EeseDharmaSanātana Library
18काण्ड 5 · सूक्त 18
Atharvaveda Śaunaka Kand 5, Sukta 18.
15 shlokनैतां ते॑ दे॒वा अ॑ददु॒स्तुभ्यं॑ नृपते॒ अत्त॑वे ।
मा ब्रा॑ह्म॒णस्य॑ राजन्य॒ गां जि॑घत्सो अना॒द्याम् ॥१॥
naitāṃ te॑ de॒vā a॑dadu॒stubhyaṃ॑ nṛpate॒ atta॑ve | mā brā॑hma॒ṇasya॑ rājanya॒ gāṃ ji॑ghatso anā॒dyām || १ ||
अ॒क्षद्रु॑ग्धो राज॒न्यः पा॒प आ॑त्मपराजि॒तः ।
स ब्रा॑ह्म॒णस्य॒ गाम॑द्याद॒द्य जी॑वानि॒ माश्वः ॥२॥
a॒kṣadru॑gdho rāja॒nyaḥ pā॒pa ā॑tmaparāji॒taḥ | sa brā॑hma॒ṇasya॒ gāma॑dyāda॒dya jī॑vāni॒ māśvaḥ || २ ||
आवि॑ष्टिता॒घवि॑षा पृदा॒कूरि॑व॒ चर्म॑णा ।
सा ब्रा॑ह्म॒णस्य॑ राजन्य तृ॒ष्टैषा गौर॑ना॒द्या ॥३॥
āvi॑ṣṭitā॒ghavi॑ṣā pṛdā॒kūri॑va॒ carma॑ṇā | sā brā॑hma॒ṇasya॑ rājanya tṛ॒ṣṭaiṣā gaura॑nā॒dyā || ३ ||
निर्वै क्ष॒त्रं नय॑ति॒ हन्ति॒ वर्चो॒ऽग्निरि॒वार॑ब्धो॒ वि दु॑नोति॒ सर्व॑म्।
यो ब्रा॑ह्म॒णं मन्य॑ते॒ अन्न॑मे॒व स वि॒षस्य॑ पिबति तैमा॒तस्य॑ ॥४॥
nirvai kṣa॒traṃ naya॑ti॒ hanti॒ varco॒’gniri॒vāra॑bdho॒ vi du॑noti॒ sarva॑m | yo brā॑hma॒ṇaṃ manya॑te॒ anna॑me॒va sa vi॒ṣasya॑ pibati taimā॒tasya॑ || ४ ||
य ए॑नं॒ हन्ति॑ मृ॒दुं मन्य॑मानो देवपी॒युर्धन॑कामो॒ न चि॒त्तात्।
सं तस्येन्द्रो॒ हृद॑ये॒ऽग्निमि॑न्धे उ॒भे ए॑नं द्विष्टो॒ नभ॑सी॒ चर॑न्तम् ॥५॥
ya e॑naṃ॒ hanti॑ mṛ॒duṃ manya॑māno devapī॒yurdhana॑kāmo॒ na ci॒ttāt | saṃ tasyendro॒ hṛda॑ye॒’gnimi॑ndhe u॒bhe e॑naṃ dviṣṭo॒ nabha॑sī॒ cara॑ntam || ५ ||
न ब्रा॑ह्म॒णो हिं॑सित॒व्यो॒३ऽग्निः प्रि॒यत॑नोरिव ।
सोमो॒ ह्यऽस्य दाया॒द इन्द्रो॑ अस्याभिशस्ति॒पाः ॥६॥
na brā॑hma॒ṇo hiṃ॑sita॒vyo॒३’gniḥ pri॒yata॑noriva | somo॒ hya’sya dāyā॒da indro॑ asyābhiśasti॒pāḥ || ६ ||
श॒तापा॑ष्ठां॒ नि गि॑रति॒ तां न श॑क्नोति निः॒खिद॑म्।
अन्नं॒ यो ब्र॒ह्मणां॑ म॒ल्वः स्वा॒द्व॑१द्मीति॒ मन्य॑ते ॥७॥
śa॒tāpā॑ṣṭhāṃ॒ ni gi॑rati॒ tāṃ na śa॑knoti niḥ॒khida॑m | annaṃ॒ yo bra॒hmaṇāṃ॑ ma॒lvaḥ svā॒dva॑१dmīti॒ manya॑te || ७ ||
जिह्वा॒ ज्या भव॑ति॒ कुल्म॑लं॒ वाङ्ना॑डी॒का दन्ता॒स्तप॑सा॒भिदि॑ग्धाः ।
