EeseDharmaSanātana Library
1काण्ड 5 · सूक्त 1
Atharvaveda Śaunaka Kand 5, Sukta 1.
9 shlokऋध॑ङ्मन्त्रो॒ योनिं॒ य आ॑ब॒भूवामता॑सु॒र्वर्ध॑मानः सु॒जन्मा॑ ।
अद॑ब्धासु॒र्भ्राज॑मा॒नोऽहे॑व त्रि॒तो ध॒र्ता दा॑धार॒ त्रीणि॑ ॥१॥
ṛdha॑ṅmantro॒ yoniṃ॒ ya ā॑ba॒bhūvāmatā॑su॒rvardha॑mānaḥ su॒janmā॑ | ada॑bdhāsu॒rbhrāja॑mā॒no’he॑va tri॒to dha॒rtā dā॑dhāra॒ trīṇi॑ || १ ||
आ यो धर्मा॑णि प्रथ॒मः स॒साद॒ ततो॒ वपूं॑षि कृणुषे पु॒रूणि॑ ।
धा॒स्युर्योनिं॑ प्रथ॒म आ वि॑वे॒शा यो वाच॒मनु॑दितां चि॒केत॑ ॥२॥
ā yo dharmā॑ṇi pratha॒maḥ sa॒sāda॒ tato॒ vapūṃ॑ṣi kṛṇuṣe pu॒rūṇi॑ | dhā॒syuryoniṃ॑ pratha॒ma ā vi॑ve॒śā yo vāca॒manu॑ditāṃ ci॒keta॑ || २ ||
यस्ते॒ शोका॑य त॒न्वंऽ रि॒रेच॒ क्षर॒द्धिर॑ण्यं॒ शुच॒योऽनु॒ स्वाः ।
अत्रा॑ दधेते अ॒मता॑नि॒ नामा॒स्मे वस्त्रा॑णि॒ विश॒ एर॑यन्ताम् ॥३॥
yaste॒ śokā॑ya ta॒nvaṃ’ ri॒reca॒ kṣara॒ddhira॑ṇyaṃ॒ śuca॒yo’nu॒ svāḥ | atrā॑ dadhete a॒matā॑ni॒ nāmā॒sme vastrā॑ṇi॒ viśa॒ era॑yantām || ३ ||
प्र यदे॒ते प्र॑त॒रं पू॒र्व्यं गुः सदः॑सद आ॒तिष्ठ॑न्तो अजु॒र्यम्।
क॒विः शु॒षस्य॑ मा॒तरा॑ रिहा॒णे जा॒म्यै धुर्यं॒ पति॒मेर॑येथाम् ॥४॥
pra yade॒te pra॑ta॒raṃ pū॒rvyaṃ guḥ sadaḥ॑sada ā॒tiṣṭha॑nto aju॒ryam | ka॒viḥ śu॒ṣasya॑ mā॒tarā॑ rihā॒ṇe jā॒myai dhuryaṃ॒ pati॒mera॑yethām || ४ ||
तदू॒ षु ते॑ म॒हत् पृ॑थुज्म॒न् नमः॑ क॒विः काव्ये॑न कृणोमि ।
यत् स॒म्यञ्चा॑वभि॒यन्ता॑व॒भि क्षामत्रा॑ म॒ही रोध॑चक्रे वावृ॒धेते॑ ॥५॥
tadū॒ ṣu te॑ ma॒hat pṛ॑thujma॒n namaḥ॑ ka॒viḥ kāvye॑na kṛṇomi | yat sa॒myañcā॑vabhi॒yantā॑va॒bhi kṣāmatrā॑ ma॒hī rodha॑cakre vāvṛ॒dhete॑ || ५ ||
स॒प्त म॒र्यादाः॑ क॒वय॑स्ततक्षु॒स्तासा॒मिदेका॑म॒भ्यंऽहु॒रो गा॑त्।
आ॒योर्ह॑ स्क॒म्भ उप॑मस्य नी॒डे प॒थां वि॑स॒र्गे ध॒रुणे॑षु तस्थौ ॥६॥
sa॒pta ma॒ryādāḥ॑ ka॒vaya॑statakṣu॒stāsā॒midekā॑ma॒bhyaṃ’hu॒ro gā॑t | ā॒yorha॑ ska॒mbha upa॑masya nī॒ḍe pa॒thāṃ vi॑sa॒rge dha॒ruṇe॑ṣu tasthau || ६ ||
उ॒तामृता॑सु॒र्व्रत॑ एमि कृ॒न्वन्नसु॑रा॒त्मा त॒न्व॑१स्तत् सु॒मद्गुः॑ ।
उ॒त वा॑ श॒क्रो रत्नं॒ दधा॑त्यू॒र्जया॑ वा॒ यत् सच॑ते हवि॒र्दाः ॥७॥
u॒tāmṛtā॑su॒rvrata॑ emi kṛ॒nvannasu॑rā॒tmā ta॒nva॑१stat su॒madguḥ॑ | u॒ta vā॑ śa॒kro ratnaṃ॒ dadhā॑tyū॒rjayā॑ vā॒ yat saca॑te havi॒rdāḥ || ७ ||
उ॒त पु॒त्रः पि॒तरं॑ क्ष॒त्रमी॑डे ज्ये॒ष्ठं म॒र्याद॑मह्वयन्त्स्व॒स्तये॑ ।
दर्श॒न् नु ता व॑रुण॒ यास्ते॑ वि॒ष्ठा आ॒वर्व्र॑ततः कृणवो॒ वपूं॑षि ॥८॥
u॒ta pu॒traḥ pi॒taraṃ॑ kṣa॒tramī॑ḍe jye॒ṣṭhaṃ ma॒ryāda॑mahvayantsva॒staye॑ | darśa॒n nu tā va॑ruṇa॒ yāste॑ vi॒ṣṭhā ā॒varvra॑tataḥ kṛṇavo॒ vapūṃ॑ṣi || ८ ||
अ॒र्धम॒र्धेन॒ पय॑सा पृणक्ष्य॒र्धेन॑ शुष्म वर्धसे अमुर ।
अविं॑ वृधाम श॒ग्मियं॒ सखा॑यं॒ वरु॑णं पु॒त्रमदि॑त्या इषि॒रम्।
क॒वि॒श॒स्तान्य॑स्मै॒ वपूं॑ष्यवोचाम॒ रोद॑सी सत्य॒वाचा॑ ॥९॥
a॒rdhama॒rdhena॒ paya॑sā pṛṇakṣya॒rdhena॑ śuṣma vardhase amura | aviṃ॑ vṛdhāma śa॒gmiyaṃ॒ sakhā॑yaṃ॒ varu॑ṇaṃ pu॒tramadi॑tyā iṣi॒ram | ka॒vi॒śa॒stānya॑smai॒ vapūṃ॑ṣyavocāma॒ roda॑sī satya॒vācā॑ || ९ ||