māyu॑dhāni | indra॑medī॒ satva॑no॒ ni hva॑yasva mi॒traira॒mitrām॒̐ ava॑ jaṅghanīhi || ८ ||
सं॒क्रन्दनः॑ प्रव॒दो धृ॒ष्णुषे॑णः प्रवेद॒कृद् ब॑हु॒धा ग्रा॑मघो॒षी।
श्रेयो॑ वन्वा॒नो व॒युना॑नि वि॒द्वान् की॒र्तिं ब॒हुभ्यो॒ वि ह॑र द्विरा॒जे ॥९॥
saṃ॒krandanaḥ॑ prava॒do dhṛ॒ṣṇuṣe॑ṇaḥ praveda॒kṛd ba॑hu॒dhā grā॑magho॒ṣī | śreyo॑ vanvā॒no va॒yunā॑ni vi॒dvān kī॒rtiṃ ba॒hubhyo॒ vi ha॑ra dvirā॒je || ९ ||
श्रेयः॑केतो वसु॒जित् सहीयान्त्संग्राम॒जित् संशि॑तो॒ ब्रह्म॑णासि ।
अं॒शूनि॑व॒ ग्रावा॑धि॒षव॑णे॒ अद्रि॑र्ग॒व्य॑न् दु॑न्दु॒भेऽधि॑ नृत्य॒ वेदः॑ ॥१०॥
śreyaḥ॑keto vasu॒jit sahīyāntsaṃgrāma॒jit saṃśi॑to॒ brahma॑ṇāsi | aṃ॒śūni॑va॒ grāvā॑dhi॒ṣava॑ṇe॒ adri॑rga॒vya॑n du॑ndu॒bhe’dhi॑ nṛtya॒ vedaḥ॑ || १० ||
श॒त्रू॒षाण् नी॒षाड॑भिमातिषा॒हो ग॒वेष॑णः॒ सह॑मान उ॒द्भित्।
वा॒ग्वीव॒ मन्त्रं॒ प्र भ॑रस्व॒ वाचं॒ सांग्रा॑मजित्या॒येष॒मुद् व॑दे॒ह ॥११॥
śa॒trū॒ṣāṇ nī॒ṣāḍa॑bhimātiṣā॒ho ga॒veṣa॑ṇaḥ॒ saha॑māna u॒dbhit | vā॒gvīva॒ mantraṃ॒ pra bha॑rasva॒ vācaṃ॒ sāṃgrā॑majityā॒yeṣa॒mud va॑de॒ha || ११ ||
अ॒च्यु॒त॒च्युत् स॒मदो॒ गमि॑ष्ठो॒ मृधो॒ जेता॑ पुरए॒तायो॒ध्यः ।
इन्द्रे॑ण गु॒प्तो वि॒दथा॑ नि॒चिक्य॑द्धृ॒द्द्योत॑नो द्विष॒तां या॑हि॒ शीभ॑म् ॥१२॥
a॒cyu॒ta॒cyut sa॒mado॒ gami॑ṣṭho॒ mṛdho॒ jetā॑ purae॒tāyo॒dhyaḥ | indre॑ṇa gu॒pto vi॒dathā॑ ni॒cikya॑ddhṛ॒ddyota॑no dviṣa॒tāṃ yā॑hi॒ śībha॑m || १२ ||