ते भि॑र्ब्रह्मा वि॑ध्यति देवपी॒यून् हृ॑द्ब॒लैर्धनु॑र्भिर्दे॒वजू॑तैः ॥८॥
jihvā॒ jyā bhava॑ti॒ kulma॑laṃ॒ vāṅnā॑ḍī॒kā dantā॒stapa॑sā॒bhidi॑gdhāḥ | te bhi॑rbrahmā vi॑dhyati devapī॒yūn hṛ॑dba॒lairdhanu॑rbhirde॒vajū॑taiḥ || ८ ||
ती॒क्ष्णेष॑वो ब्राह्म॒णा हे॑ति॒मन्तो॒ यामस्य॑न्ति शर॒व्यां॒३ न सा मृषा॑ ।
अ॒नु॒हाय॒ तप॑सा म॒न्युना॑ चो॒त दू॒रादव॑ भिन्दन्त्येनम् ॥९॥
tī॒kṣṇeṣa॑vo brāhma॒ṇā he॑ti॒manto॒ yāmasya॑nti śara॒vyāṃ॒३ na sā mṛṣā॑ | a॒nu॒hāya॒ tapa॑sā ma॒nyunā॑ co॒ta dū॒rādava॑ bhindantyenam || ९ ||
ये स॒हस्र॒मरा॑ज॒न्नासन् दशश॒ता उ॒त।
ते ब्रा॑ह्म॒णस्य॒ गां ज॒ग्ध्वा वै॑तह॒व्याः परा॑भवन् ॥१०॥
ye sa॒hasra॒marā॑ja॒nnāsan daśaśa॒tā u॒ta | te brā॑hma॒ṇasya॒ gāṃ ja॒gdhvā vai॑taha॒vyāḥ parā॑bhavan || १० ||
गौरे॒व तान् ह॒न्यमा॑ना वैतह॒व्याँ अवा॑तिरत्।
ये केस॑रप्राबन्धायाश्चर॒माजा॒मपे॑चिरन् ॥११॥
gaure॒va tān ha॒nyamā॑nā vaitaha॒vyām̐ avā॑tirat | ye kesa॑raprābandhāyāścara॒mājā॒mape॑ciran || ११ ||
एक॑शतं॒ ता ज॒नता॒ या भूमि॒र्व्यऽधूनुत ।
प्र॒जां हिं॑सि॒त्वा ब्राह्म॑णीमसंभ॒व्यं परा॑भवन् ॥१२॥
eka॑śataṃ॒ tā ja॒natā॒ yā bhūmi॒rvya’dhūnuta | pra॒jāṃ hiṃ॑si॒tvā brāhma॑ṇīmasaṃbha॒vyaṃ parā॑bhavan || १२ ||
दे॒व॒पी॒युश्च॑रति॒ मर्त्ये॑षु गरगी॒र्णो भ॑व॒त्यस्थि॑भूयान्।
यो ब्रा॑ह्म॒णं दे॒वब॑न्धुं हि॒नस्ति॒ न स पि॑तृ॒याण॒मप्ये॑ति लो॒कम् ॥१३॥
de॒va॒pī॒yuśca॑rati॒ martye॑ṣu garagī॒rṇo bha॑va॒tyasthi॑bhūyān | yo brā॑hma॒ṇaṃ de॒vaba॑ndhuṃ hi॒nasti॒ na sa pi॑tṛ॒yāṇa॒mapye॑ti lo॒kam || १३ ||
अ॒ग्निर्वै नः॑ पदवा॒यः सोमो॑ दाया॒द उ॑च्यते ।
ह॒न्ताभिश॒स्तेन्द्र॒स्तथा॒ तद् वे॒धसो॑ विदुः ॥१४॥
a॒gnirvai naḥ॑ padavā॒yaḥ somo॑ dāyā॒da u॑cyate | ha॒ntābhiśa॒stendra॒stathā॒ tad ve॒dhaso॑ viduḥ || १४ ||
इषु॑रिव दि॒ग्धा नृ॑पते पृदा॒कूरि॑व गोपते ।
सा ब्रा॑ह्म॒णस्येषु॑र्घो॒रा तया॑ विध्यति॒ पीय॑तः ॥१५॥
iṣu॑riva di॒gdhā nṛ॑pate pṛdā॒kūri॑va gopate | sā brā॑hma॒ṇasyeṣu॑rgho॒rā tayā॑ vidhyati॒ pīya॑taḥ || १५ ||