EeseDharmaSanātana Library
13काण्ड 5 · सूक्त 13
Atharvaveda Śaunaka Kand 5, Sukta 13.
11 shlokद॒दिर्हि मह्यं॒ वरु॑णो दि॒वः क॒विर्वचो॑भिरु॒ग्रैर्नि रि॑णामि ते वि॒षम्।
खा॒तमखा॑तमु॒त स॒क्तम॑ग्रभ॒मिरे॑व॒ धन्व॒न् नि ज॑जास ते वि॒षम् ॥१॥
da॒dirhi mahyaṃ॒ varu॑ṇo di॒vaḥ ka॒virvaco॑bhiru॒grairni ri॑ṇāmi te vi॒ṣam | khā॒tamakhā॑tamu॒ta sa॒ktama॑grabha॒mire॑va॒ dhanva॒n ni ja॑jāsa te vi॒ṣam || १ ||
यत् ते॒ अपो॑दकं वि॒षं तत् त॑ ए॒तास्व॑ग्रभम्।
गृ॒ह्णामि॑ ते मध्य॒ममु॑त्त॒मं रस॑मु॒ताव॒मं भि॒यसा॑ नेश॒दादु॑ ते ॥२॥
yat te॒ apo॑dakaṃ vi॒ṣaṃ tat ta॑ e॒tāsva॑grabham | gṛ॒hṇāmi॑ te madhya॒mamu॑tta॒maṃ rasa॑mu॒tāva॒maṃ bhi॒yasā॑ neśa॒dādu॑ te || २ ||
वृषा॑ मे॒ रवो॒ नभ॑सा॒ न त॑न्य॒तुरु॒ग्रेण॑ ते॒ वच॑सा बाध॒ आदु॑ ते ।
अ॒हं तम॑स्य॒ नृभि॑रग्रभं॒ रसं॒ तम॑स इव॒ ज्योति॒रुदे॑तु॒ सूर्यः॑ ॥३॥
vṛṣā॑ me॒ ravo॒ nabha॑sā॒ na ta॑nya॒turu॒greṇa॑ te॒ vaca॑sā bādha॒ ādu॑ te | a॒haṃ tama॑sya॒ nṛbhi॑ragrabhaṃ॒ rasaṃ॒ tama॑sa iva॒ jyoti॒rude॑tu॒ sūryaḥ॑ || ३ ||
चक्षु॑षा ते॒ चक्षु॑र्हन्मि वि॒षेण॑ हन्मि ते वि॒षम्।
अहे॑ म्रि॒यस्व॒ मा जी॑वीः प्र॒त्यग॒भ्येऽतु त्वा वि॒षम् ॥४॥
cakṣu॑ṣā te॒ cakṣu॑rhanmi vi॒ṣeṇa॑ hanmi te vi॒ṣam | ahe॑ mri॒yasva॒ mā jī॑vīḥ pra॒tyaga॒bhye’tu tvā vi॒ṣam || ४ ||
कैरा॑त पृश्न॒ उप॑तृण्य॒ बभ्र॒ आ मे॑ शृणु॒तासि॑ता॒ अली॑काः ।
मा मे॒ सख्युः॑ स्ता॒मान॒मपि॑ ष्ठाताश्रा॒वय॑न्तो॒ नि वि॒षे र॑मध्वम् ॥५॥
kairā॑ta pṛśna॒ upa॑tṛṇya॒ babhra॒ ā me॑ śṛṇu॒tāsi॑tā॒ alī॑kāḥ | mā me॒ sakhyuḥ॑ stā॒māna॒mapi॑ ṣṭhātāśrā॒vaya॑nto॒ ni vi॒ṣe ra॑madhvam || ५ ||
अ॒सि॒तस्य॑ तैमा॒तस्य॑ ब॒भ्रोरपो॑दकस्य च ।
सा॒त्रा॒सा॒हस्या॒हं म॒न्योरव॒ ज्यामि॑व॒ धन्व॑नो॒ वि मु॑ञ्चामि॒ रथाँ॑ इव ॥६॥
a॒si॒tasya॑ taimā॒tasya॑ ba॒bhrorapo॑dakasya ca | sā॒trā॒sā॒hasyā॒haṃ ma॒nyorava॒ jyāmi॑va॒ dhanva॑no॒ vi mu॑ñcāmi॒ rathām̐॑ iva || ६ ||
आलि॑गी च॒ विलि॑गी च पि॒ता च॑ माता॒ च॑ ।
वि॒द्म वः॑ स॒र्वतो॒ ब॑न्ध्वर॑साः॒ किं क॑रिष्यथ ॥७॥
āli॑gī ca॒ vili॑gī ca pi॒tā ca॑ mātā॒ ca॑ | vi॒dma vaḥ॑ sa॒rvato॒ ba॑ndhvara॑sāḥ॒ kiṃ ka॑riṣyatha || ७ ||
उ॒रु॒गूला॑या दुहि॒ता जा॒ता दा॒स्यसि॑क्न्या ।
प्र॒तङ्कं॑ द॒द्रुषी॑णां॒ सर्वा॑सामर॒सं वि॒षम् ॥८॥
u॒ru॒gūlā॑yā duhi॒tā jā॒tā dā॒syasi॑knyā | pra॒taṅkaṃ॑ da॒druṣī॑ṇāṃ॒ sarvā॑sāmara॒saṃ vi॒ṣam || ८ ||
क॒र्णा श्वा॒वित् तद॑ब्रवीद् गि॒रेर॑वचरन्ति॒का।
याः काश्चे॒माः ख॑नि॒त्रिमा॒स्तासा॑मर॒सत॑मं वि॒ष॑म् ॥९॥
ka॒rṇā śvā॒vit tada॑bravīd gi॒rera॑vacaranti॒kā | yāḥ kāśce॒māḥ kha॑ni॒trimā॒stāsā॑mara॒sata॑maṃ vi॒ṣa॑m || ९ ||
ता॒बुवं॒ न ता॒बुवं॒ न घेत् त्वम॑सि ता॒बुव॑म्।
ता॒बुवे॑नार॒सं वि॒षम् ॥१०॥
tā॒buvaṃ॒ na tā॒buvaṃ॒ na ghet tvama॑si tā॒buva॑m | tā॒buve॑nāra॒saṃ vi॒ṣam || १० ||
त॒स्तुवं॒ न त॒स्तुवं॒ न घेत् त्वम॑सि त॒स्तुव॑म्।
त॒स्तुवे॑नार॒सं वि॒षम् ॥११॥
ta॒stuvaṃ॒ na ta॒stuvaṃ॒ na ghet tvama॑si ta॒stuva॑m | ta॒stuve॑nāra॒saṃ vi॒ṣam || ११ ||